ថ្នាក់ដឹកនាំ និងបុគ្គលិកវេទិកាធុរកិច្ចវិនិយោគសិង្ហបុរី ជាង ១០០នាក់ ចូលរួមឈ្វេងយល់ពីរបបសន្ដិសុខសង្គម ផ្នែកប្រាក់សោធន តាមរយៈមន្ត្រីជំនាញ ប.ស.ស.

ភ្នំពេញ៖ ឆ្លើយតបទៅនឹងការស្នើសុំរបស់វេទិកាធុរកិច្ចវិនិយោគសិង្ហបុរី(SIBF) កាលពីពេលកន្លងទៅ នៅរសៀលថ្ងៃពុធ ទី១៩ ខែតុលា ឆ្នាំ២០២២នេះ ដោយទទួលបានការអនុញ្ញាតពីសំណាក់ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម នៃ ប.ស.ស. បានអញ្ជើញធ្វើបទបង្ហាញស្ដីពី របបសន្តិសុខសង្គមផ្នែកប្រាក់សោធន ជូនដល់ថ្នាក់ដឹកនាំ និងបុគ្គលិកវេទិកាធុរកិច្ចវិនិយោគសិង្ហបុរី។

ក្នុងបទបង្ហាញខាងលើ លោកប្រធាននាយកដ្ឋាន បានបញ្ជាក់យ៉ាងច្បាស់ថា៖ របបសន្ដិសុខសង្គមផ្នែកប្រាក់សោធន គឺជាកាតព្វកិច្ចដែលត្រូវចូលរួមអនុវត្តក្នុងការបង់ភាគទាន ៤ភាគរយ នៃប្រាក់ឈ្នួលរបស់បងប្អូននិយោជិត ដែលក្នុងនោះនិយោជកចូលរួមបង់ភាគទាន ២ភាគរយ និងបងប្អូននិយោជិតបង់ភាគទានដែលជាចំណែកខ្លួនឯង ២ភាគរយផងដែរ ដោយឡែកអត្ថប្រយោជន៍ដែលបងប្អូននិយោជិតនិងទទួលបានមកវិញគឺ ៤ភាគរយ ពេញតែម្ដង។

លោកប្រធាននាយកដ្ឋាន បានបន្ដទៀតថា៖ ការចូលរួមចំណែក ២ភាគរយ ជាកាតព្វកិច្ចរបស់ភាគីនិយោជកនេះ គឺជាការជួយលើកទឹកចិត្តដល់កម្មករនិយោជិតដែលបម្រើការងារនៅក្នុងសហគ្រាស គ្រឹះស្ថានរបស់ខ្លួនឱ្យមានការខិតខំប្រឹងប្រែងក្នុងការបំពេញការងារបន្ថែមទៀតដើម្បីបង្កើនផលិតភាពការងារឱ្យកាន់តែរីកចម្រើននិងនិរន្ដរ៍ភាពការងាររបស់បងប្អូនផ្ទាល់តែម្ដង។

លោកប្រធាននាយកដ្ឋាន បានបន្ថែមទៀតថា៖ នៅពេលដែលបងប្អូនដល់អាយុចូលនិវត្តន៍ ប.ស.ស. និងបើកប្រាក់សោធនជូនបងប្អូនជារៀងរាល់ខែ ដោយក្នុងមួយខែបើកជូនពីរដង ហើយអ្វីដែលសំខាន់នោះគឺបងប្អូននឹងទទួលបានសេវាថែទាំសុខភាពដោយឥតគិតថ្លៃពី ប.ស.ស. ផងដែរ។

សូមបញ្ជាក់ថា បទបង្ហាញខាងលើ មានការចូលរួមពីថ្នាក់ដឹកនាំ និងបុគ្គលិកវេទិកាធុរកិច្ចវិនិយោគសិង្ហបុរី ប្រមាណជាង ១០០នាក់ នៅសាលប្រជុំរាជបណ្ឌិតសភាអន្តរជាតិសិង្ហបុរី (កម្ពុជា)៕