លោកជំទាវ កែ ច័ន្ទមុនី នាំយកអំណោយមនុស្សធម៌ សាខាកាកបាទក្រហមខេត្តកំពង់ឆ្នាំង ចែកជូនពលរដ្ឋ ២២០គ្រួសារ ដែលរងគ្រោះដោយទឹកជំនន់
ភ្នំពេញ៖ លោកជំទាវ កែ ច័ន្ទមុនី តំណាងរាស្ត្រមណ្ឌលខេត្តកំពង់ឆ្នាំង រួមជាមួយ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្ដម អ៊ុក ពញ្ញា រដ្ឋលេខាធិការក្រសួងអភិវឌ្ឍន៍ជនបទ និងជាប្រធានកិត្តិយសអនុសាខាកាកបាទក្រហមកម្ពុជាស្រុករលាប្អៀរ តំណាងឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ប្រធានក្រុមការងាររាជរដ្ឋាភិបាលចុះមូលដ្ឋានខេត្ត ប្រធានក្រុមប្រឹក្សាស្រុក អភិបាលស្រុក និងក្រុមការងារសាខា អនុសាខា នាថ្ងៃទី១៨ ខែតុលា ឆ្នាំ២០២២ បានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមខេត្ត ចែកជូនដល់បងប្អូនប្រជាពលរដ្ឋចំនួន ២២០គ្រួសារ ដែលរងគ្រោះដោយទឹកជំនន់ ហើយបានជម្លៀសមកស្នាក់នៅទីទួលសុវត្ថិភាព ក្នុងសាលាបឋមសិក្សាព្រែកសាលា ភូមិព្រែកសាលា ឃុំទឹកហូត និងវត្តឧទុម្ពរ ភូមិឧទុម្ពរ ឃុំស្វាយជ្រុំ ស្រុករលាប្អៀរ។
អំណោយដែលបានផ្ដល់ជូនក្នុងមួយគ្រួសារៗទទួលបាន អង្ករ៣០គីឡូក្រាម ឃីត១ (មុង១ ក្រម៉ា១ ភួយ១ សារុង១) មី១កេស ត្រីខ១យួរ ទឹកត្រីទឹកស៊ីអ៊ីវ១យួរ ជែល១ដប ប្រេងកូឡា១ដប ប្រេងរឹត១ដប និងថវិកាមួយចំនួន។
