ក្រសួងការបរទេសចិន៖ ស្ថានភាពទូទៅនៃសេដ្ឋកិច្ចចិនដែលមាននិន្នាការល្អរយៈពេលយូរនឹងមិនផ្លាស់ប្តូរទេ ទ្វារបើកចំហរបស់ចិននឹងមិនបិទឡើយ

នៅក្នុងសន្និសីទសារព័ត៌មានជាប្រចាំរបស់ក្រសួងការបរទេសចិនកាលពីរសៀលថ្ងៃទី៩ ខែតុលា លោកស្រី Mao Ning អ្នកនាំពាក្យនៃក្រសួងការបរទេសចិនបានថ្លែងថា ក្នុងរយៈពេល១០ឆ្នាំមកនេះ សេដ្ឋកិច្ចចិនមានកំណើនជាមធ្យម ៦.៦% ដែលជាប់ស្ថិតនៅជួរមុខក្នុងចំណោមអង្គភាពសេដ្ឋកិច្ចសំខាន់ៗរបស់ពិភពលោក ដែលខ្ពស់ជាងល្បឿនកំណើនជាមធ្យមរបស់ពិភពលោកក្នុងរយៈពេលដូចគ្នាចំនួន២.៦% និងខ្ពស់ជាងល្បឿនកំណើនជាមធ្យមរបស់ប្រទេសកំពុងអភិវឌ្ឍន៍ចំនួន៣.៧% ។ អត្រារួមចំណែកជាមធ្យមរបស់ប្រទេសចិនចំពោះកំណើនសេដ្ឋកិច្ចពិភពលោកបានឈានដល់ ៣៨.៦% ច្រើនជាងចំនួនសរុបនៃអត្រារួមចំណែករបស់ប្រទេស G7 ។ កាលពីឆ្នាំ២០២១ GDP របស់ប្រទេសចិនត្រូវជា ១៨.៥% នៃបរិមាណសរុបនៃសេដ្ឋកិច្ចពិភពលោក ដែលកើនឡើង ៧.២%បើប្រៀបធៀបនឹងរយៈពេល ១0 ឆ្នាំមុន។ កាលពីឆ្នាំ២០២១ ទំហំសរុបនៃពាណិជ្ជកម្មជាមួយបរទេសរបស់ចិនមានចំនួន ៦.៩ទ្រីលានដុល្លារអាមេរិក ដែលកើនឡើង ៥៦.៨% បើប្រៀបធៀបនឹងរយៈពេល១០ឆ្នាំមុន។ ប្រទេសចិនគឺជាអង្គភាពសេដ្ឋកិច្ចធំទីពីរ និងជាប្រទេសពាណិជ្ជកម្មធំបំផុតរបស់ពិភពលោក។
លោកស្រី Mao Ning បានថ្លែងទៀតថា ស្ថានភាពទូទៅនៃសេដ្ឋកិច្ចចិនដែលមាននិន្នាការល្អរយៈពេលយូរនឹងមិនផ្លាស់ប្តូរទេ ហើយទ្វារបើកចំហរបស់ចិនក៏នឹងមិនបិទឡើយ។ ប្រទេសចិននឹងបន្តប្រកាន់ខ្ជាប់នូវគោលការណ៍នៃការបើកចំហ បរិយាប័ន្ន ផ្តល់ផលប្រយោជន៍ដល់គ្នាទៅវិញទៅមក និងឈ្នះ-ឈ្នះ ដើម្បីពង្រីកការបើកចំហក្នុងកម្រិតខ្ពស់ជាបន្តបន្ទាប់៕
វិទ្យុមិត្តភាពកម្ពុជា