ឯកឧត្ដម សួស យ៉ារ៉ា ជួបពិភាក្សាការងារជាមួយ ប្រធានគណៈកម្មការកិច្ចសហប្រតិបត្តិការអន្តរសភា នៃរដ្ឋសភាឥណ្ឌូនេស៊ី

ភ្នំពេញ៖ ឯកឧត្ដម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្ដរជាតិ ឃោសនាការ និងព័ត៌មាន នៃរដ្ឋសភា នៅថ្ងៃទី៥ ខែតុលា ឆ្នាំ២០២២ បានជួបពិភាក្សាការងារជាមួយ ឯកឧត្តមបណ្ឌិត ហ្វាដលី ហ្សុន (Dr. Fadli Zon) ប្រធានគណៈកម្មការកិច្ចសហប្រតិបត្តិការអន្តរសភា នៃរដ្ឋសភាឥណ្ឌូនេស៊ី ក្នុងអំឡុងពេលឯកឧត្តមដឹកនាំគណៈប្រតិភូរដ្ឋសភាកម្ពុជា ក្នុងនាមកម្ពុជាជាប្រធានអាស៊ាន ចូលរួមកិច្ចប្រជុំកំពូលថ្នាក់ដឹកនាំសភានៃបណ្តាប្រទេសG20 (P20) ចាប់ពីថ្ងៃទី៥ ដល់ថ្ងៃទី៧ ខែតុលា ឆ្នាំ២០២២ នៅទីក្រុងហ្សាកាតា ប្រទេសឥណ្ឌូនេស៊ី។

ក្នុងជំនួបទ្វេភាគីនេះ មានគោលបំណងពង្រឹង និងពង្រីកកិច្ចសហប្រតិបត្តិការទ្វេភាគី ក្នុងក្របខណ្ឌរដ្ឋសភា និងប្រទេសទាំងពីរបន្ថែមទៀត។ ក្នុងស្មារតីនេះ ភាគីទាំងពីរបានសន្យាជួយគាំទ្រគ្នាទៅវិញទៅ មកក្នុងក្របខណ្ឌតំបន់ និងអន្តរជាតិ ក្នុងនោះភាគីឥណ្ឌូនេស៊ីបានស្វាគមន៍សភាកម្ពុជា ដែលបានចូលរួមយ៉ាងសកម្មក្នុងផ្នែកការទូតសភា ជាពិសេសនៅក្នុងកិច្ចប្រជុំកំពូលថ្នាក់ដឹកនាំសភានៃបណ្ដា ប្រទេសG20 (P20) ដែលផ្ដោតលើប្រធានបទស្ដីពី “ការពង្រឹងតួនាទីសភាដើម្បីការងើបឡើងវិញសេដ្ឋកិច្ចប្រកបដោយចីរភាព” និងអបអររដ្ឋសភាកម្ពុជាទទួលធ្វើជាម្ចាស់ផ្ទះនៃមហាសន្និបាតអន្តរសភាអាស៊ាន លើកទី៤៣ នៅព្រះរាជាណាចក្រកម្ពុជា ចាប់ពីថ្ងៃទី ២០-២៥ ខែវិច្ឆិកា ឆ្នាំ២០២២។

ភាគីឥណ្ឌូនេស៊ីក៏បានជម្រាបជូនគណៈប្រតិភូរដ្ឋសភាកម្ពុជាថា ប្រធានរដ្ឋសភាឥណ្ឌូនេស៊ីនឹងដឹកនាំគណៈប្រតិភូអញ្ជើញចូលរួមមហាសន្និបាតអាយប៉ា លើកទី៤៣ នៅព្រះរាជាណាចក្រកម្ពុជា និងជូនពរអោយការរៀបចំមហាសន្និបាតអាយប៉ានេះ ទទួលបានជោគជ័យ និងផ្លែផ្កា ៕