ឧត្តមសេនីយ៍ឯក ពៅ ហេង អញ្ជើញជាអធិបតីភាព ក្នុងពិធីប្រកាសតែតាំងផ្លាស់ប្តូរមុខងារ និងបំពាក់ឋានន្តរសក្តិជូនដល់ នាយទាហាន បញ្ជាការដ្ឋានយោធភូមិភាគទី៤

ភ្នំពេញ៖ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ នាថ្ងៃទី៨ ខែកញ្ញា ឆ្នាំ២០២២ បានអញ្ជើញជាអធិបតីភាព ក្នុងពិធីប្រកាសតែតាំងផ្លាស់ប្តូរមុខងារ និងបំពាក់ឋានន្តរសក្តិជូនដល់ នាយទាហាន បញ្ជាការដ្ឋានយោធភូមិភាគទី៤។

នៅក្នុងសេចក្តីសម្រេចស្តីពីការតែងតាំងផ្លាស់ប្តូរមុខងារ និងការតំឡើងឋានន្តរសក្តិយោធិនចំណុះ បញ្ជាការរដ្ឋានយោធភូមិភាគទី៤ ចំនួន ៧៤នាក់។ ប្រកាស់តែងតាំងមុខងារជា នាយរងការិយាល័យ ចំនួន ៥នាក់ និងបំពាក់ឋានន្តរសក្តិថ្នាក់អនុសេនីយ៍ឯកចំនួន ៣នាក់ ថ្នាក់អនុសេនីយ៍ទោចំនួន ៩នាក់ ថ្នាក់អនុសេនីយ៍ត្រីចំនួន ៣២នាក់ និងថ្នាក់នាយចំណង់ចំនួន ២៥នាក់ ។

ក្នុងនោះដែរ ឯកឧត្តម មេបញ្ជាការ មានប្រសាសន៍អប់រំផ្សព្វផ្សាយអំពីសភាពការណ៍ថ្មីៗជាតិ-អន្តរជាតិ និងសភាពការណ៍ប្រែប្រួលលើខែ្សបន្ទាត់ព្រំដែនកម្ពុជា-ថៃ ក្នុងភូមិសាស្រ្តទទួលខុសត្រូវរបស់អង្គភាព ជូនដល់នាយទាហាន នាយទាហានរង និងពលទាហាន ចំណុះបញ្ជាការដ្ឋានយោធភូមិភាគទី៤ បានទទួលជ្រាប និងក្រើនរម្លឹកដល់យោធិនគ្រប់រូប ត្រូវគោរព និងប្រតិបត្តិយ៉ាងម៉ឹងម៉ាត់ចំពោះច្បាប់រដ្ឋធម្មនុញ្ញ និងច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ និងត្រូវគោរព អនុវត្តឱ្យបានត្រឹមត្រូវតាមបទបញ្ញត្តិ បទវិន័យ និងបទបញ្ជាផ្សេងៗរបស់កងទ័ព ។

ឯកឧត្តម មេបញ្ជាការ ក៏បានលើកឡើង និងសង្កត់ធ្ងន់អំពីភារកិច្ចចំពោះមុខដែលថ្នាក់លើបានដាក់ជូន ត្រូវបង្កើនការយកចិត្តទុកដាក់ សហការគ្នាអនុវត្តតាមមុខនាទីរបស់ខ្លួនម្នាក់ៗក្នុងស្មារតីទទួលខុសត្រូវខ្ពស់ ដើម្បីទទួលបានជោគជ័យតាមផែនការកំណត់ ចូលរួមការងារកសាងអង្គភាព ការងារបង្កបង្កើនផល និងត្រៀមកម្លាំងជួយអន្តរាគមន៍សម្រាប់ថ្នាក់លើ២៤ម៉ោង លើ២៤ម៉ោង ក្នុងការចល័តចុះជួយប្រជាពលរដ្ឋរងគ្រោះដោយគ្រោះធម្មជាតិ ឱ្យបានទាន់ពេលវេលា។

ឯកឧត្តម មេបញ្ជាការ បានថ្លែងនូវការកោតសរសើរចំពោះការខិតខំប្រឹងប្រែងរបស់យោធិនទាំងអស់ ដែលបានយកចិត្តទុកដាក់បំពេញគ្រប់ភារកិច្ចយ៉ាងម៉ឺងម៉ាត់ ខិតខំពុះពារជម្នះរាល់ឧបសគ្គ រហូតសម្រេចបាននូវស្នាដៃ សមិទ្ធិផលនានា គួរឱ្យកត់សំគាល់កន្លងមក និងបានផ្ដាំផ្ញើដល់នាយទាហាន នាយទាហានរង និងពលទាហានទាំងអស់ សូមបន្តការយកចិត្តទុកដាក់ ខិតខំប្រឹងប្រែងបន្ថែមទៀត នូវរាល់ការងារកសាង និងគោរពបទបញ្ជារបស់ថ្នាក់លើ ដើម្បីធានាបាននូវឯករាជ្យភាពជាតិ បូរណភាពទឹកដី សន្តិភាព និងស្ថិរភាព ជូនជាតិ មាតុភូមិ ព្រមទាំងសូមជូនពរដល់ នាយទាហាន នាយទាហានរង និងពលទាហានទងអស់ សូមឱ្យចៀសផុតពីជំងឺដ៏កាចសាហាវកូវីដ-១៩៕