រុស្ស៉ីព្រមានដល់អាមេនី នឹងផ្អាកការផ្គត់ផ្គង់ប្រេងតម្លៃថោក ឧស្ម័ន និងពេជ្រមិនទាន់កែច្នៃ ប្រសិនបើនៅតែបន្តគម្រោងចូលជាសមាជិកសហភាពអឺរ៉ុប
មូស្គូ៖ យោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី២៨ ខែឧសភា ឆ្នាំ២០២៦ រុស្ស៉ីកាលពីពុធសប្តាហ៍នេះ បានព្រមានដល់អាមេនី ថាខ្លួននឹងផ្អាកការផ្គត់ផ្គង់ប្រេងតម្លៃថោក ឧស្ម័ន និងពេជ្រមិនទាន់កែច្នៃ ប្រសិនបើប្រទេសនេះ នៅតែបន្តគម្រោងចូលជាសមាជិកសហភាពអឺរ៉ុប (EU)។
អ្នកនាំពាក្យក្រសួងការបរទេសរុស្ស៉ី លោកស្រី Maria Zakharova ប្រាប់ទីភ្នាក់ងារព័ត៌មាន RIA ថាស្ថានទូតរុស្ស៉ីបានបញ្ជូនលិខិតផ្លូវការមួយច្បាប់ ដែលមានខ្លឹមសារថា ប្រសិនបើដំណើរការចូល EU នៅតែបន្ត ភាគីរុស្ស៉ីនឹងផ្អាក ឬបញ្ចប់ជាឯកតោភាគីនូវកិច្ចព្រមព្រៀង ស្តីពីកិច្ចសហប្រតិបត្តិការផ្គត់ផ្គង់ឧស្ម័នធម្មជាតិ ផលិតផលប្រេង និងពេជ្រមិនទាន់កែច្នៃ។
អាមេនី ដែលជាប្រទេសគ្មានផ្លូវទឹក និងមានប្រជាជនប្រហែល ៣លាននាក់ មានទំនាក់ទំនងជិតស្និទ្ធជាមួយរុស្ស៉ី ហើយក៏ជាសមាជិកនៃសហភាពសេដ្ឋកិច្ចអឺរ៉ាស៉ីដឹកនាំដោយរុស្ស៉ី (Russian-led Eurasian Economic Union)។
នាយករដ្ឋមន្ត្រី លោក Nikol Pashinyan បាននិយាយថា អាមេនីគ្មានគម្រោងចេញពីសហភាពអឺរ៉ាស៉ីទេ ហើយសមាជិកភាពក្នុងស្ថាប័ននេះ គឺត្រូវគ្នានឹងគោលដៅរបស់ EU៕
