បទវិភាគ៖ពិព័រណ៍ទំនិញប្រើប្រាស់ចិនអន្តរជាតិត្រួសត្រាយអនាគតថ្មីនៃការប្រើប្រាស់និងជំរុញភាគលាភថ្មីនៃការប្រើប្រាស់
“យើងបន្តផ្តោតសំខាន់លើកិច្ចសហប្រតិបត្តិការជាមួយចិនក្នុងវិស័យរថយន្ត កសិកម្ម និងសេវាកម្មហិរញ្ញវត្ថុ…”នេះជាការលើកឡើងរបស់លោក Maninder Sidhu រដ្ឋមន្ត្រីក្រសួងពាណិជ្ជកម្មអន្តរជាតិរបស់កាណាដាដែលជាប្រទេសភ្ញៀវកិត្តិយសក្នុងពិព័រណ៍ទំនិញប្រើប្រាស់ចិនអន្តរជាតិលើកទី៦ដែលបិទបញ្ចប់នៅថ្ងៃទី១៨ ខែមេសា ។ ក្នុងពិព័រណ៍លើកនេះ សហគ្រាសបរទេសជាច្រើនដែលចូលរួមពិព័រណ៍បាននាំគ្នារៀបរាប់យ៉ាងលម្អិតនិងបង្ហាញពីក្តីរំពឹងទុកយ៉ាងខ្លាំងចំពោះកិច្ចសហប្រតិបត្តិការជាមួយប្រទេសចិន ។
ក្នុងនាមជា “ពិព័រណ៍សំខាន់ដំបូង” នៅក្នុងឆ្នាំចាប់ផ្តើមនៃ ការអនុវត្ត“ផែនការអភិវឌ្ឍន៍ជាតិ៥ឆ្នាំទី១៥” របស់ចិននិងជា “ការដាក់តាំងបង្ហាញជាលើកដំបូង” បន្ទាប់ពីការចាប់ដំណើរការនូវប្រតិបត្តិការគយពិសេសនៅកោះទាំងមូលនៃកំពង់ផែពាណិជ្ជកម្មសេរីហៃណាន ពិព័រណ៍ទំនិញប្រើប្រាស់ចិនអន្តរជាតិលើកនេះមានចំណុចលេចធ្លោជាច្រើន៖ទំនិញតាំងពិព័រណ៍អន្តរជាតិមានចំនួន ៦៥ ភាគរយ ដែលកើនឡើង ២០ ភាគរយបើប្រៀបធៀបនឹងឆ្នាំមុន ផលិតផលថ្មីចំនួន ២៧៧ ត្រូវបានចេញផ្សាយជាសាធារណៈក្នុងពិព័រណ៍នេះ ដែលកើនឡើងទ្វេដងបើប្រៀបធៀបនឹងឆ្នាំមុន បង្កើតឡើងជាលើកដំបូងនូវ “តំបន់ពូនជ្រំ” ម៉ាកយីហោលក់រាយខាងទេសចរណ៍និងមជ្ឈមណ្ឌលសេវាកម្មសម្រាប់ពាណិជ្ជកម្មបញ្ជាទិញ ។ល។ គួរបញ្ជាក់ថា សហគ្រាសបរទេសជាច្រើនបានដណ្តើមយកឱកាសនៃភាពងាយស្រួលក្នុងការធ្វើពាណិជ្ជកម្មនៅកំពង់ផែពាណិជ្ជកម្មសេរី ហើយបានបង្កើតក្រុមការងារពិសេសដែល “ទិញទំនិញនៅទូទាំងពិភពលោក លក់ទៅកាន់ទូទាំងពិភពលោក” ដើម្បីជំរុញការទៅមកនៃទំនិញល្អៗរបស់ពិភពលោកនិងផលិតផលល្អៗរបស់ចិន ក៏ដូចជាធ្វើឱ្យទីផ្សារធំរបស់ចិនក្លាយជាកាលានុវត្តភាពខ្លាំងសម្រាប់ពិភពលោក។
ក្នុងនាមជាវេទិកាដាក់តាំងបង្ហាញនិងលក់ដូរទំនិញប្រើប្រាស់ល្អៗរបស់ពិភពលោក តើពិព័រណ៍ទំនិញប្រើប្រាស់ចិនអន្តរជាតិលើកនេះបានបង្កើតនិន្នាការប្រើប្រាស់ថ្មីអ្វីខ្លះ?ពីការអភិវឌ្ឍប្រកបដោយភាពបៃតងនិងកាបូនទាប រហូតដល់បច្ចេកវិទ្យាទំនើបៗដូចជា វ៉ែនតា AI និងរថយន្តហោះហើរជាដើម ការប្រើប្រាស់ប្រកបដោយភាពបៃតងនិងភាពវៃឆ្លាតអាចមើលឃើញនៅគ្រប់ទីកន្លែង ។ ទន្ទឹមនឹងនេះ សេដ្ឋកិច្ចបែបដកអារម្មណ៍ និងបែបអន្តរកម្មក៏បានក្លាយជារឿងទាន់សម័យផងដែរ ។
តើការផ្លាស់ប្តូរថ្មីនៃទីផ្សារប្រើប្រាស់ចិននឹងនាំមកនូវឱកាសថ្មីអ្វីខ្លះដល់សហគ្រាសបរទេស?
ទីមួយ ជាមួយនឹងការលើកកម្ពស់គុណភាពជីវភាពរបស់ប្រជាជនចិន ទីផ្សារក៏ត្រូវពង្រីកដែរ ។ “ផែនការអភិវឌ្ឍន៍ជាតិ៥ឆ្នាំទី១៥” និងរបាយការណ៍ការងាររដ្ឋាភិបាលឆ្នាំនេះបានលើកឡើងថា នឹងអនុវត្តយ៉ាងស៊ីជម្រៅនូវសកម្មភាពពិសេសសម្រាប់ជំរុញការប្រើប្រាស់ ដើម្បីសម្របទៅតាមតម្រូវការប្រើប្រាស់របស់ក្រុមមនុស្សផ្សេងៗគ្នា និងពង្រីកការផ្គត់ផ្គង់ប្រកបដោយគុណភាពខ្ពស់ជាដើម ។ នៅក្នុងត្រីមាសទីមួយនៃឆ្នាំនេះ ទំហំលក់រាយនៃមុខរបរសេវាកម្មបានកើនឡើង ៥,៥ ភាគរយបើប្រៀបធៀបនឹងរយៈពេលដូចគ្នានាឆ្នាំមុន ដែលមានល្បឿនកំណើនខ្ពស់ជាងទំហំលក់រាយទំនិញចំនួន៣,៣ ភាគរយក្នុងពេលដំណាលគ្នា ជាពិសេស ការប្រើប្រាស់ក្នុងការធ្វើដំណើរខាងវប្បធម៌និងទេសចរណ៍បានកើនឡើងកាន់តែលឿន ដែលបានក្លាយជាចំណុចលេចធ្លោមួយ ។
ព្រមពេលជាមួយគ្នានេះ តម្រូវការរបស់ប្រជាជនចិនកំពុងឆ្ពោះទៅរក “ភាពថ្មី” ដែលបានជំរុញការច្នៃប្រឌិតថ្មីរបស់សហគ្រាស ។ ក្រុមហ៊ុន OSIM សិង្ហបុរីដែលបានចូលរួមពិព័រណ៍ទំនិញប្រើប្រាស់ចិនអន្តរជាតិ៦លើកទាំងអស់ បានដាក់តាំងបង្ហាញជាលើកដំបូងនូវកៅអីថែរក្សាសុខភាព AI ដែលអាចផ្តល់នូវការដកបទពិសោធន៍គ្រប់ជ្រុងជ្រោយតាមរយៈអារម្មណ៍ទាំងប្រាំ ។ លោក Su Bahong អគ្គនាយករងនៃក្រុមហ៊ុន Volkswagen Group (China) បានថ្លែងថា ទន្ទឹមនឹងការជំរុញការរួមបញ្ចូលយ៉ាងស៊ីជម្រៅរវាងការច្នៃប្រឌិតថ្មីផ្នែកវិទ្យាសាស្ត្រនិងបច្ចេកវិទ្យានិងការច្នៃប្រឌិតថ្មីផ្នែកឧស្សាហកម្មរបស់ចិន វិស័យថ្មីៗនិងការប្រើប្រាស់ថ្មីៗជាច្រើននឹងត្រូវបង្កើតឡើង យើងរំពឹងទុកបង្កើនកិច្ចសហប្រតិបត្តិការជាមួយដៃគូចិន ដើម្បីចូលរួមក្នុងរលកនវានុវត្តន៍នៃឧស្សាហកម្ម ។
នៅពេលដែលផ្ការីកស្គុសស្គាយនៅរដូវផ្ការីក ភ្ញៀវទេសចរដ៏ច្រើនកុះករមកដល់ប្រទេសចិន ។ ពិព័រណ៍នានាត្រូវបានប្រារព្ធឡើងជាបន្តបន្ទាប់ ហើយទ្វារបើកទូលាយរបស់ចិននឹងបើកចំហរឹតតែធំឡើងៗ ។ ក្នុងនាមជាអ្នកចូលរួមដ៏សំខាន់ក្នុងការធ្វើទំនើបកម្មតាមបែបផែនចិន សហគ្រាសទុនបរទេសនឹងរួមជាមួយប្រទេសចិនដើម្បីបង្កើតអនាគតកាន់តែល្អបវរ ៕
