ឧបនាយករដ្ឋមន្ត្រី ហ៊ុន ម៉ានី ជំរុញឱ្យអាជ្ញាធរខេត្តកំពង់ស្ពឺ រំលេចអត្តសញ្ញាណ និងសក្តានុពលខេត្តឱ្យកាន់តែលេចធ្លោ

កំពង់ស្ពឺ៖ ក្នុងឱកាសដែលឯកឧត្តមឧបនាយករដ្ឋមន្ត្រី អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ «បណ្ណាល័យមរតកក្រមង៉ុយ» ចំនួន ២ទីតាំង ស្ថិតក្នុងស្រុកបសេដ្ឋ ខេត្តកំពង់ស្ពឺ នាព្រឹកថ្ងៃទី២៣ ខែមិថុនា ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តកំពង់ស្ពឺ បានជំរុញ និងលើកទឹកចិត្តដល់អាជ្ញាធរខេត្តកំពង់ស្ពឺ ឱ្យបន្តគិតគូរ និងរំលេចបន្ថែមនូវអត្តសញ្ញាណ សក្តានុពល និងលក្ខណៈពិសេសរបស់ខេត្ត ដើម្បីទាក់ទាញចំណាប់អារម្មណ៍ និងជំរុញការអភិវឌ្ឍមូលដ្ឋានឱ្យកាន់តែរីកចម្រើនទ្វេដង។

ថ្លែងក្នុងពិធី ឯកឧត្តមបានលើកឡើងពីចំណុចខ្លាំងចម្បងៗមួយចំនួន ដែលជាសក្តានុពលស្នូល របស់ខេត្តកំពង់ស្ពឺ ដោយថ្នាក់ដឹកនាំ និងអាជ្ញាធរពាក់ព័ន្ធត្រូវយកចិត្តទុកដាក់រំលេចបន្ថែម រួមមាន៖

– វិស័យទេសចរណ៍ដ៏ទាក់ទាញ៖ ខេត្តកំពង់ស្ពឺមានតំបន់ទេសចរណ៍សរុបចំនួន ២៩កន្លែង ដែលកំពុងពេញនិយម ពិសេសរមណីយដ្ឋានធម្មជាតិល្បីៗដូចជា ភ្នំខ្នងផ្សារ និងឧទ្យានជាតិព្រះមុនីវង្ស «ភ្នំគិរីរម្យ» រួមទាំងការផ្តួចផ្តើមរៀបចំព្រឹត្តិការណ៍ «បុណ្យភ្នំ» ដែលជាមេដែកដ៏សំខាន់ក្នុងការស្រូបទាញភ្ញៀវទេសចរជាតិ និងអន្តរជាតិ។

– អត្តសញ្ញាណម្ហូបអាហារ៖ ការលើកស្ទួយអត្តសញ្ញាណវប្បធម៌ និងជីវភាពរស់នៅ តាមរយៈការច្នៃប្រឌិតមុខម្ហូប និងចំណីអាហារឈ្ងុយឆ្ងាញ់ ដែលប្រើប្រាស់វត្ថុធាតុដើមពី ដើមត្នោត និងផ្លែត្នោត ដែលជានិមិត្តរូប ដ៏លេចធ្លោប្រចាំខេត្ត។

– កំណើនរោងចក្រ និងសហគ្រាស៖ ការទាញយកអត្ថប្រយោជន៍ពីសក្តានុពលសេដ្ឋកិច្ច ដែលបច្ចុប្បន្នខេត្តមានរោងចក្រ និងសហគ្រាសសរុបរហូតដល់ទៅ ១.៦៤២ មូលដ្ឋាន កំពុងចូលរួមចំណែកយ៉ាងសកម្មក្នុងការបង្កើតការងារ និងបង្កើនចំណូលដល់ប្រជាពលរដ្ឋក្នុងមូលដ្ឋាន។

– ការអភិវឌ្ឍមូលធនមនុស្ស៖ អ្វីដែលជាមោទនភាពបំផុតនោះគឺ ខេត្តកំពង់ស្ពឺ ជាទឹកដីកំណើតរបស់ សម្តេចព្រះសង្ឃរាជ ជួន ណាត ដែលជាឥស្សរជនជាន់ខ្ពស់ផ្នែកអក្សរសាស្ត្រជាតិ។ ឈរលើប្រវត្តិសាស្ត្រ ដ៏ត្រចះត្រចង់នេះ ការកសាងធនធានមនុស្ស គឺជាកិច្ចការអាទិភាពដែលត្រូវបន្តជំរុញ។

ឯកឧត្តមឧបនាយករដ្ឋមន្ត្រី បានបន្ថែមថា ការសម្ពោធសមិទ្ធផល «បណ្ណាល័យមរតកក្រមង៉ុយ» ទាំង ២ទីតាំងនៅស្រុកបសេដ្ឋនាថ្ងៃនេះ មិនត្រឹមតែជាការអបអរសាទរចំពោះហេដ្ឋារចនាសម្ព័ន្ធរូបវន្តថ្មីប៉ុណ្ណោះទេ ប៉ុន្តែគឺជាសក្ខីភាពមួយបង្ហាញយ៉ាងច្បាស់ពីការប្តេជ្ញាចិត្តក្នុងការបណ្តុះបណ្តាលមូលធនមនុស្ស និងការបន្តវេនថែរក្សាមរតកបញ្ញាញាណរបស់បុព្វបុរសខ្មែរ សម្រាប់កូនចៅជំនាន់ក្រោយ ស្របតាមចក្ខុវិស័យ ក៏ដូចជាការគិតគូរលើវិស័យអាទិភាពរបស់រាជរដ្ឋាភិបាលកម្ពុជា៕