លោកស្រី តៅ សុខម៉ារ៉ា ដឹកនាំកិច្ចប្រជុំពិភាក្សានិងសិក្សាស្វែងយល់ការបញ្ជ្រាបយេនឌ័រ និងការលើកកម្ពស់តួនាទីភារកិច្ចស្រ្តី ក្នុងភាពជាអ្នកដឹកនាំនៅរដ្ឋបាលខេត្តត្បូងឃ្មុំ

ត្បូងឃ្មុំ៖ នៅថ្ងៃទី២៣ ខែមិថុនា ឆ្នាំ២០២៦នេះ លោកស្រី តៅ សុខម៉ារ៉ា អគ្គនាយករង និងជាប្រធានក្រុមការងារយេនឌ័រនៃអគ្គនាយកដ្ឋានរដ្ឋបាល ក្រសួងមហាផ្ទៃ អញ្ជើញដឹកនាំកិច្ចប្រជុំពិភាក្សានិងសិក្សាស្វែងយល់ការបញ្ជ្រាបយេនឌ័រ និងការលើកកម្ពស់តួនាទីភារកិច្ចស្រ្តី ក្នុងភាពជាអ្នកដឹកនាំនៅរដ្ឋបាលថ្នាក់ក្រោមជាតិ ក្នុងភូមិសាស្រ្តខេត្តត្បូងឃ្មុំ ជាមួយលោកស្រី នី ចាន់ធីតា អភិបាលរងនៃគណៈអភិបាលខេត្តត្បូងឃ្មុំ តំណាងឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ និងលោកជំទាវ សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត (គ.ក.ស.ក.) នៅសាលប្រជុំសាលាខេត្តត្បូងឃ្មុំ។

កិច្ចប្រជុំនេះក៏មានការអញ្ជើញចូលរួមពីក្រុមការងារយេនឌ័រនៃអគ្គនាយកដ្ឋារដ្ឋបាល ក្រសួងមហាផ្ទៃ លោកជំទាវសមាជិកក្រុមប្រឹក្សាខេត្ត លោកស្រីអភិបាលរងខេត្ត លោក លោកស្រីអនុប្រធានមន្ទីរ អង្គភាពជុំវិញខេត្ត អភិបាលរងក្រុង ស្រុក សមាជិកក្រុមប្រឹក្សាក្រុង ស្រុក និងតំណាងគណៈកម្មាធិការទទួលបន្ទុកកិច្ចការស្ត្រី និងកុមារ (គ.ក.ស.ក) ក្រុង ស្រុក និងលោក លោកស្រី មេឃុំ សង្កាត់នៃរដ្ឋបាលក្រុង ស្រុក ព្រមទាំងលោកស្រីគណៈកម្មាធិការទទួលបន្ទុកនារី និងកុមារ(គ.ក.ន.ក) ឃុំ សង្កាត់ ប្រមាណ ៩៥រូប។

កិច្ចប្រជុំខាងលើបានដំណើរការទៅដោយមានការពិភាក្សា ផ្លាស់ប្តូរមតិយោបល់ និងចែករំលែកបទពិសោធយ៉ាងផុសផុលពីសំណាក់អ្នកចូលរួមទាំងអស់ ដើម្បីប្រមូលធាតុចូលសំខាន់ៗយកទៅរៀបចំជាផែនការសកម្មភាពជាក់ស្តែង ក្នុងការជំរុញការងារបញ្ជ្រាបយេនឌ័រ និងលើកកម្ពស់តួនាទីភារកិច្ចស្ត្រីក្នុងភាពជាអ្នកដឹកនាំនៅរដ្ឋបាលថ្នាក់ក្រោមជាតិ ឱ្យកាន់តែមានប្រសិទ្ធភាព និងចីរភាព៕