សម្ដេចធិបតី ហ៊ុន ម៉ាណែត អញ្ជើញជាអធិបតីបើកការដ្ឋានគម្រោងគ្រប់គ្រងធនធានទឹកចម្រុះហ្វូណនតេជោកំណាត់ទី២

នៅព្រឹកថ្ងៃទី១១ ខែមេសា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីបើកការដ្ឋានគម្រោងគ្រប់គ្រងធនធានទឹកចម្រុះហ្វូណនតេជោកំណាត់ទី២ ប្រវែង១៥១,៦គីឡូម៉ែត្រ(ព្រែកពោធិ៍ ខេត្តកណ្ដាល-សមុទ្រ ខេត្តកែប។

គម្រោងគ្រប់គ្រងធនធានទឹកចម្រុះហ្វូណនតេជោ គឺជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជា ដើម្បីតភ្ជាប់ប្រព័ន្ធទន្លេមេគង្គ និងផ្លូវសមុទ្រ លើប្រវែងសរុប ១៧២.៦ គម បែងចែកជា ២កំណាត់ ដែលកំណាត់ទី១ មានប្រវែង ២១គីឡូម៉ែត្រ និងកំណាត់ទី២ មានប្រវែង ១៥១.៦ គីឡូម៉ែត្រ។

តម្រាយផ្លូវទឹកនេះ គឺនឹងត្រូវកសាងស្ទើរទាំងស្រុង លើតម្រាយខ្សែផ្លូវទឹកធម្មជាតិ និងផ្លូវទឹកបុរាណដែលបានបន្សល់ទុកស្រាប់ ហើយធ្លាប់បានប្រើប្រាស់តាំងពីអាណាចក្រហ្វូណនមកម៉្លេះ។

លក្ខណៈបច្ចេកទេសទូទៅរបស់ផ្លូវទឹក សម្រាប់កំណាត់ទី២៖ តាមការសិក្សា គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២នេះ មានប្រវែងប្រមាណ ១៥១.៦ គីឡូម៉ែត្រ ដោយឆ្លងកាត់ខេត្តចំនួន៤ រួមមាន៖ ខេត្តកណ្តាលប្រវែង៣៣គីឡូម៉ែត្រ ខេត្តតាកែវប្រវែង៥៣គីឡូម៉ែត្រ ខេត្តកំពតប្រវែង៤៨.៧គីឡូម៉ែត្រ ខេត្តកែបប្រវែង១៦.៩គីឡូម៉ែត្រ។

ផ្លូវទឹកនេះមានជម្រៅទឹកប្រមាណ ៤.៧ម៉ែត្រ ទទឹងផ្លូវទឹក៦០ម៉ែត្រ កាំកំណោងអប្បបរមា ៥៨០ម៉ែត្រ និងមានគន្លងនាវាចរណ៍ចំនួន ២គន្លង អាចចេញ-ចូល និងចៀសគ្នាបានដោយសុវត្ថិភាព សមស្របសម្រាប់ប្រភេទនាវាស្តង់ដាប្រទេសចិនអាចធ្វើនាវាចរណ៍បានក្នុងចំណុះផ្ទុក ៣០០០DWT នៅរដូវប្រាំង និង៥០០០DWT នៅរដូវវស្សា។

ទុនវិនិយោគដែលចាំបាច់សម្រាប់ការកសាងផ្លូវទឹកនេះ មានចំនួនប្រមាណ ១,១៧ ពាន់លានដុល្លារអាម៉េរិក ការសាងសង់ផ្លូវទឹកនេះនឹងមានរយៈពេលប្រមាណ ៣៦ខែ នឹងបញ្ចប់ការសាងសង់នៅឆ្នាំ២០២៨។

ការធ្វើនាវាចរណ៍តាមគម្រោងនេះ គឺមិនចាំបាច់ចូលចត និងឆ្លងកាត់ដោយស្វ័យប្រវត្តិ ព្រមទាំងមានបំពាក់នូវប្រព័ន្ធស្វយ័តប្រវត្តិកម្មសម្រាប់ការទូទាត់ប្រាក់ភ្លាមៗ៕