ឯកឧត្តម សួស ប្រាថ្នា អញ្ជើញធ្វើសេចក្ដីរាយការណ៍សង្ខេបស្ដីពីវឌ្ឍនភាពការងារប្រចាំឆមាសទី១ ឆ្នាំ២០២៥ស្ដីពីការពង្រឹងប្រសិទ្ធភាពការងារគ្រប់គ្រងរដ្ឋបាលដែនដី និងការអភិវឌ្ឍមូលដ្ឋាននៅរដ្ឋបាលថ្នាក់ក្រោមជាតិ ក្នុងកិច្ចប្រជុំអភិបាល នៃគណៈអភិបាលរាជធានី ខេត្ត ប្រចាំឆមាសទី១ ឆ្នាំ២០២៥

ភ្នំពេញ៖នៅថ្ងៃទី១៧ ខែកក្កដា ឆ្នាំ២០២៥នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានអញ្ជើញធ្វើសេចក្ដីរាយការណ៍សង្ខេបស្ដីពីវឌ្ឍនភាពការងារប្រចាំឆមាសទី១ ឆ្នាំ២០២៥ស្ដីពីការពង្រឹងប្រសិទ្ធភាពការងារគ្រប់គ្រងរដ្ឋបាលដែនដី និងការអភិវឌ្ឍមូលដ្ឋាននៅរដ្ឋបាលថ្នាក់ក្រោមជាតិ ក្នុងកិច្ចប្រជុំអភិបាល នៃគណៈអភិបាលរាជធានី ខេត្ត ប្រចាំឆមាសទី១ ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋន្រ្តីក្រសួងមហាផ្ទៃ នៅទីស្តីការក្រសួងមហាផ្ទៃ និងប្រព័ន្ធវីដេអូពីចម្ងាយ(ZOOM)។

កិច្ចប្រជុំនេះ មានការអញ្ជើញចូលរួមពីឯកឧត្តមសន្តិបណ្ឌិត រដ្ឋលេខាធិការប្រចាំការ ឯកឧត្តម រដ្ឋលេខាធិការ អនុរដ្ឋលេខាធិការ អគ្គនាយក តំណាងអង្គភាពពាក់ព័ន្ធចំណុះក្រសួងមហាផ្ទៃ និងឯកឧត្តម លោកជំទាវ អភិបាលនៃគណៈអភិបាលរាជធានី ខេត្ត ព្រមទាំងមន្រ្តីពាក់ព័ន្ធជាច្រើនរូប។

ក្នុងកិច្ចប្រជុំនេះ ឯកឧត្តម សួស ប្រាថ្នា បានធ្វើសេចក្ដីរាយការណ៍លើវឌ្ឍនភាពការងារសំខាន់ៗចំនួន២៨ផ្នែកធំៗដែលភាគច្រើនជាការងារគាំទ្រដល់រដ្ឋបាលថ្នាក់ក្រោមជាតិមានជាអាទិ៍៖ការរៀបចំក្របខ័ណ្ឌច្បាប់និងលិខិតបទដ្ឋានគតិយុត្ត, ការងារក្រុមប្រឹក្សា, ការងារបុគ្គលិក, ការងារក្រុមមេធាវីប្រចាំរាជធានី ខេត្ត, ការបង្កើត កែសម្រួល និងកំណត់ព្រំប្រទល់រដ្ឋបាល, ការសិក្សារៀបចំប្រព័ន្ធនិងរចនាសម្ព័ន្ធរដ្ឋបាលរាជធានី ខេត្ត, ការងារអន្តរាគមន៍និងដោះស្រាយវិវាទដីធ្លី, ការងារវិមជ្ឈការហិរញ្ញវត្ថុ និងការផ្ទេរមូលនិធិទៅឱ្យរដ្ឋបាលថ្នាក់ក្រោមជាតិ, ការងាររបបហិរញ្ញវត្ថុ និងការគ្រប់គ្រងទ្រព្យសម្បត្តិរបស់រដ្ឋបាលថ្នាក់ក្រោមជាតិ, ផែនការអភិវឌ្ឍន៍និងកម្មវិធីវិនិយោគបីឆ្នាំរំកិលរបស់រាជធានី ខេត្ត ក្រុង ស្រុក ខណ្ឌ និងរដ្ឋបាលឃុំ សង្កាត់, ការរៀបចំនិងការអនុវត្តគម្រោងប្រចាំឆ្នាំរបស់រាជធានី ខេត្ត ក្រុង ស្រុក ខណ្ឌ និងឃុំ សង្កាត់, ការអភិវឌ្ឍសេដ្ឋកិច្ចសង្គម និងការគាំទ្រអនុគណៈកម្មាធិការវិនិយោគរាជធានី ខេត្ត, ការងារផ្ដល់សេវាសាធារណៈ, ការងារសម្រុះសម្រួលដោះស្រាយបណ្ដឹងតាមយន្តការការិយាល័យប្រជាពលរដ្ឋ, ការផ្ទេរមុខងារនិងធនធាន, ការពង្រឹងនិងលើកកម្ពស់កិច្ចសហប្រតិបត្តិការអន្តរជាតិ និងការចងសម្ព័ន្ធមេត្រីភាព, ការលើកកម្ពស់ការគ្រប់គ្រងច្រកទ្វារព្រំដែន និងការអភិវឌ្ឍតំបន់ព្រំដែន, ការងារតាមដាន ត្រួតពិនិត្យ វាយតម្លៃ និងគាំទ្ររដ្ឋបាលថ្នាក់ក្រោមជាតិជាដើម។ ទន្ទឹមនេះ ឯកឧត្តម ក៏បានលើកឡើងអំពីបញ្ហាប្រឈមសំខាន់ៗ និងសំណើដំណោះស្រាយផងដែរ។