លោក ដូណាល់ ត្រាំ៖ កិច្ចខិតខំប្រឹងប្រែងដើម្បីបណ្តេញអ្នករស់នៅខុសច្បាប់ក្នុងសហរដ្ឋអាមេរិក ត្រូវតែពង្រីក

វ៉ាស៉ីនតោន៖  បេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៦ ខែមិថុនា ឆ្នាំ ២០២៥ ប្រធានាធិបតី លោក ដូណាល់ ត្រាំ បាននិយាយថា កិច្ចខិតខំប្រឹងប្រែងដើម្បីបណ្តេញអ្នករស់នៅខុសច្បាប់ ក្នុងសហរដ្ឋអាមេរិក ត្រូវតែពង្រីករួមទាំងពីទីក្រុង ដូចជា Los Angeles, Chicago និង New York ដែលកំពុងមានការតវ៉ាប្រឆាំងនឹងអាជ្ញាធរអន្តោប្រវេសន៍។

លោក ត្រាំ កំពុងអនុវត្តពាក្យសន្យាបណ្តេញជនអន្តោប្រវេសន៍ ដោយប្រើប្រាស់យុទ្ធសាស្ត្របង្ខំ ដែលបានធ្វើឱ្យលោកជាប់ឆ្នោតពីរលេីកជាប្រធានាធិបតីអាមេរិក។ តាមសេចក្តីរាយកាណ៍របស់ Reuters កាលពីថ្ងៃសៅរ៍ រដ្ឋបាលរបស់លោក បានដឹកនាំមន្ត្រីអន្តោប្រវេសន៍ដោយផ្ទាល់ ចុះទៅឆែកឆេរនៅតាមកសិដ្ឋាន សណ្ឋាគារភោជនីយដ្ឋាន និងរោងចក្រនានា។

លោក ត្រាំ បាន បញ្ជាក់តាមបណ្តាញសង្គម Truth Social ថា « ខ្ញុំបានដឹកនាំរដ្ឋបាល ទាំងមូលរបស់ខ្ញុំឱ្យដាក់ធនធាន ដែល អាច ធ្វើ ទៅបានបន្ថែមលេីកិច្ចប្រឹងប្រែងនេះ»។

លោក ត្រាំ មិនបានលម្អិតទេថាតើ លោក មានបំណងបង្កើនកិច្ចខិតខំប្រឹងប្រែង យ៉ាង ណានោះ។ ការអត្ថាធិប្បាយនេះកើតមានឡេីង បន្ទាប់ពីភាពតានតឹងមួយសប្តាហ៍នៅក្នុងទីក្រុង Los Angeles ជាកន្លែងដែលមានការដាក់ពង្រាយទ័ពឆ្មាំជាតិ និងទាហានម៉ារីនអាមេរិក ឱ្យទៅជួយរក្សាសន្តិភាព ហេីយខ្ទាស់នឹងអភិបាលរដ្ឋ California លោក Gavin Newsom៕