លោក ដូណាល់ ត្រាំ ជំរុញលោក ពូទីន ឱ្យទុកជីវិតឱ្យកងទ័ពអ៊ុយក្រែន ដែលរុស្ស៊ីកំពុងវាយរុញចេញពីតំបន់ Kursk

វ៉ាស៊ីនតោន៖ ប្រធានាធិបតីអាម៉េរិក លោក ដូណាល់ ត្រាំ បានជំរុញឱ្យមេដឹកនាំវិមានក្រឹមឡាំង លោក វ្ល៉ាឌីមៀ ពូទីន នៅថ្ងៃសុក្រទី១៤ ខែមីនា ឱ្យទុកជីវិតឱ្យកងទ័ពអ៊ុយក្រែន ដែលរុស្ស៊ីកំពុងវាយរុញចេញពីតំបន់ Kursk។ លោក ពូទីន ឆ្លើយថា លោកនឹងទុកជីវិតឱ្យពួកគេ ប្រសិនបើពួកគេទម្លាក់អាវុធចុះចាញ់។

លោក ត្រាំ បានបង្ហោះនៅលើប្រព័ន្ធផ្សព្វផ្សាយសង្គមបន្ទាប់ពីបេសកជនរបស់គាត់គឺលោក ស្ទីវ វិតខហ្វ (Steve Witkoff) បានជួបប្រជុំដ៏យូរមួយជាមួយលោក ពូទីន កាលពីយប់ថ្ងៃព្រហស្បតិ៍នៅរដ្ឋធានីមូស្គូ។ លោក ត្រាំ បានពិពណ៌នាកិច្ចប្រជុំនេះថាល្អណាស់ និងមានផ្លែផ្កា។

លោក ត្រាំ បាននិយាយថា៖«មានឱកាសដ៏ល្អដែលសង្រ្គាមបង្ហូរឈាមដ៏អាក្រក់នេះអាចឈានដល់ទីបញ្ចប់»។ លោកសំដៅលើសំណើបទឈប់បាញ់របស់សហរដ្ឋអាម៉េរិកដែលអ៊ុយក្រែនទទួលយកក្នុងសប្តាហ៍នេះ ហើយកំពុងស្ថិតក្រោមការពិចារណារបស់រុស្ស៊ី។

ប្រធានាធិបតីអាម៉េរិក បាននិយាយថា យោធារុស្ស៊ីបានឡោមព័ទ្ធទាហានអ៊ុយក្រែនរាប់ពាន់នាក់នៅក្នុងតំបន់ Kursk ដែលស្ថិតក្នុងស្ថានភាពអាក្រក់ និងងាយរងគ្រោះ។ បុរសចិត្តឆៅរូបនេះបានលើកឡើងថា៖«ខ្ញុំបានស្នើសុំយ៉ាងមុតមាំទៅកាន់ប្រធានាធិបតីពូទីន ឱ្យទុកជីវិតពួកគេ។ នេះអាចជាការសម្លាប់រង្គាលដ៏អាក្រក់មួយដែលមិនធ្លាប់មានតាំងពីសង្គ្រាមលោកលើកទីពីរ។ សូមព្រះប្រទានពរដល់ពួកគេទាំងអស់គ្នា»។

លោក ពូទីន បានចោទប្រកាន់កងទ័ពអ៊ុយក្រែនពីបទប្រព្រឹត្តឧក្រិដ្ឋកម្មប្រឆាំងនឹងជនស៊ីវិលនៅក្នុងតំបន់ Kursk ដែលជាអ្វីដែលរដ្ឋធានីកៀវបដិសេធ។ ប៉ុន្តែ ប្រធានាធិបតី រុស្ស៊ី បាន និយាយ ថា លោក យល់ ពី ការ អំពាវនាវ របស់ លោក ត្រាំ ឱ្យ គិតគូរ អំពី មនុស្សធម៌។ មេដឹកនាំរុស្ស៊ីរូបនេះបានបរិយាយបន្តថា៖«ក្នុងន័យនេះ ខ្ញុំចង់សង្កត់ធ្ងន់ថា ប្រសិនបើ (កងទ័ពអ៊ុយក្រែន) ដាក់អាវុធចុះចាញ់ ពួកគេនឹងត្រូវបានធានាជីវិត និងការព្យាបាលសមរម្យ ស្របតាមច្បាប់អន្តរជាតិ និងច្បាប់នៃសហព័ន្ធរុស្ស៊ី»។ទោះជាយ៉ាងណាក៏ដោយ យោធាអ៊ុយក្រែន បានអះអាងថា មិនមានការគំរាមកំហែងនៃការឡោមព័ទ្ធទេ ហើយកងទ័ពរបស់ខ្លួនកំពុងដកថយទៅកាន់ទីតាំងល្អប្រសើរជាងមុន៕