កម្ពុជា ប្តេជ្ញាបន្តចូលរួមជាមួយអង្គការកម្មសិទ្ធិបញ្ញាពិភពលោក និងសមាជិកដទៃទៀត ក្នុងការបន្តចូលរួមលើកកម្ពស់ កិច្ចសហប្រតិបត្តិការអន្តរជាតិពាក់ព័ន្ធកម្មសិទ្ធិបញ្ញា

ហ្សឺណែវ, ស្វីស៖ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានចូលរួមក្នុងកិច្ចប្រជុំគណៈកម្មការអន្តររដ្ឋាភិបាលដែលមានការចូលរួមពីប្រទេសប្រមាណ ៥០ចាប់ពីថ្ងៃទី៣ ដល់ថ្ងៃទី៧ ខែមីនា ឆ្នាំ ២០២៥ ។

កិច្ចប្រជុំនេះត្រូវបានរៀបចំឡើងដោយ អង្គការកម្មសិទ្ធិបញ្ញាពិភពលោក ក្នុងគោលបំណងចែករំលែកឧត្តមានុវត្តន៍នៃកិច្ចការពារកម្មសិទ្ធិបញ្ញា និងធនធានពិន្ទុ ចំណេះដឹង ប្រពៃណី និងវិញ្ញត្តិវប្បធម៌ និង បន្តការពិភាក្សាលើសេចក្តីពា្រងលិខិតូបករណ៍អន្ដរជាតិ ស្តីពី កិច្ចការពារធនធានពិន្ទុ ចំណេះដឹង ប្រពៃណី និងវិញ្ញត្តិវប្បធម៌។

ក្នុងឱកាសនោះ ឯកឧត្តមរដ្ឋលេខាធិការ បានថ្លែងអំណរគុណដល់ អង្គការកម្មសិទ្ធិបញ្ញាពិភពលោក ដែលបានយកចិត្តដាក់ខ្ពស់ក្នុងការបន្តអភិវឌ្ឍន៍ប្រព័ន្ធកម្មសិទ្ធិបញ្ញា ដើម្បីធានាឱ្យបានការផ្តល់អត្ថប្រយោជន៍ប្រកបដោយបរិយាបន្ន ជាពិសេសការគិតគូរទៅដល់ កម្មសិទ្ធិបញ្ញា របស់ជនជាតិដើមភាគតិច។

ឯកឧត្តមបានបន្តថា ធនធានពិន្ទុ ចំណេះដឹង ប្រពៃណី និងវិញ្ញត្តិវប្បធម៌ មិនគួរត្រូវបានទទួលរងនូវការកេងប្រវ័ញ្ច ការក្លែងបន្លំ ឬការប្រើប្រាស់ក្នុងគោលបំណងពាណិជ្ជកម្មដោយគ្មានការអនុញ្ញាតពីសហគមន៍ដែលជាម្ចាស់កម្មសិទ្ធិនោះឡើយ។

ជាមួយគ្នានេះ ឯកឧត្តមរដ្ឋលេខាធិការ បានបង្ហាញនូវការប្តេជ្ញាចិត្តរបស់កម្ពុជាក្នុងការបន្តចូលរួមជាមួយអង្គការកម្មសិទ្ធិបញ្ញាពិភពលោក និងសមាជិកដទៃទៀតក្នុងការបន្តចូលរួមលើកកម្ពស់កិច្ចសហប្រតិបត្តិការអន្តរជាតិពាក់ព័ន្ធកម្មសិទ្ធិបញ្ញា។

សូមបញ្ជាក់ផងដែរថា៖ លិខិតូបករណ៍អន្ដរជាតិ ស្តីពី កិច្ចការពារធនធានពិន្ទុ ចំណេះដឹងប្រពៃណី និងវិញ្ញត្តិវប្បធម៌វប្បធម៌នឹងផ្តល់កិច្ចការពារកម្មសិទ្ធិបញ្ញារបស់សហគមន៍ជនជាតិដើមភាគតិច ដើម្បីធានាឱ្យបាននូវការផ្តល់អត្ថប្រយោជន៍ជាអតិបរមា និងថែរក្សាសម្បត្តិវប្បធម៌ អត្តសញ្ញាណ ចំណេះធ្វើទំនៀមទម្លាប់ និងប្រពៃណីរបស់សហគមន៍ជនជាតិដើមភាគតិច ៕