រដ្ឋបាលខេត្តកំពង់ឆ្នាំង បើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅអនុវត្តការងារបន្ត របស់ក្រុមការងារចុះមូលដ្ឋានខេត្ត

ភ្នំពេញ៖ នាព្រឹកថ្ងៃទី៨ ខែមករា ឆ្នាំ២០២៥ រដ្ឋបាលខេត្តកំពង់ឆ្នាំង បានបើកកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅអនុវត្តការងារបន្តឆ្នាំ២០២៥ របស់ក្រុមការងារចុះមូលដ្ឋានខេត្តកំពង់ឆ្នាំង ក្រោមអធិបតីភាពឯកឧត្តមមណ្ឌិតសភាចារ្យអ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមប្រឹក្សាស្តារ អភិវឌ្ឍន៍ វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង។

បន្ទាប់ពីស្តាប់របាយការណ៍លម្អិតស្តីពីលទ្ធផលសម្រេចបានក្នុងរយៈពេល១ឆ្នាំកន្លងមក របស់ក្រុមការងារចុះមូលដ្ឋាន ខេត្តកំពង់ឆ្នាំង និងរាយការណ៍ផ្ទាល់ដោយ ឯកឧត្តម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពខេត្ត រួចមក ឯកឧត្តមទេសរដ្ឋមន្ត្រី អ៊ុក រ៉ាប៊ុន បានថ្លែងកោតសរសើរចំពោះការខិតខំប្រឹងប្រែងដោយយកចិត្តទុកដាក់របស់ថ្នាក់ដឹកនាំគ្រប់កម្រិតតាមលំដាប់ថ្នាក់ ក្នុងកិច្ចការងារចាំបាច់ សម្រាប់រកដំណោះស្រាយ រាល់បញ្ហាប្រឈមរបស់ប្រជាពលរដ្ឋ នៅតាមមូលដ្ឋាន បណ្តាក្រុង/ស្រុក។

ជាមួយគ្នានេះ ឯកឧត្តមទេសរដ្ឋមន្ត្រី អ៊ុក រ៉ាប៊ុន បានណែនាំជូនថ្នាក់ដឹកនាំគ្រប់លំដាប់ថ្នាក់ ថាភារកិច្ចជាអាទិភាពរបស់ក្រុមការងារគឺផ្ដោតលើមូលដ្ឋានសំខាន់ចំនួន ក្នុងនោះការដោះស្រាយបញ្ហាសេដ្ឋកិច្ចរបស់ប្រជាជនពាក់ព័ន្ធនឹងជីវភាពរស់នៅប្រចាំថ្ងៃ, ប្រាក់ចំណូល, ការងារ, ការប្រកបអាជីវកម្ម និងមុខរបរផ្សេងៗ ដោយរួមទាំងការធ្វើកសិកម្ម និងវិស័យផ្សេងទៀតក្រៅពីកសិកម្ម, ការបង្កើនគុណភាព និងប្រសិទ្ធភាព នៃសេវាសាធារណៈគ្រប់ប្រភេទ ដូចជា សេវាសន្តិសុខសណ្តាប់ធ្នាប់, សេវាយុត្តិធម៌, សេវាអប់រំ, សុខាភិបាល, រដ្ឋបាល និងសេវាពាក់ព័ន្ធអាជីវកម្ម, ធុរកិច្ច និងប្រព័ន្ធសង្គម ព្រមទាំងបន្តដោះស្រាយបញ្ហាសមធម៌យុត្តិធម៌សង្គម។ ការកសាង និងពង្រឹងការដឹកនាំនៅគ្រប់ថ្នាក់, ការធ្វើជាគំរូល្អ និងការរៀបចំប្រព័ន្ធការងារ និងរបៀបរបបការងារ ទាំងបរិមាណនិងគុណភាព ដោយផ្តោតជាពិសេសលើការដោះស្រាយវិវាទដីធ្លីជូនប្រជាពលរដ្ឋប្រកបដោយ តម្លាភាព សុក្រឹតភាព ស្របតាមគោលការច្បាប់ និងនយោបាយឈ្នះៗរបស់ប្រមុខជារដ្ឋាភិបាល។

លើសពីនេះក្នុងគោលដៅរួមគ្នាសម្រេចឱ្យបាននូវចក្ខុវិស័យរបស់សម្តេចតេជោ ហ៊ុន សែន អតីតនាយករដ្ឋមន្ត្រីនិងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាពេលបច្ចុប្បន្ន ដែលបានដាក់ចេញនូវផែនការសកម្មភាពជាយុទ្ធសាស្ត្រសម្រាប់អនុវត្តបន្តនៅឆ្នាំ២០២៥ ដោយបានស្នើឱ្យថ្នាក់ដឹកនាំគ្រប់លំដាប់ថ្នាក់ បន្តរួមកម្លាំងគ្នាជាកម្លាំងសរុប និងជាតួអង្គតែមួយ ដែលមានសាមគ្គីភាព និងឯកភាពផ្ទៃក្នុងរឹងមាំប្រកបដោយថាមវន្ត ហើយចូលរួមគិត រួមធ្វើ និងរួមទទួលខុសត្រូវ តាមកម្មវិធីនយោបាយ គោលការណ៍ គោលនយោបាយ ដោយភាពទទួលខុសត្រូវ និងមានប្រសិទ្ធភាពខ្ពស់ ៕