ភ្នំពេញ៖ ថ្នាំញៀនប្រភេទមេតំហ្វេតាមីនចំនួន ៤០ម៉ឺនគ្រាប់ ដែលបម្រុងដឹកចូលទឹកដីកម្ពុជា ត្រូវបានតម្រួតថៃរឹបអូសបាន ខណៈអ្នកអូសរទេះម្នាក់ជាជនជាតិខ្មែរ ត្រូវបានឃាត់ខ្លួនដើម្បីសាកសួរព័ត៌មាន ។ ហេតុការណ៍នេះ បានបង្កការភ្ញាក់ផ្អើល កាលពីព្រឹកថ្ងៃទី៣ ខែកញ្ញា ឆ្នាំ២០២៤ នៅចំណុច្រកទ្វារព្រំដែនអន្តរជាតិក្លងលឹក ខេត្តស្រះកែវ ប្រទេសថៃ។
បើតាមការបញ្ជាក់ពីកម្មករអូសរទេះ នៅច្រកទ្វារព្រំដែនអន្តរជាតិប៉ោយប៉ែត-ក្លងលឹក បានឱ្យដឹងថា មុនដំបូងមានបុរសជនជាតិថៃម្នាក់ បើកឡានមកចតនៅចំណតក្បែរច្រកទ្វារអន្តរជាតិក្លងលឹកខាងភាគីថៃ បានទម្លាក់វ៉ាលីចំនួន៣ រួចជនជាតិថៃម្នាក់នោះ បានប្រាប់ឱ្យជនជាតិខ្មែរដែលជាកម្មករអូសរទេះ ឱ្យដឹកអីវ៉ាន់របស់ខ្លួនយកឆ្លងតាមច្រកទ្វារអន្តរជាតិប៉ោយប៉ែត បំណងចូលមកក្រុងប៉ោយប៉ែត ប្រទេសកម្ពុជា។
ប្រភពដដែលបានឱ្យដឹងទៀតថា នៅពេលលើកវ៉ាលីធ្ងន់ពេកលើកដាក់រទេះមិនរួច ក៏ហៅគ្នាមកជួយលើក ដោយមានការសង្ស័យថា វ៉ាលីធ្ងន់ខុសពីធម្មតា ក៏បើកមើលស្រាប់តែឃើញកញ្ចប់សង្ស័យគ្រឿងញៀន ទើបរាយការណ៍ប្រាប់តម្រួតថៃ ដើម្បីត្រួតពីនិត្យរកឃើញគ្រឿងញៀនប្រភេទ មេតំហ្វេតាមីនចំនួន៣វ៉ាលី។ ចំណែកជនជាតិថៃដែលជួលឱ្យកម្មករខ្មែរអូសរទេះនោះ បានដើរឆ្លងចូលមកខាងទឹកដីកម្ពុជាមុនបាត់ស្រមោលតែម្ដង។
ដោយឡែក យោងតាមការឱ្យដឹងពីសមត្ថកិច្ចថៃ បញ្ជាក់ថា ថ្នាំញៀនប្រភេទ យ៉ាបា ឬមេតំហ្វេតាមីន បម្រុងនាំចូលមកកម្ពុជានោះ មានទម្ងន់២០០គីឡូក្រាមស្មើ៤០ម៉ឺនគ្រាប់ ខណៈកម្លាំងជំនាញថៃកំពុងសួរនាំកម្មករអូសរទេះ និងត្រួតពិនិត្យមើលកាមេរ៉ាសុវត្ថិភាព ដើម្បីស្រាវជ្រាវកំណត់អត្តសញ្ញាណជនសង្ស័យ ដើម្បីតាមចាប់ខ្លួនមកអនុវត្តច្បាប់។
