លោកជំទាវនាយឧត្ដមសេនីយ៍ ដាំ ដារីនី ជួបសំណេះសំណាល និងសាកសួរសុខទុក្ខ កងទ័ពនិងគ្រួសារ នៅទិសប្រាសាទតាក្របី

ភ្នំពេញ៖ នៅរសៀល ថ្ងៃទី២៩ ខែកក្កដា ឆ្នាំ២០២៤ លោកវរសេនីយ៍ឯក ប៊ូ បោន មេបញ្ជាការរង ប្រចាំទិសប្រាសាទតាក្របី តំណាងឯកឧត្ដម មេបញ្ជាការ តំបន់ប្រតិបត្តិការសឹករងឧត្ដរមានជ័យ បានដឹកនាំកម្លាំងទទួលបដិសណ្ឋារកិច្ច លោកជំទាវ នាយឧត្ដមសេនីយ៍ ដាំ ដារីនី រដ្ឋលេខាធិការ ក្រសួងការពារជាតិ និងប្រតិភូអមដំណើរ ក្នុងឱកាសអញ្ជើញជួបសំណេះសំណាល និងសាកសួរសុខទុក្ខ កងទ័ព និងគ្រួសារកងទ័ពដែលឈរជើងការពារតាមខ្សែបន្ទាត់ ព្រំដែនកម្ពុជា-ថៃ ទិសប្រាសាទតាក្របី។

ក្នុងឱកាសដ៏ថ្លៃថ្លានោះ លោកជំទាវនាយឧត្ដមសេនីយ៍ ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខរបស់ សម្ដេចតេជោ ហ៊ុន សែន ប្រធានព្រឹទ្ធសភា សម្ដេច មហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងឯកឧត្ដម ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ជូនដល់កងទ័ព និងគ្រួសារទ័ព ដែលបានលះបង់កម្លាំងកាយចិត្ត ប្ដេជ្ញាការពារ បុព្វហេតុជាតិ អធិបតេយ្យភាព បូរណភាពទឹកដីនិងរក្សាបាននូវសុខសន្ដិភាព ជូនជាតិ មាតុភូមិ។

ទន្ទឹមនឹងនោះដែរ លោកជំទាវ នាយឧត្ដមសេនីយ៍ ក៏បានជូនពរដល់កងទ័ព និងគ្រួសារទ័ព សូមឱ្យមានសុខភាពល្អ ព្រមទាំងឧបត្ថម្ភនូវសម្ភារៈ និងថវិកាមួយចំនួនផងដែរ៕