ខេត្តបាត់ដំបង ការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ មានអង្គបោះឆ្នោត៨២៣នាក់ និងមាន១មណ្ឌល ១៣ការិយាល័យ ខណៈដំណើរការបោះឆ្នោតប្រព្រឹត្តទៅដោយរលូន

ភ្នំពេញ៖ នៅទូទាំងខេត្តបាត់ដំបង ការបោះឆ្នោតជ្រើសតាំងក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក អាណត្តិទី៤ ឆ្នាំ២០២៤ មានអង្គបោះឆ្នោត៨២៣នាក់ និងមាន១មណ្ឌល ១៣ការិយាល័យ ខណៈដំណើរការបានប្រព្រឹត្តទៅដោយរលូន និងមានសណ្តាប់ធ្នាប់ល្អ ចាប់ពីវេលាម៉ោង៧៖០០នាទីព្រឹកថ្ងៃទី២៦ ខែឧសភា ឆ្នាំ២០២៤។

សមាជិក សមាជិកាអង្គបោះឆ្នោតបានឈរតម្រង់ជួរតាមលេខរៀងដែលគណៈ កម្មការរៀបចំការបោះឆ្នោតបានកំណត់ជាបន្តបន្ទាប់ ក្នុងនោះការអនុញ្ញាតឲ្យចូលគឺចាប់លេខរៀង។

ដោយឡែក អង្គបោះឆ្នោតជាស្ត្រីមានផ្ទៃពោះ ជាអ្នកជំងឺឬពិការ គឺគណៈកម្មការរៀបចំការបោះ ឆ្នោតបានអនុញ្ញាតឲ្យចូលមុនដោយមិនបានចាប់លេខរៀងនោះទេ។ ចំពោះសន្តិសុខសណ្ដាប់ធ្នាប់វិញ គឺមានលក្ខណៈល្អប្រសើរមិនមានអ្វីគួរឲ្យកត់សម្គាល់នោះទេ។

លោក សុខ ហ៊ីង ប្រធានគណកម្មការខេត្តរៀបចំការបោះឆ្នោត បានឲ្យដឹងថា អង្គបោះឆ្នោតមាន៨២៣នាក់ទូទាំងខេត្តបាត់ដំបង ក្នុងនោះមាន១៤ការិយាល័យ ១០៣ឃុំ-សង្កាត់ ឆ្នោតក្រុមប្រឹក្សាខេត្តមានមណ្ឌលខេត្តបេក្ខជន២៧អាសន: ក្រុង-ស្រុក២៦០អាសន: និងគណបក្សនយោបាយចំនួន៥ ក្នុងនោះមាន៖ លេខរៀងទី១ គណបក្សប្រជាជនកម្ពុជា, លេខរៀងទី២ គណបក្សឆន្ទៈខ្មែរ, លេខរៀងទី៣ គណបក្សកម្លាំងជាតិ, លេខរៀង៤ គណបក្សហ្វ៊ុនស៊ិនប៉ិច និងលេខរៀងទី៥ គណបក្សខ្មែររួបរួមជាតិ។

ដោយឡែក នៅក្រុងបាត់ដំបងការិយាល័យ១ មាន១០សង្កាត់ ២១អាសន: មានអង្គបោះឆ្នោត១០០នាក់ផងដែរ ៕