ឯកឧត្តម ហ្សង់ ហ្រ្វង់ស្វ័រ តាន់៖ អត់ឃើញមានបាតុកម្មប្រឆាំងសម្តេចធិបតីនោះទេ រយៈពេលបំពេញទស្សនកិច្ចនៅកូរ៉េ ៤ថ្ងៃនេះ

ភ្នំពេញ៖ ឯកឧត្តម ហ្សង់ ហ្រ្វង់ស្វ័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានបញ្ជាក់ថា រយៈពេល៤ថ្ងៃ ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី រួមទាំងគណៈប្រតិភូ អញ្ជើញទៅបំពេញទស្សនកិច្ចនៅប្រទេសកូរ៉េខាងត្បូង គឺមិនឃើញមានបាតុកម្មប្រឆាំងនឹងសម្តេចនោះទេ។

ឯកឧត្តម ហ្សង់ ហ្រ្វង់ស្វ័រ តាន់ បានបញ្ជាក់បែបនេះ នារាត្រីថ្ងៃទី១៨ ខែឧសភា ឆ្នាំ២០២៤ នៅក្នុងសន្និសីទសារព័ត៌មានស្តីពី ដំណើរអញ្ជើញទស្សនកិច្ចផ្លូវការ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅសាធារណរដ្ឋកូរ៉េ រយៈពេល៤ថ្ងៃ។

ឯកឧត្តម ហ្សង់ ហ្រ្វង់ស្វ័រ តាន់ បានបញ្ជាក់ថា ឥទ្ធិពលរបស់គណៈបក្សប្រឆាំង ពិសេសនៅក្រៅប្រទេសបានកំពុងបន្តថមថយហើយដូចជាអំបិលត្រូវទឹក នេះជាការពិតហើយយើងត្រូវហ៊ានទទួលស្គាល់ ទោះបីគេមិនទទួលស្គាល់ តែយើងត្រូវតែហ៊ានទទួលស្គាល់។

ឯកឧត្តម ហ្សង់ ហ្រ្វង់ស្វ័រ តាន់ ថ្លែងថា តាមខ្ញុំដឹងពួកគាត់គ្រោងធ្វើបាតុកម្ម ប៉ុន្តែមកទល់ពេលនេះមិនទាន់ឃើញមានទេរូបរាងនៃបាតុកម្ម ខ្ញុំដឹងលឺថាពួកគាត់ចង់ធ្វើបាតុកម្មនៅថ្ងៃទី១៥ ខែឧសភា ពេលដែលសម្តេចធិបតី និងគណៈប្រតិភូដាក់ជើងជាន់លើដីសេអ៉ូល ប្រទេសកូរ៉េខាងត្បូង ប៉ុន្តែនៅទីបំផុតអត់មានទេ ព្រោះនៅថ្ងៃនោះភ្លៀង នៅថ្ងៃទី១៦ ថ្ងៃទី១៧ និងថ្ងៃទី១៨ ក៏មិនមានឃើញធ្វើបាតុកម្មដែរ។

ឯកឧត្តមក៏បានបញ្ជាក់ដែរថា ការដែលសម្តេចមហាបវរធិបតី ហ៊ុន ម៉ាណែត និងគណៈប្រតិភូត្រឡប់មកប្រទេសកម្ពុជាមុនពេលនេះដែរ ក៏មិនមែនខ្លាចពួកគេធ្វើបាតុកម្មនោះដែរ គឺដោយសារតែចប់អស់កម្មវិធី។

ឯកឧត្តម ហ្សង់ ហ្រ្វង់ស្វ័រ តាន់ បានអះអាងថា ជារួមគណបក្សប្រឆាំងនៅក្រៅប្រទេសនៅពេលនេះ កំពុងតែថមថយឥទ្ធិពល ថមថយកម្លាំងអស់ហើយ ៕