ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងឱ្យដឹងថា សម្ដេច នឹងអញ្ជើញបំពេញទស្សនកិច្ចនៅប្រទេសកូរ៉េខាងត្បូងនៅសប្ដាហ៍ក្រោយ ។
ក្នុងឱកាសអញ្ជើញប្រកាសបើកឱ្យដំណើរការជាផ្លូវការ សមាគមសហព័ន្ធអ្នកវិនិយោគកម្ពុជា និងពិសាភោជនាហារសាមគ្គី នាថ្ងៃទី៩ ខែឧសភា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា ក្រោមការដឹកនាំរបស់រាជរដ្ឋាភិបាលកម្ពុជាអាណត្តិថ្មី នីតិកាលទី៧នៃរដ្ឋសភា ក្នុងរយៈពេល ៨ខែមកនេះ សម្តេចបានដើរកៀរគរ អ្នកវិនិយោគបរទេស ឱ្យមកធ្វើការវិនិយោគនៅកម្ពុជា។
សម្ដេចធិបតី បញ្ជាក់ថា «សប្ដាហ៍ក្រោយខ្ញុំ ទៅកូរ៉េខាងត្បូង នឹងមានការជួបវិស័យឯកជននៅទីនោះ។ ខែក្រោយខ្ញុំ ទៅសាំងហ្គាពួរ (សិង្ហបុរី) ទស្សនកិច្ចផ្លូវការ ក៏នឹងបន្ដទាក់ទាញអ្នកវិនិយោគបន្ដទៀត»។
សម្ដេចធិបតី បន្ថែមថា ការជំរុញ និងទាក់ទាញអ្នកវិនិយោគបរទេស គឺជាអាទិភាពមុតស្រួចនៃនយោបាយការទូតសេដ្ឋកិច្ចរបស់រាជរដ្ឋាភិបាលកម្ពុជាក្នុងអាណត្តិថ្មីនេះ៕
