អគារសិក្សា ថ្នាក់សមាហរណកម្ម សម្រាប់សិស្សមានពិការភាពសតិបញ្ញា និងអូទីស្សឹម នៅក្នុងក្រុងកំពង់ឆ្នាំង ត្រូវបានសម្ពោធដាក់ឲ្យប្រើប្រាស់ជាផ្លូវការ
ភ្នំពេញ៖ ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា នាថ្ងៃទី២៥ ខែមេសា ឆ្នាំ២០២៤ បានអញ្ជើញជាអធិបតីក្នុងពិធីសម្ពោធអគារសិក្សាថ្នាក់សមាហរណកម្មសម្រាប់សិស្សមានពិការភាពសតិបញ្ញា និងអូទីស្សឹម នៅក្នុងបរិវេណសាលា បឋមសិក្សាខ្សាមមារ្ស ច័ន្ទលាភ ក្រុងកំពង់ឆ្នាំង ដោយមានការអញ្ជើញចូលរួមជាគណៈធិបតីផងដែរពី លោក ស៊ឹម ប្រឹម ប្រធានមន្ទីរអប់រំ យុវជន និងកីឡាខេត្ត លោក ទេព ច័ន្ទពិសិដ្ឋ អភិបាលព្រះសហគមន៍កាតូលិកភូមិភាគបាត់ដំបង អាជ្ញាធរមូលដ្ឋាន លោកគ្រូ អ្នកគ្រូ សប្បុរសជន អ្នកអាណាព្យាបាល និងសិស្សានុសិស្សជាច្រើនរូបទៀត។
អគារសិក្សាថ្នាក់សមាហរណកម្ម ១ខ្នង ស្មើ ៥បន្ទប់នេះ បានរៀបចំកែសម្រួល និងបំពាក់សម្ភារៈសិក្សាដោយអង្គការករុណាបាត់ដំបង សហការណ៍ជាមួយមន្ទីរអប់រំ យុវជន និងកីឡា ខេត្តកំពង់ឆ្នាំង និងសហគមន៍ សម្រាប់បម្រើជាឧត្តមប្រយោជន៍ដល់សិស្សានុសិស្សមានពិការភាពសតិបញ្ញា និងអូទីស្សឹមនៅក្នុងក្រុងកំពង់ឆ្នាំង ដើម្បីឱ្យពួកគេទទួលបានការអប់រំពេញមួយជីវិតប្រកបដោយគុណភាព បរិយាបន្ន និងសមធម៌។
ជាពិសេសជួយបណ្ដុះការអប់រំដល់យុវ?ជនស្ថិតក្នុងសេចក្ដីត្រូវការពិសេសឱ្យមានវិជ្ជាសម្បទា បំណិនសម្បទា និងចរិយាសម្បទា ដើម្បីចូលរួមអភិវឌ្ឍសង្គមជាតិ។
