រដ្ឋលេខាធិការក្រសួងអប់រំ បើកវគ្គបណ្ដុះបណ្ដាលស្ដីពី “ការប្រើប្រាស់ថ្នាលអប់រំសាលាឌីជីថល និង OER សម្រាប់ការបង្រៀន និងរៀន”
ភ្នំពេញ៖ នាថ្ងៃទី២៩ ខែមីនា ឆ្នាំ២០២៤ នាយកដ្ឋានបច្ចេកវិទ្យាព័ត៌មាន នៃក្រសួងអប់រំ យុវជន និងកីឡា បានរៀបចំកម្មវិធីបើកវគ្គបណ្ដុះបណ្ដាលស្ដីពី ការប្រើប្រាស់ថ្នាលអប់រំសាលាឌីជីថល និង OER សម្រាប់ការបង្រៀន និងរៀន ជូនដល់គ្រូបង្រៀន នៃវិទ្យាល័យភ្នំស្រុក ខេត្តបន្ទាយមានជ័យ ក្រោមអធិបតីភាព ឯកឧត្ដម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា ដោយមានការចូលរួមពី លោក សុក ថា ប្រធាននាយកដ្ឋានបច្ចេកវិទ្យាព័ត៌មាន លោកនាយក លោកនាយករង និងលោកគ្រូ អ្នកគ្រូ នៃវិទ្យាល័យភ្នំស្រុក ដែលមានសិក្ខាកាមចូលរួមសរុបចំនួន២០រូប។
វគ្គបណ្ដុះបណ្ដាលនេះរៀបចំឡើងក្រោមគម្រោងធនធានអប់រំបើកទូលាយ និងបំណិនឌីជីថល ក្រោមជំនួយរបស់ សេវាកម្មអភិវឌ្ឍន៍លីចតេនស្ទីន (LED) ដែលជាទីភ្នាក់ងារម្ចាស់ជំនួយទ្វេភាគីផ្លូវការនៃប្រទេសលីចតេនស្ទីន (Principality of Liechtenstein) ។
ថ្លែងសន្ទរកថាក្នុងពិធីបើកវគ្គបណ្ដុះបណ្ដាល ឯកឧត្ដម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា និងជាប្រធានក្រុមការងារថ្នាក់ជាតិ ចុះជួយស្រុកភ្នំស្រុក បានផ្ដាំផ្ញើឱ្យលោកគ្រូ អ្នកគ្រូ ដែលជាសិក្ខាកាមយកចិត្តទុកដាក់ចូលរួមក្នុងវគ្គបណ្ដុះបណ្ដាល និងយកចំណេះដឹងដែលទទួលបានក្នុងវគ្គបណ្ដុះបណ្ដាលនេះយកទៅផ្សព្វផ្សាយបន្តជូនដល់គ្រូបង្រៀន និងសិស្សានុសិស្សនៅក្នុងវិទ្យាល័យភ្នំស្រុក ចូលរួមប្រើប្រាស់ថ្នាលអប់រំសាលាឌីជីថល សម្រាប់ស្វ័យសិក្សា សិក្សាស្រាវជ្រាវ និងស្វែងរកឯកសារដ៏សំបូរបែប ដែលជាផ្នែកមួយនៃការបណ្ដុះបំណិនក្នុងប្រើប្រាស់បច្ចេកវិទ្យាព័ត៌មានឱ្យបានត្រឹមត្រូវ និងមានប្រយោជន៍។
ក្រោយពេលចប់វគ្គបណ្ដុះបណ្ដាលលោកគ្រូ អ្នកគ្រូ ដែលជាសិក្ខាកាមនៃវិទ្យាល័យភ្នំស្រុក នឹងមានលទ្ធភាពចែករំលែក នូវកិច្ចតែងការបង្រៀន ឯកសារបង្រៀន សម្ភារៈឧបទេសឌីជីថល និងឯកសារផ្សេងៗទៀត ដែលបម្រើដល់ការបង្រៀន និងរៀន ទៅក្នុងថ្នាលអប់រំសាលាឌីជីថល សម្រាប់អ្នកអប់រំ សិស្សានុសិស្ស និងសាធារណជនទូទៅ ធ្វើការសិក្សាស្រាវជ្រាវនៅទូទាំងប្រទេស៕
