ការវាយប្រហារដោយកាំជ្រួចមីស៊ីលបាលីស្ទីករបស់រុស្ស៊ីលើក្រុងគៀវ បណ្ដាលឲ្យមនុស្សរបួស ៥៣នាក់

បរទេស៖ រុស្សីបានបាញ់កាំជ្រួចមីស៊ីលផ្លោងលើទីក្រុង Kyiv ពេញមួយយប់ បើយោងតាមកងទ័ពអាកាសអ៊ុយក្រែន ដែលបានរាយការណ៍ថា ខ្លួនបានបាញ់ទម្លាក់មីស៊ីលរុស្សីចូលទាំង ១០ គ្រាប់ ប៉ុន្តែកម្ទេចកម្ទីដែលធ្លាក់បានធ្វើឱ្យមនុស្សយ៉ាងហោចណាស់ ៥០ នាក់រងរបួស។

យោងតាមរដ្ឋបាលទីក្រុង Kyiv បានឱ្យដឹងថា មនុស្សសរុបចំនួន ៥៣ នាក់បានរងរបួស រួមទាំងកុមារចំនួន ៦ នាក់ផងដែរ។ អភិបាលក្រុង Kyiv លោក Vitaliy Klitschko បានឲ្យដឹងថា អ្នករងរបួសចំនួន ៤៥នាក់ បានស្ថិតនៅក្នុងសង្កាត់ Dnipro នៃទីក្រុង។ ក្នុងនោះ ១៨ នាក់ត្រូវបានបញ្ជូនទៅមន្ទីរពេទ្យ ក្នុងនោះមានកុមារពីរនាក់ផងដែរ។ គ្មានការស្លាប់ត្រូវបានគេរាយការណ៍ទេ។

ផ្ទះមួយខ្នងនៅសង្កាត់ Holosiivskyi នៃទីក្រុងត្រូវបានគេរាយការណ៍ថាបានឆាបឆេះបន្ទាប់ពីរងការវាយប្រហារដោយកំទេចកំទី។ នៅក្នុងសង្កាត់ Desnianskyi ជាន់ទីប្រាំពីរនៃអគារលំនៅដ្ឋានប្រាំបួនជាន់ក៏បានឆេះផងដែរ។ រលកឆក់ចេញពីកាំជ្រួចបាញ់ទម្លាក់មួយគ្រាប់ តាមសេចក្តីរាយការណ៍ បានបំផ្ទុះបង្អួចនៅក្នុងអគារលំនៅដ្ឋានចំនួនពីរ និងមន្ទីរពេទ្យមួយក្នុងសង្កាត់ Dnipro។

ថ្លែងមតិលើការវាយប្រហារពីទីក្រុងវ៉ាស៊ីនតោន ឌីស៊ី ប្រធានាធិបតីអ៊ុយក្រែន លោក Volodymyr Zelensky បានឲ្យដឹងថា ប្រទេសរុស្ស៊ី បានអះអាងជាថ្មីម្តងទៀតនូវចំណងជើងរបស់ខ្លួនថាជាប្រទេសដ៏អាម៉ាស់ ដែលបាញ់មីស៊ីលនៅពេលយប់ ដោយវាយលុកតំបន់លំនៅដ្ឋាន សាលាមត្តេយ្យ និងកន្លែងថាមពលក្នុងរដូវរងា។

ប្រភព៖ Novayagazeta

ប្រែសម្រួលដោយ៖ ឡាយ លីហួ