សេអ៊ូល៖ ទីភ្នាក់ងារសារព័ត៌មានរដ្ឋ បានឲ្យដឹងកាលពីថ្ងៃអាទិត្យថា ប្រទេសកូរ៉េខាងជើងបានចាប់ផ្តើមប្រតិបត្តិការផ្កាយរណបឈ្លបយកការណ៍ បន្ទាប់ពីប្រទេសនេះបានបាញ់បង្ហោះផ្កាយរណបចារកម្មយោធាលើកដំបូងរបស់ខ្លួនកាលពីខែមុន ក្នុងសកម្មភាពដែលទាក់ទាញទណ្ឌកម្មថ្មីពីសហរដ្ឋអាមេរិក និងសម្ព័ន្ធមិត្តរបស់ខ្លួន។
KCNA បានលើកឡើងថា ការិយាល័យប្រតិបត្តិការផ្កាយរណបថ្មីនៅមជ្ឈមណ្ឌលគ្រប់គ្រងទូទៅទីក្រុងព្យុងយ៉ាងនៃរដ្ឋបាលបច្ចេកវិទ្យាអវកាសជាតិ (NATA) បានចាប់ផ្តើមបេសកកម្មរបស់ខ្លួនកាលពីថ្ងៃសៅរ៍ ហើយនឹងរាយការណ៍ព័ត៌មានដែលទទួលបានទៅកាន់ការិយាល័យឈ្លបយកការណ៍នៅកងទ័ព និងអង្គភាពសំខាន់ៗផ្សេងទៀត។
កូរ៉េខាងជើងបញ្ជាក់ថា ខ្លួនបានបាញ់បង្ហោះផ្កាយរណបចារកម្មយោធាដំបូងរបស់ខ្លួនដោយជោគជ័យកាលពីថ្ងៃទី ២១ ខែវិច្ឆិកា ដោយបញ្ជូនរូបថតនៃសេតវិមាន មន្ទីរបញ្ចកោណ មូលដ្ឋានយោធាអាមេរិក និង តំបន់គោលដៅ នៅក្នុងប្រទេសកូរ៉េខាងត្បូង។
ទង្វើនេះបានបង្កើនភាពតានតឹងក្នុងតំបន់ និងជំរុញឱ្យមានការដាក់ទណ្ឌកម្មថ្មីពីសហរដ្ឋអាមេរិក អូស្ត្រាលី ជប៉ុន និងកូរ៉េខាងត្បូង។
ទីក្រុងព្យុងយ៉ាងមិនទាន់បានបញ្ចេញរូបភាពណាមួយពីផ្កាយរណបមកទល់ពេលនេះទេ ដោយទុកឱ្យអ្នកវិភាគ និងរដ្ឋាភិបាលបរទេសជជែកវែកញែកថាតើផ្កាយរណបថ្មីនេះពិតជាមានសមត្ថភាពយ៉ាងណា។
នៅក្នុងអត្ថបទដាច់ដោយឡែកមួយដែលធ្វើឡើងដោយ KCNA កាលពីថ្ងៃអាទិត្យ អ្នកអត្ថាធិប្បាយយោធាកូរ៉េខាងជើងដែលមិនស្គាល់អត្តសញ្ញាណម្នាក់បានឲ្យដឹងថា កូរ៉េខាងត្បូងត្រូវបានស្តីបន្ទោសចំពោះការបំបែកកិច្ចព្រមព្រៀងកសាងទំនុកចិត្តយោធារបស់ពួកគេ ដោយគ្រាន់តែបញ្ជាក់ពីការបាញ់បង្ហោះផ្កាយរណបចារកម្មរបស់ខ្លួនដូចអ្វីដែលប្រទេសផ្សេងទៀតបានធ្វើផងដែរ។
ប្រភព៖ REUTERS
ប្រែសម្រួលដោយ៖ ហៃ ឆៃមុីនាង
