សៀមរាប៖ អាជ្ញាធរជាតិអប្សរាបានបន្តចែកចាយកូនឈើចម្រុះចំនួន ១០,៧៨០ដើមបន្ថែមទៀត ចាប់ពីថ្ងៃទី៨ ដល់ថ្ងៃទី១៥ ខែមិថុនា ឆ្នាំ២០២៦។ ការផ្តល់ជូននេះ ជាផ្នែកដ៏សំខាន់ក្នុងការបង្កើនគម្របព្រៃឈើ ឡើងវិញនៅក្នុងតំបន់រមណីយដ្ឋានអង្គរ ក៏ដូចជាប្រទេសកម្ពុជាទាំងមូល។
កូនឈើចម្រុះដែលបានផ្តល់ជូនខាងលើរួមមាន៖
– ប្រគេនកូនឈើចម្រុះជូនព្រះតេជគុណ សានៈ សប្បាយ ព្រះចៅអធិការវត្តវិសុទ្ធិមគ្គ (ភិនិរិទ្ធារាម) ចំនួន២,៣០០ដើម ដើម្បីយកទៅដាំនៅតាមបរិវេណវត្ត ក្នុងភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប។ កូនឈើទាំងនោះរួមមាន គគីរ១,៥០០ដើម ធ្នង់៣០០ដើម បេង២០០ដើម គ្រញូង២០០ដើម និងរំដួល១០០ដើម។
– ផ្តល់កូនឈើចម្រុះជូនក្រុមសហគមន៍បៃតង ចំនួន២០០ដើម យកទៅដាំតាមដងស្ទឹងសៀមរាប ស្ថិតនៅខាងជើងស្ពានរ៉ោករ៉ាកនៃរមណីយដ្ឋានអង្គរ។ កូនឈើទាំងនោះរួមមាន ធ្នង់៦០ដើម ច្រេស៦០ដើម ក្ងោក៤០ដើម និងរំដួល៤០ដើម។
– ផ្តល់កូនឈើចម្រុះជូនក្រុមនិស្សិតនៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ចំនួន១០០ដើម យកទៅដាំតាមដងស្ទឹងសៀមរាប ស្ថិតនៅខាងជើងស្ពានរ៉ោករ៉ាកនៃរមណីយដ្ឋានអង្គរ។ កូនឈើទាំងនោះរួមមាន ធ្នង់៣០ដើម ច្រេស៣០ដើម គគីរ១០ដើម ឈើទាល១០ដើម ប្រាំតម្លឹង១០ដើម និងរំដួល១០ដើម។
– ផ្តល់កូនឈើចម្រុះជូនកញ្ញា ឈុន ម៉ូលីវ៉ាន់ លោក ម៉ៅ រតនា លោក ឡាយ អ៊ាងលី អ្នកស្រី ណក់ ពេជ្រសាវតី និងអ្នកស្រី ព្រំ ស៊ីណា ប្រជាពលរដ្ឋរស់នៅខេត្តសៀមរាប ចំនួន ១,៤៨០ដើម ដើម្បីយកទៅដាំលើដីផ្ទាល់ខ្លួន តាមដងផ្លូវ នៅបរិវេណសាលារៀន និងវត្តអារាម ក្នុងក្រុងរុនតាឯកតេជោសែន ស្រុកប្រាសាទបាគង ខេត្តសៀមរាប ខេត្តបន្ទាយមានជ័យ ខេត្តតាកែវ និងរាជធានីភ្នំពេញ។ កូនឈើទាំងនោះរួមមាន ធ្នង់៤៣០ដើម បេង២១៥ដើម ច្រេស២១៥ដើម គ្រញូង៣០០ដើម គគីរ២៤០ដើម កកោះ៤០ដើម ក្ងោក២០ដើម និងចាមរី២០ដើម។
– ផ្តល់កូនឈើចម្រុះ ចំនួន៦,៧០០ដើម ដើម្បីយកទៅចែកជូនប្រជាពលរដ្ឋ រស់នៅក្រុងរុនតាឯកតេជោសែន និងដាំនៅតាមទីតាំងនានាក្នុងបរិវេណរមណីយដ្ឋានអង្គរ។ កូនឈើទាំងនោះរួមមាន ធ្នង់៤០០ដើម គ្រញូង៣០០ដើម ច្រេស១,០០០ដើម ឈើទាល១,១០០ដើម គគីរ៥០០ដើម ផ្តៀក៥០០ដើម កកោះ៤០០ដើម ពពេល១០០ដើម ស្រឡៅ១០០ដើម ក្ងោក៥០០ដើម អង្គាបុស្ប៥០០ដើម ឥន្ទនេល២០០ដើម រំដួល១០០ដើម អូញម៉ូញ២០០ដើម ព្កុល២០០ដើម គុយ២០០ដើម និងរំដេញ៤០០ដើម៕
