រដ្ឋបាលខេត្តស្ទឹងត្រែង ប្រារព្ធទិវាអនាម័យបរិស្ថានជាតិ ២៣វិច្ឆិកា ក្រោមប្រធានបទ«ភូមិឋានស្អាត បរិស្ថានស្អាត សង្គមសន្តិភាព សេដ្ឋកិច្ចរីកចំរើន»

ភ្នំពេញ៖ ទិវាអនាម័យបរិស្ថានជាតិ ២៣ វិច្ឆិកា ក្រោមប្រធានបទ«ភូមិឋានស្អាត បរិស្ថានស្អាត សង្គមសន្តិភាព សេដ្ឋកិច្ចរីកចំរើន»ត្រូវបានមន្ទីរបរិស្ថានខេត្តស្ទឹងត្រែងសហការជាមួយរដ្ឋបាលខេត្តនិងសាលាក្រុងស្ទឺងត្រែងធ្វើឡើងនៅសួនច្បារមុខសាលាខេត្តស្ទឺងត្រែងនាព្រឹកថ្ងៃទី២០ ខែវិច្ឆិការ ឆ្នាំ២០២៣ក្រោមអធិបតីភាពលោក ចៅ មុន្នីរ៉ា អភិបាលរងខេត្តស្ទឺងត្រែងតំណាងដ៏ខ្ពង់ខ្ពស់ឯកឧត្តម ស្វាយ សំអ៊ាង អភិបាលខេត្ត , លោក ហ៊ុយ សុគន្ធ អនុប្រធានមន្ទីរបរិស្ថានខេត្ត,និង លោក សាយ កុសល អភិបាលក្រុងស្ទឹងត្រែង ព្រមទាំងមានការចូលរួមពីសំណាក់ ថ្នាក់ដឹកនាំ កងកម្លាំងប្រដាប់អាវុធទាំងបីប្រភេទ មន្រ្តីរាជការមន្ទីរបរិស្ថានខេត្ត យុវជន លោកគ្រូអ្នកគ្រូ សិស្សានុសិស្សនិងអាជ្ញាធរពាក់ព័ន្ធជាច្រើននាក់។

នាឱកាសប្រារព្ធទិវានេះលោក ហ៊ុយ សុគន្ធ អនុប្រធានមន្ទីរបរិស្ថានខេត្តស្ទឹងត្រែងបានលើកឡើងថា បញ្ហាបរិស្ថានគឺជាបញ្ហាដ៏ចម្បងមួយដែលពិភពលោកព្រួយបារម្ភនិងយកចិត្តទុកដាក់ខ្លាំង ទន្ទឹមនិងនេះពិភពលោកក៏កំពុងអនុវត្តនូវយន្តការបីស្អាតគឺ ទឹកស្អាត និងខ្យល់ស្អាត។

ដើម្បីជាការឆ្លើយតប ទៅនឹងប្រធានបទនៃទិវាអនាម័យបរិស្ថានជាតិនាពេលនេះ លោក ហ៊ុយ សុគន្ធ អនុប្រធានមន្ទីរបរិស្ថានខេត្ត ស្ទឹងត្រែងបានអំពាវ នាវ ឲ្យជនរួមជាតិទាំងអស់ ប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស ចូលរួមក្នុងកិច្ចគាំពារបរិស្ថាន ពិសេសការទុកដាក់សំណល់រឹង សំណល់ប្លាស្ទិក និងចូលរួម អនុវត្តយុទ្ធសាស្ត្រ (R4) ដែលក្រសួងបរិស្ថានបានដាក់ចេញ ក្នុងន័យសំដៅឈានទៅរកការបញ្ឈប់ការប្រើ ប្រាស់ប្លាស្ទិក រួមមានៈ ការបដិសេធមិនប្រើប្រាស់ ការកាត់បន្ថយការប្រើប្រាស់ ការប្រើប្រាស់ឡើងវិញនិងការកែច្នៃឡើងវិញ។

លោក ចៅ មុន្នីរ៉ា អភិបាលរងខេត្តស្ទឹងត្រែងបានមានប្រសាសន៍ថារាជរដ្ឋាភិបាលកម្ពុជាអាណត្តិទី៧ក្រោមការដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី គឺក្រសួងបរិស្ថានបានដាក់ចេញនូវយុទ្ធសាស្ត្រចក្រាវិស័យបរិស្ថាន ដែលមានស្អាត បរិស្ថានល្អ និងចីងរភាព ព្រមទាំងប្រើយុទ្ធនាការ១០០ថ្ងៃ ថ្ងៃនេះយើងមិនប្រើថងប្លាស្ទឹក ដើម្បីចូលរួមឲ្យមានបរិស្ថានល្អ។

ជាមួយគ្នានេះដែរលោក ចៅ មុន្នីរ៉ា ក៏បានកោតសរសើដល់មន្ទីរបរិស្ថានខេត្តនិងអាជ្ញាធរក្រុងស្ទឹងត្រែងក្នុងការរួមសហការគ្នាបានល្អ ចុះផ្សព្វផ្សាយ អប់រំ បញ្ច្រាបការយល់ដឹង និងធ្វើយុទ្ធនាការមិនប្រើប្រាស់ថង់ប្លាស្ទឹក សល់សិស្សានុនានានៅក្នុងក្រុងស្ទឹងត្រែង។

ទន្ទឹមនិងនេះលោកអភិបាលរងខេត្តក៏បានក្រើនរម្លឹក និងជំរុញឱ្យស្ថាប័នសាធារណៈ និងឯកជន អាជ្ញាធរគ្រប់លំដាប់ថ្នាក់ ប្រជាពលរដ្ឋ ចូលរួមធ្វើអនាម័យ និងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន ព្រមទាំងជំរុញឱ្យអាជ្ញាធរមូលដ្ឋាន ជាមួយនឹងស្ថាប័នពាក់ព័ន្ធ ធ្វើការអប់រំផ្សព្វផ្សាយដល់ប្រជាពលរដ្ឋពីការគ្រប់គ្រង ទុកដាក់សំរាម និងសំណល់រឹងឱ្យបានត្រឹមត្រូវផងដែរ៕