គ្រោះរញ្ជួយដីកម្រិត ៧.២រ៉ិចទ័រ បានវាយប្រហារភាគខាងកើតប្រទេសឥណ្ឌូណេស៊ី ពុំមានការជូនដំណឹងអំពីរលកយក្សស៊ូណាមិ នោះទេ

ហ្សាការតាៈ ទីភ្នាក់ងារឧតុនិយម អាកាសធាតុ និងភូគព្ភសាស្ត្រ BMKG របស់ប្រទេសឥណ្ឌូនេស៊ី បានឲ្យដឹងថា គ្រោះរញ្ជួយដីកម្រិត ៧.២ រ៉ិចទ័រ បានវាយលុកពីខេត្ត ម៉ាលូគូ ភាគខាងកើតប្រទេសឥណ្ឌូនេស៊ី កាលពីថ្ងៃពុធ ប៉ុន្តែមិនបានបង្កជារលកយក្សស៊ូណាមិនោះទេ។ ទីភ្នាក់ងារនេះបានបន្តថា ដោយផ្តោតលើបាតសមុទ្ររាក់ ការរញ្ជួយដីបានកើតឡើងនៅម៉ោង ១១:៥២ នាទីព្រឹក ម៉ោងនៅទីក្រុងហ្សាការតា (០៤៥២ GMT)។ ទីភ្នាក់ងារនេះបានបន្ថែមថាទីតាំងនៃចំណុចកណ្តាលនៃការរញ្ជួយដីគឺ ២៥១ គីឡូម៉ែត្រភាគពាយព្យនៃស្រុក Maluku Tenggara Barat (កោះ Tanimbar) ជាមួយនឹងជម្រៅ ១០ គីឡូម៉ែត្រនៅក្រោមបាតសមុទ្រ។ ទីភ្នាក់ងារនេះបានបន្ថែមថា អាំងតង់ស៊ីតេនៃការរញ្ជួយដីនេះត្រូវបានគេដឹងថាខ្លាំងបំផុតនៅកម្រិត IV ដល់ V នៃមាត្រដ្ឋាន MMI (Modified Mercalli Intensity) នៅទីក្រុង Saumlaki និងសមុទ្រ Banda ហើយខ្សោយជាងនៅតំបន់ផ្សេងទៀតនៃខេត្ត។ ទីភ្នាក់ងារនេះមិនបានចេញការព្រមានអំពីរលកយក្សស៊ូណាមិនោះទេ ដោយសារការរញ្ជួយនឹងមិនបង្កឱ្យមានរលកយក្សនោះទេ។ មុននេះ មជ្ឈមណ្ឌលស្រាវជ្រាវភូគព្ភសាស្ត្រអាល្លឺម៉ង់ GFZ បានកែប្រែកម្រិតនៃការរញ្ជួយដីដែលវាត្រូវបានគេរាយការណ៍ថាបានវាយប្រហារសមុទ្រ Banda នៅម៉ោង ០៤៥៣ GMT ពី ៦.៦ ដល់ ៧.១ រ៉ិចទ័រ។ មជ្ឈមណ្ឌលស្រាវជ្រាវភូគព្ភសាស្ត្រអាល្លឺម៉ង់ បានឲ្យដឹងថា ចំណុចកណ្តាលនៃការរញ្ជួយដីដែលមានជម្រៅ ១០.០ គីឡូម៉ែត្រ ត្រូវបានកំណត់ដំបូងថាស្ថិតនៅរយៈទទឹង ៦.៣២ ដឺក្រេខាងត្បូង និង ១២៩.៥៩ ដឺក្រេ រយៈបណ្តោយខាងកើត។ ប្រភព៖ Xinhua Net ប្រែសម្រួលដោយ៖ ឡាយ លីហួ