នាយឧត្ដមសេនីយ៍ ឥត សារ៉ាត់ រំលឹកឱ្យនាយទាហានត្រូវប្រកាន់ខ្ជាប់នូវ «ភក្តីភាព ទឹកចិត្តក្លាហាន កាយសម្បទា និងជំនាញ»
ភ្នំពេញ៖ កងយោធពលខេមរភូមិន្ទ គ្រោងនឹងបញ្ជូនកងកម្លាំងនៃបញ្ជាការដ្ឋានទ័ពពិសេស និងកងកម្លាំងមួយផ្នែករបស់កងពលតូចលេខ៧០ កងទ័ពជើងគោក ប្រមាណជាជាង ៩២ នាក់ រួមនឹងសម្ភារៈ បរិក្ខា យោធា ទៅកាន់តំបន់ កាវតាន ទីក្រុងស៊ាន់ជាំង ខេត្តក្វាងតុង សាធារណរដ្ឋប្រជាមានិតចិន ដើម្បីចូលរួមក្នុងសមយុទ្ធ “សន្តិភាព មិត្តភាព ២០២៣ ” អា មែន យូ យី ២០២៣ “(AMAN YOUYI 2023)”ក្រោមប្រធានបទ “ប្រតិបត្តិការយោធាចម្រុះ លើការប្រឆាំងភេរវកម្ម និងការថែរក្សាសន្តិសុខលម្ហសមុទ្រ” ដែលមានរយៈពេល ១០ថ្ងៃ ចាប់ពីថ្ងៃទី១៣ ដល់ថ្ងៃទី២២ ខែវិច្ឆិកា ឆ្នាំ២០២៣ ដែលសមយុទ្ធរួមនេះ រៀបចំធ្វើឡើងដោយកងទ័ពរំដោះប្រជាជនចិន និងមានការចូលរួមតំណាងអង្គការសហប្រជាជាតិ និងកងកម្លាំងកងទ័ពកម្ពុជា ឡាវ ម៉ាឡេស៊ី ថៃ វៀតណាម និងចិន ដែលបណ្ដាប្រទេសទាំងនោះនិង បញ្ជូនកម្លាំងយោធារបស់ខ្លួន រួមនិងសម្ភារៈបរិក្ខារយោធា ទៅចូលរួមក្នុងប្រតិបត្តិការប្រឆាំង នឹងក្រុមភេរវករ ទាំងនៅលើដីគោក និងនៅលើផ្ទៃសមុទ្រ ។ ពិធីសំណេះសំណាលនេះបានប្រព្រឹត្តទៅ នារសៀលថ្ងៃទី ១០ ខែវិច្ឆិកា ឆ្នាំ ២០២៣ នៅបញ្ជាការដ្ឋានកងពលតូចលេខ ៧០ ក្រោមអធិបតីភាព នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ តំណាងឯកឧត្តម អគ្គមេបញ្ជាការ ។
ក្នុងឱកាសជួបសំណេះសំណាលនោះ បន្ទាប់ពី ឧត្តមសេនីយ៍ទោ ប៉ែន សុក្រិតវិទ្យា ធ្វើសេចក្តីរាយការណ៍អំពីការត្រៀមទាំងកម្លាំង សម្ភារៈ បរិក្ខា យោធា ចេញទៅចូលរួមសមយុទ្ធនេះមក នាយឧត្តមសេនីយ៍ ឥត សារ៉ាត់ បានថ្លែងថា នេះគឺជាមោទនភាព ដ៏ឧត្តុងឧត្តមណាស់ ហើយក៏ជាមុខមាត់ សម្រាប់ប្រជាជនកម្ពុជា ផងដែរ ដែលកងយោធពលខេមរៈភូមិន្ទយើង ត្រូវបានមិត្តចិន អញ្ជើញឲ្យចូលរួមក្នុងសមយុទ្ធពហុសាសន៍រួមដ៏មានសារៈសំខាន់ “មិត្តភាព សន្តិភាព-២០២៣” ដែលរៀបចំឡើងដោយកងទ័ពរំដោះប្រជាជនចិន ដែលមានបណ្ដាប្រទេសចំនួន ៦ ចូលរួមក្នុងសមយុទ្ធនេះ ដោយរួមទាំងអ្នកតំណាងរបស់អង្គការសហប្រជាជាតិ ក៏មានវត្តមាននៅទីនោះដែរ ។
នាយឧត្តមសេនីយ៍ ឥត សារ៉ាត់ បានថ្លែងទៀតថា នេះមិនមែនជាលើកទីមួយទេ ដែលកងយោធពលខេមរៈភូមិន្ទយើង បានចេញទៅចូលរួមក្នុង សមយុទ្ធពហុសាសន៍ ដែលមានបណ្ដាប្រទេសជាច្រើនចូលរួម ដូច្នេះយើងជឿជាក់ថាកម្លាំងរបស់យើងនិងចូលរួមក្នុងប្រតិបត្តិការសមយុទ្ធនេះប្រកបដោយជោគជ័យ ។ ក្នុងនាមសម្ដេចបវរអធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងក្នុងនាម ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ឯកឧត្តម អគ្គមេបញ្ជាការ នៃកងយោធពលខេមរៈភូមិន្ទ ឯកឧត្តម ឥត សារ៉ាត់ បានកោតសរសើរចំពោះក្រុមការងារ ដែលបានសហការគ្នាយ៉ាងល្អជាមួយ កងពលតូចលេខ ៧០ និងបញ្ជាការដ្ឋានទ័ពពិសេស កងទ័ពជើងគោក រៀបចំទាំងកម្លាំង និង សម្ភារៈបរិក្ខារយោធា ដើម្បីធានា ឱ្យការប្រុងប្រៀបចេញដំណើរទៅចូលរួមក្នុងសមយុទ្ធពហុសាសន៍រួម “សន្តិភាព មិត្តភាព ២០២៣” នៅប្រទេសចិនបានប្រកបទៅដោយរលូន ។
ឆ្លៀតក្នុងឱកាសនោះ ឯកឧត្តម បានរំលឹកដល់នាយទាហានរបស់យើង ដែលទៅចូលរួមក្នុងសមយុទ្ធពហុសាសន៍នេះ ត្រូវចូលរួមគោរព អោបានដាច់ខាត នូវរាល់បទបញ្ជា និងការចាត់តាំងនានា របស់ថ្នាក់ដឹកនាំក្រុម ឬមេបញ្ជាការដឹកនាំ ពិសេសបទបញ្ជាផ្ទៃក្នុង នៃសមយុទ្ធ របស់ប្រទេសម្ចាស់ផ្ទះ ហើយក៏រក្សាឲ្យបាននៅតម្លៃ សេចក្តីថ្លៃថ្នូររបស់ កងយោធពលខេមរភូមិន្ទ សម្រាប់ជាតិយើងផងដែរ ។
ជាមួយគ្នានេះដែរ ឯកឧត្តម ឥត សារ៉ាត់ ក៏បានរំលឹកឱ្យនាយទាហានទាំងអស់ត្រូវ ប្រកាន់ខ្ជាប់នូវ «ភក្តីភាព ទឹកចិត្តក្លាហាន កាយសម្បទា និងជំនាញ» និងត្រូវចេះគ្រប់គ្រង និងប្រើប្រាស់កម្លាំងឱ្យចំគោលដៅ និងជំនាញ រក្សាសម្ងាត់យោធាខ្ពស់បំផុត ហើយត្រូវចាត់ទុក សមយុទ្ធដែលយើងទៅចូលរួមនេះ ជាការងារស្នូល ពីព្រោះថា សមយុទ្ធដែលយើងទៅចូលរួមនេះ គឺជាសមយុទ្ធដ៏មានសារៈសំខាន់ ដូច្នេះយើងទាំងអស់គ្នា ទាំងថ្នាក់ដឹកនាំក្រុម ក៏ដូចយោធិនដែលចូលរួមទាំងអស់ ត្រូវយកចិត្តទុកដាក់សិក្សាដកពិសោ ធន៍ ទាំងចំណេះដឹង និងចំណេះធ្វើ ពីបណ្ដាប្រទេសដែលចូលរួម និងធានាគុណភាព មានឆន្ទៈមោះមុត លើជំនាញពិតប្រាកដ ហើយក៏ត្រូវតែទទួលបានជោគជ័យលើគ្រប់វិញ្ញាសា នានា ក្នុងកម្មវិធីសមយុទ្ធ ដោយធានា បានទាំងកត្តាមនុស្ស និងសម្ភារៈ ។ ទទ្ទឹមនេះដែរយោធិនទាំងអស់ ត្រូវចេះក្តាប់ឱ្យបានគ្រប់យុទ្ធវិធីសម័យទំនើប ដូចជាវិញ្ញាសាវាយរំដោះចំណាប់ខ្មាំង វាយចូលជ្រៅកម្ទេចបណ្តាទីតាំងខ្មាំង ចេះប្រយុទ្ធរបៀបទ័ពព្រៃ ប្រឆាំងទ័ពព្រៃ ឆ្លងកាត់ឧបសគ្គគ្រប់បែបយ៉ាង ជាកម្លាំងចូលជ្រៅស៊ើបការណ៍តំបន់ទីតាំងខ្មាំង ជាកម្លាំងប្រតិបត្តិការវាយលុកចូលទីក្រុង អគារឬសំណង់ធំៗ បាញ់ប្រតិកម្ម រហ័សកម្ទេចគោលដៅ ជាកម្លាំងវាយតាមបណ្តាកោះ វាយឆ្មក់ និងជ្រៀតចូលទីតាំងខ្មាំងដោយសម្ងាត់ និងវិញ្ញាសានៃការបំពេញភារកិច្ចជាច្រើនទៀត តាមកម្មវិធីដែលម្ចាស់ផ្ទះរៀបចំសមយុទ្ធបានរៀបចំឡើង ដែលនេះគឺជាពិសោធន៍មួយដ៏ល្អសម្រាប់យើងយកមកពង្រឹង កងយោធពលខេមរភូមិន្ទយើង ឲ្យកាន់តែមានគុណភាព ប្រសិទ្ធភាព លើការបំពេញភារកិច្ចការពារជាតិ ការពារអធិបតេយ្យ បូរណភាពទឹកដីរបស់ព្រះរាជាណាចក្រកម្ពុជា យើងបានកាន់តែរឹងមាំ ។ឯកឧត្តម សង្ឃឹមជឿជាក់ថា ក្រោយបញ្ចប់សូមយុទ្ធនេះ វិលមកមាតុងប្រទេសយើងវិញ កម្លាំងរបស់យើង នឹងធានាបាន ទាំងកត្តាមនុស្ស និងសម្ភារៈបរិក្ខា ហើយទទួលជោគជ័យសម្រាប់មោទនៈភាពជាតិយើង ៕
