សម្តេចក្រឡាហោម ស ខេង សង្ឃឹមជឿជាក់ថា JICA នឹងបន្តជួយគាំទ្រដល់ការងារសិក្សា គម្រោងដែលពាក់ព័ន្ធទៅនឹងការងារកំណែទម្រង់វិមជ្ឍការ និងវិសហម្ឍការ

ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសង្ឃឹមជឿជាក់ថា JICA នឹងបន្ត ជួយគាំទ្រដល់ការងារសិក្សា ដល់គម្រោងដែលពាក់ព័ន្ធទៅនឹងការងារកំណែទម្រង់វិមជ្ឍការ និងវិសហម្ឍការ។

ការលើកឡើងរបស់សម្ដេចក្រឡាហោមបែបនេះបានធ្វើឡើង នារព្រឹកថ្ងៃទី២៤ ខែឧសភា ឆ្នាំ២០២៣ ក្នុងជំនួបជាមួយលោក SANUI Kazumasa ប្រធានតំណាងថ្មី នៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA)ប្រចាំកម្ពុជា។

សម្តេចក្រឡាហោម ស ខេង សង្ឃឹមជឿជាក់ថា បេសកកម្មលើកទី២នេះ នឹងរួមចំណែកបង្កើតនូវសមទ្ធិផលជោគជ័យថ្មីៗបន្ថែមទៀតដល់កិច្ចសហប្រតិបត្តិការរវាង JICAនៅកម្ពុជា។

ពាក់ព័ន្ធទៅនឹងកិច្ចសហប្រតិបត្តិការដែលពាក់ព័ន្ធនឹងក្រសួងមហាផ្ទៃ សម្តេចក៏សូមថ្លែងអំណរគុណចំពោះ JICAដែលបានផ្តល់កិច្ចសហការជួយគាំទ្រដល់អគ្គនាយកដ្ឋានរដ្ឋបាលតាមគម្រោងផ្សេងៗដូចជា៖ ការអភិវឌ្ឍន៍គម្រោងមន្ត្រី និងការជួយគាំទ្ររបស់ JICAដល់ការងារកំណែទម្រង់វិមជ្ឍការ និងវិសហម្ឍការរបស់ក្រសួងមហាផ្ទៃតាមរយៈ គ.ជ.អ.ប ដែលមានកិច្ចការជាច្រើនរាប់ទាំងការពង្រឹងសមត្ថភាពមន្ត្រី និងរៀបចំគោលនយោបាយផ្សេងៗ។

សម្តេចក៏បានជម្រាបជូនផងដែរថា ការងារកំណែទម្រង់វិមជ្ឍការ និងវិសហម្ឍការ គឺជាកំណែទម្រង់អទិភាពរបស់រាជរដ្ឋាភិបាលកម្ពុជា ដែលមកដល់ពេលនេះរាជរដ្ឋាភិបាល បានឯកភាពគ្នា យ៉ាងមុតមាំគាំទ្រដល់ការងារកំណែទម្រង់វិមជ្ឍការ និងវិសហម្ឍការនេះ។ ចំពោះការអនុវត្តការផ្ទេរមុខងារនៅលើគោលដៅក្រុង ស្រុក ខណ្ឌ មួយចំនួននៅខេត្តបាត់ដំបង ក៏ទទួលបានលទ្ធផលល្អប្រសើរផងដែរ។

សម្តេចក្រឡាហោម បានជម្រាបជូនបន្ថែមថា ក្នុងក្របខណ្ឌការងារកំណែទម្រង់វិមជ្ឍការ និងវិសហម្ឍការនេះ ដោយគិតចាប់ពីឆ្នាំ២០២៤តទៅ រាជរដ្ឋាភិបាលកម្ពុជានឹងចាប់ផ្តើមដំណើរការផ្ទេរមុខងារនៅក្នុង វិស័យអប់រំមួយចំនួនទៅកាន់រដ្ឋបាលថ្នាក់ក្រោមជាតិផងដែរ បន្ទាប់ពីទទួលបានជោគជ័យក្នុងការអនុវត្តសាកល្បងគម្រោងនាពេលកន្លងមក។

ជាមួយគ្នានេះដែរ សម្តេចក្រឡាហោម សង្ឃឹមជឿជាក់ថា JICAនឹងបន្ត ជួយគាំទ្រដល់ការងារសិក្សា ដល់គម្រោងដែលពាក់ព័ន្ធទៅនឹងការងារកំណែទម្រង់វិមជ្ឍការ និងវិសហម្ឍការ ក៏ដូចជាការងារសុវត្ថិភាពផ្លូវថ្នល់បន្ថែមទៀតផងដែរ ដើម្បីជម្រុញកិច្ចការទាំងនេះឱ្យទទួលបានវឌ្ឍនភាព ស្របតាមគោលដៅ ក៏ដូចជាផែនការដែលបានគ្រោងទុក។

ជាការឆ្លើយតប លោកប្រធានអង្គការJICAក៏បានថ្លែងអំណរគុណចំពោះសម្តេចក្រឡាហោម ស ខេង នូវពាក្យពេចន៍ ក៏ដូចជាការផ្តល់ព័ត៌មានបច្ចុប្បន្នភាពនៃការធ្វើកំណែទម្រង់វិមជ្ឍការ និងវិសហម្ឍការនៅកម្ពុជា ព្រមទាំងកិច្ចការពាក់ព័ន្ធមួយចំនួនទៀត។

លោកបានបន្តថា នេះជាបេសកកម្មទី២របស់លោកនៅប្រទេសកម្ពុជា ហើយជំនួបនាពេលនេះ លោកចង់ជម្រាបជូនសម្តេចក្រឡហោម នូវវិស័យធំៗចំនួន៣ ដែលអង្គការ JICAចូលរួមគាំទ្រនៅកម្ពុជា ទី១៖ ការអភិវឌ្ឍន៍ឧស្សាហកម្ម ទី២៖ទាក់ទងនឹងគុណភាពនៃការរស់នៅរបស់ប្រជាជន និងទី៣៖ការងារអភិបាលកិច្ច។

លោកប្រធានអង្គការ ក៏បានជម្រាបជូនសម្តេចបន្ថែមលើការងារដែលពាក់ព័ន្ធនឹងដែនសមត្ថកិច្ចរបស់ក្រសួងមហាផ្ទៃជាមួយអង្គការJICA ដែលភាគច្រើនលើការងារអភិបាលកិច្ច ដោយបានធ្វើការបណ្តុះបណ្តាលលើកកម្ពស់សមត្ថភាពដល់មន្ត្រីរដ្ឋបាលមូលដ្ឋាន និងការជួយរៀបចំគោលនយោបាយនានាសម្រាប់ថ្នាក់ក្រោមជាតិ។ ស្របជាមួយគ្នានោះផងដែរ លោកប្រធានបានថ្លែងអំណរគុណចំពោះសម្តេចក្រឡាហោម ក៏ដូចជាថ្នាក់ដឹកនាំពាក់ព័ន្ធរបស់ក្រសួងមហាផ្ទៃដែលបានសហការគាំទ្រធ្វើឱ្យបេសកកម្មកន្លងមកនេះរបស់អង្គការJICAទទួលបានជោគជ័យសម្រេចបានលទ្ធផលទៅតាមអ្វីដែលបានរំពឹងទុក ពិសេសការរៀបចំគោលនយោបាយ និងការរៀបចំខ្លឹមសារសម្រាប់ការងារបណ្តុះបណ្តាលមន្ត្រីថ្នាក់ក្រោមជាតិ។

លោកមានប្រសាសន៍បន្តថា ដើម្បីបន្តជំរុញគាំទ្រដល់ការងារនេះ អង្គការJICAក៏បានចាត់បញ្ជូននូវអ្នកប្រឹក្សាយោបល់ផ្នែកគោលនយោបាយដើម្បីបន្តជួយគាំទ្រដល់ក្រសួងមហាផ្ទៃលើការងារពាក់ព័ន្ធក្នុងការងារកំណែទម្រង់វិមជ្ឍការ និងវិសហម្ឍការនេះ។ ចំពោះកិច្ចការងារដែលពាក់ព័ន្ធនឹងសុវត្ថិភាពផ្លូវថ្នល់ JICAក៏មានការគាំទ្រផងដែរ ដល់ការរៀបចំគម្រោងផ្សេងៗក្នុងការធ្វើយ៉ាងណាឱ្យសុវត្ថិភាពចរាចរណ៍កាន់តែត្រូវបានពង្រឹងនឹងលើកកម្ពស់តាមរយៈការបង្កើតនូវគំនិតផ្តួចផ្តើមក៏ដូចជាគម្រោងក្នុងការរៀបចំទិន្ន័យវិភាគគ្រោះថ្នាក់ចរាចរណ៍ ដើម្បីដាក់ចេញនូវគោលនយោបាយ និងដំណោះស្រាយសមស្របដើម្បីឈានទៅដល់ការកាត់បន្ថយគ្រោះថ្នាក់ចរាចរណ៍នៅកម្ពុជា៕