ភ្នំពេញ៖ ព្រឹត្តិការណ៍អង្គរសង្ក្រាន្តឆ្នាំ២០២៣នេះ មានកម្មវិធីមួយឈ្មោះថា(ភូមិខ្ញុំ) ដែលកម្មវិធីនោះនឹងមានការរៀបចំគម្រោងធំៗជាច្រើន ដើម្បីអបអរសាទរពិធីចូលឆ្នាំថ្មី ឆ្នាំថោះ បញ្ចស័ក ពុទ្ធសករាជ ២៥៦៧ នៅក្នុងបរិវេណអង្គរធំនៃរមណីយដ្ឋានអង្គរ ខេត្តសៀមរាប។
ឯកឧត្តម សុខ សង្វារ អនុរដ្ឋលេខាធិការក្រសួងទេសចរណ៍ និងជាប្រធានគម្រោងកម្មវិធីភូមិខ្ញុំ បានដឹកនាំក្រុមប្រជុំការងារគម្រោងភូមិខ្ញុំដើម្បីពិនិត្យវឌ្ឍនភាពនៃការរៀបចំគម្រោង កាលពីថ្ងៃទី២៧ ខែមករា ឆ្នាំ២០២៣។ ឯកឧត្តមបានបញ្ជាក់ថា ភូមិខ្ញុំ ឆ្នាំនេះត្រូវបានគិតគូរ រៀបចំឡើងដោយផ្ចិតផ្ចង់ និងអស្ចារ្យជាងឆ្នាំមុនៗទាំងអស់ ដោយសារឆ្នាំនេះ ជាខួប១០ឆ្នាំនៃព្រឹត្តិការណ៍អង្គរសង្ក្រាន្តផង និងជាឆ្នាំដែលយើងបានសម្រេចរៀបចំព្រឹត្តិការណ៍អង្គរសង្ក្រាន្តឡើងវិញ ក្រោយវិបត្តិកូវីដ-១៩ ដែលបានរំខានដល់ការកម្សាន្តសប្បាយរបស់ប្រជាពលរដ្ឋកម្ពុជាយើងកន្លងមក ហើយក៏ជាចកលរមួយក្នុងការទាក់ទាញភ្ញៀវទេសចរជាតិ និងអន្តរជាតិ មកទស្សនានៅខេត្តសៀមរាបក្នុងព្រឹត្តិការណ៍ដ៏អស្ចារ្យនេះផង។
ឯកឧត្តមបញ្ជាក់ទៀតថា ភូមិខ្ញុំ ឆ្នាំនេះបានគ្រោងរៀបចំទស្សនីយភាព ៨ កម្មវិធីសំខាន់ៗគឺ តំបន់ខួប១០ឆ្នាំ នៃភូមិខ្ញុំដែលប្រមូលផ្តុំដោយវត្ថុយក្សទាំងអស់ឡើងវិញដែលជាស្នាដៃកូនខ្មែរពិតៗ។
គម្រោងផ្ទះមរតកដូនតា ដែលនឹងបង្ហាញនូវការសម្តែងចាប៉ីដងវែង ពិណបុរាណ តួអង្គលម្អិតល្ខោនខោល ការប្រគំភ្លេងខ្មែរបុរាណ និងការរាំកម្សាន្តប្រជាប្រិយដោយ ក្រុមស្គរដៃផងដែរ។
លើសពីនេះ គម្រោងផ្ទះសេដ្ឋី ក៏មានសកម្មភាពទាក់ទាញដូចជា ការដង្ហែក្បួនសេដ្ឋីក្នុងភូមិ ការប្រកួតគុនល្បុក្កតោតំណាងឲ្យកងការពារលោកសេដ្ឋី សកម្មភាពប្រចាំថ្ងៃរបស់ភរិយានិងអ្នកបម្រើក្នុងផ្ទះសេដ្ឋី។
ផ្ទះនំខ្មែរ ក៏ជាគម្រោងមួយដែលនឹងទាក់ទាញមហាជនផងដែរ។ អ្នកជំនាញធ្វើនំខ្មែរនឹងបង្ហាញពីដើមដល់ចប់អំពីរបៀបធ្វើនំបញ្ចុកខ្មែរ ការស្លទឹកនំ របៀបធ្វើនំផ្លែអាយ នំច័ក្កច័ន្ទ ដាល់អំបុក ។ល។ ដែលជាការនាំមកវិញនូវសកម្មភាព និងស្នាដៃរបស់ខ្មែរបុរាណមកបង្ហាញឡើងវិញ។
សាលាឆទាន ជាអគារសាសនាតំណាងការគោរពបូជា ភាពស្មោះត្រង់ និងប្រពៃណីទំនៀមទម្លាប់ដ៏ល្អឥតខ្ចោះរបស់បុព្វបុរសខ្មែរក្នុងតំបន់អង្គរ ដែលកំពុងបន្តរស់នៅនាពេលបច្ចុប្បន្ន។ កម្មវិធីពូនភ្នំខ្សាច់ កម្មវិធីលើកទង់ ឆាកហ៊ោ ក្មេងៗកោរជុកទុកកំប៉ោយរត់លេងជិះសេះធាងចេក យាយៗស្លៀកក្បិនពិសាស្លាម្លូ លញ់ធូបក្រអូប ចាក់ចេក ។ល។ សុទ្ធសឹងនាំមកបង្ហាញជូនក្នុងសាលាឆទានទាំងអស់។
ផ្សារខ្មែរ ជាកូនផ្សារតូចក្នុងភូមិដែលនឹងដាក់តាំងលក់ម្ហូបអាហារ នំចំណី ជារបៀបខ្មែរបុរាណ និងហាងសិប្បកម្មចម្លាក់ សម្លៀកបំពាក់អបអរពិធីចូលឆ្នាំ ក៏មាននៅក្នុងផ្សារខ្មែរផងដែរ។
ឆាកធំ ជាកម្មវិធីប្រមូលផ្តុំដោយការសម្តែងរបាំបុរាណច្រើនទម្រង់ ទស្សនីយភាពល្ខោនយីកេ ល្ខោបាសាក់ ល្ខោនខោល អក្សរសិល្ប៍និទានរឿង សិល្បៈសៀកខ្មែរ។ល។ ដែលប្រមូលផ្តុំដោយសិល្បករ សិល្បការិនីអាជីពរាប់រយនាក់ ក៏នឹងមានសម្តែងជូនទស្សនាគ្រប់ទាំង៣ថ្ងៃ។
ក្រៅពីនេះ ក៏មាន រោងDJ ដែលចាក់បទរាំវង់ រាំចង្វាក់ប្រជាប្រិយខ្មែរគ្រប់ប្រភេទ ជូនមហាជនរាំលេងកម្សាន្តចូលឆ្នាំផងដែរ៕
