ឧត្តមសេនីយ៍ត្រី បោន ប៊ិន អញ្ជើញសំណេះសំណាលជាមួយ លោកនាយក-នាយករង លោកគ្រូ-អ្នកគ្រូ ១៥០នាក់ និងនាំអំណោយកុំព្យូទ័រ ១៥គ្រឿង ផ្តល់ជូនសាលាបឋមសិក្សាចំនួន ១៥ នៅស្រុកភ្នំស្រុក
ភ្នំពេញ៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុហត្ថខេត្តបន្ទាយមានជ័យ នៅថ្ងៃទី២៤ ខែមករា ឆ្នាំ២០២៣ បានអញ្ជើញសំណេះសំណាលជាមួយ លោកនាយក-នាយករង លោកគ្រូ-អ្នកគ្រូ ចំនួន១៥០នាក់ ព្រមទាំងបាននាំយកអំណោយកុំព្យូទ័រ (Computer)ចំនួន១៥គ្រឿង ជាអំណោយលោក ឈឿង ឈីវអៀន ប្រធានសភាពាណិជ្ជកម្មខេត្តបន្ទាយមានជ័យ ផ្តល់ជូនដល់សាលាបឋមសិក្សាចំនួន ១៥សាលាបន្ថែមទៀត ដែលខ្វះខាតុំព្យូទ័រសំរាប់បម្រើការងារក្នុងសាលារៀន នៅស្រុកភ្នំស្រុក ។
ពិធីនេះមានការអញ្ជើញចូលរួមពីសំណាក់លោកឧត្តមសេនីយ៍ត្រី លោកឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការសឹករងបន្ទាយមាមជ័យ និងក្រុមការងារអមដំណើរ លោក ជូ បុត្រ អភិបាលស្រុកភ្នំស្រុក លោកមេឃុំទាំង០៦ សរុបជិត២០០នាក់ ប្រារព្វធ្វើឡើងនៅសាលប្រជុំសាលាស្រុកភ្នំស្រុក។
ថ្លែងក្នុងពិធីសំណេះសំណាលនាឱកាសនោះលោកឧត្តមសេនីយ៍ត្រីបោន ប៊ិន លើកឡើងថា៖ ការចូលរួមចំណែករបស់លោកគ្រូ-អ្នកគ្រូគឺជារឿងសំខាន់ដែលមិនអាចខ្វះខាតបានក្នុងការបណ្ដុះបណ្ដាលធនធានមនុស្ស ជាពិសេសក្មួយៗដែលជាសិស្សានុសិស្ស ជាទំពាំងស្នងឫស្សី បានទទួលនូវចំណេះដឹងប្រកបដោយគុណភាព ទាំងនេះគឺជាការចូលរួមចំណែកយ៉ាងសំខាន់ក្នុងការលើកកម្ពស់វិស័យអប់រំ បណ្តុះបណ្តាលធនធានមនុស្ស។
លោកឧត្តមសេនីយ៍ត្រីបញ្ជាក់ថា៖ ជាការពិត លោកគ្រូ-អ្នកគ្រូ គឺជាឃ្លាំងផ្ទុកនូវចំណេះដឹង ដែលមិនចេះរីងស្ងួត ដែលលោកបានខិតខំបង្ហាត់បង្រៀនដល់សិស្សានុសិស្ស ដោយមិនខ្លាចនឿយហត់ ដើម្បីឱ្យសិស្សមានចំណេះវិជ្ជា មានការងារល្អៗ បើគ្មានការចូលរួមរបស់លោកគ្រូ-អ្នកគ្រូទេ វិស័យអប់រំ ក៏មិនអាចមានរីកចម្រើនដូចសព្វថ្ងៃនេះដែរ។ ជាមួយការរីកចម្រើនលើវិស័យអប់រំ ជាវិស័យអាទិភាពទីមួយ ដែលប្រមុខរាជរដ្ឋាភិបាលបានកំណត់ ជាក់ស្តែងដោយសារកត្តាសុខសន្តិភាព ក្រោមការដឹកនាំរបស់ សម្តេចតេជោ ហ៊ុន សែន វិស័យអប់រំបានរីកចម្រើនយ៉ាងខ្លាំង សម្តេចបានផ្ដល់សាលារៀនជូនដល់សិស្សានុសិស្សគ្រប់ទីកន្លែងមិនថាទីក្រុង ប្រជុំជន ឬទីជនបទឡើយដែលផ្តល់ឱកាសឱ្យសិស្សានុសិស្សងាយស្រួលក្នុងការរៀនសូត្រ ។
នាឱកាសនោះ ក្រៅពីប្រគល់កុំព្យូទ័រជូនសាលារៀនចំនួន ១៥សាលាហើយនោះ រដ្ឋបាលស្រុកក៏ទទួលបានកុំព្យទ័រមួយគ្រឿង និងមូលដ្ឋានកងរាជអាវុធហត្ថស្រុកក៏ទទួលបានមួយគ្រឿងផងដែរ។ ទន្ទឹមជាមួយគ្នានោះលោកឧត្តមសេនីយ៍ត្រី បោន ប៊ិន ក៏បាននាំយក ខោអាវកីឡាចំនួន៥០០កំប្លេរ ផ្តល់ជូនសាលាទាំង១៥, បាល់ទះ ១០ គ្រាប់, បាល់ទាត់ ២០ គ្រាប់, សំណាញ់បាល់ ៦ ឈុត, ស្រោមដៃកីឡា ១២ គូរ, លោកគ្រូអ្នកគ្រូ អាជ្ញាធរមូលដ្ឋាន សរុប១៧៥នាក់ ក្នុងម្នាក់ទទួលបាន សារ៉ុង។
សូមបញ្ជាក់៖ ទូទាំងស្រុកភ្នំស្រុកមានសាលារៀនសរុបចំនួន ៥៣សាលា ក្នុងនោះ វិទ្យាល័យចំនួន៣សាលា, អនុវិទ្យាល័យចំនួន៤, បឋមសិក្សាចំនួន៤២សាលា, មត្តេយ្យចំនួន២សាលា។ ហើយការនាំយកកុំព្យូទ័រផ្តល់ជូនសាលារៀននៅស្រុកភ្នំស្រុកនេះគឺជាលើកទី២ហើយ លើកទី១ ផ្តល់ជូនសាលាចំនួន១៥សាលា, លើកទី២នេះ ផ្តល់ជូនចំនួន១៥សាលាបន្ថែមទៀត៕
