នាយឧត្តមសេនីយ៍ សែម សុវណ្ណនី ទទួលជួបពិភាក្សាការងារ ជាមួយឧបទូត និងជាអនុប្រធានបេសកកម្ម នៃស្ថានទូតជប៉ុនប្រចាំកម្ពុជា លើគម្រោងត្រីភាគី នៅមជ្ឈមណ្ឌលជាតិ

ភ្នំពេញ៖ លោក TANINAI Ichitomo ឧបទូត និងជាអនុប្រធានបេសកកម្មនៃស្ថានទូតជប៉ុនប្រចាំកម្ពុជា នាព្រឹកថ្ងៃទី១៩ ខែធ្នូ ឆ្នាំ២០២២ បានចូលជួបពិភាក្សាការងារហ្វឹកហ្វឺនលើគម្រោងត្រីភាគី ជប៉ុន អង្គការសហប្រជាជាតិ ( អសប ) និងកម្ពុជា ជាមួយឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិកាជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព ដើម្បីពង្រឹងកិច្ចសហប្រតិបត្តិការលើវិស័យរក្សាសន្តិភាព ក្រោមឆត្ររបស់អង្គការសហប្រជាជាតិ ។

ឯកឧត្តម នាយឧត្តមសេនីយ៍ សែម សុវណ្ណនី បានមានប្រសាសន៍ថា កម្ពុជា នឹងធ្វើជាម្ចាស់ផ្ទះនៃគម្រោងត្រីភាគី ជប៉ុន អ.ស.ប. និងកម្ពុជា ស្តីពីការហ្វឹកហ្វឺនប្រើប្រាស់គ្រឿងចក្រវិស្វកម្មធន់ធ្ងន់នាឆ្នាំ២០២៧ ដែលមានការចូលរួមពីបណ្តាប្រទេសអាស៊ាន និងក្នុងតំបន់ ។ គម្រោងនេះ រៀបចំឡើងក្នុងគោលបំណងផ្តល់ការគាំទ្រដល់ប្រទេសបរិច្ចាគកងកម្លាំងឱ្យធ្វើការចល័តបានយ៉ាងឆាប់រហ័ស និងមានគុណភាពខ្ពស់។ គម្រោងនេះផងដែរ ត្រូវបានផ្តួចផ្តើមឡើងដោយ ឯកឧត្តម Shinzo ABE នាយករដ្ឋមន្រ្តីនៃប្រទេសជប៉ុន នាកិច្ចប្រជុំកំពូលស្តីពីការរក្សាសន្តិភាពនៅទីបញ្ជាការ អ.ស.ប. កាលពីខែកញ្ញា ឆ្នាំ២០១៤កន្លងទៅ ។

ដើម្បីគាំទ្រដល់កម្ពុជាក្នុងការធ្វើជាម្ចាស់ផ្ទះនៃគម្រោងត្រីភាគីនាពេលខាងមុខ លោក TANINAI Ichitomo បានថ្លែងថា ជប៉ុន នឹងផ្តល់ការបណ្តុះបណ្តាលដល់កងកម្លាំងមួកខៀវកម្ពុជា និងបញ្ជូនក្រុមការងារដែលមានជំនាញខាងវិស្វកម្មមកកម្ពុជា ដើម្បីពិភាក្សាការរៀបចំវគ្គហ្វឹកហ្វឺនដល់កងកម្លាំងមួកខៀវកម្ពុជា។

លោក TANINAI Ichitomo រំពឹងថានឹងមានកិច្ចសហប្រតិបត្តិការកាន់តែច្រើនក្នុងវិស័យរក្សាសន្តិភាព ជាពិសេស ការបង្កើនកិច្ចសហប្រតិបត្តិការវិស័យបោសសំអាតមីននៅកម្ពុជា។

លោក TANINAI Ichitomo ក៏បានសម្តែងនូវការកោតសរសើរ និងវាយតម្លៃខ្ពស់ចំពោះកម្ពុជា ក្នុងការធ្វើជាម្ចាស់នៃកិច្ចប្រជុំកំពូលអាស៊ានលើកទី៤០ និង៤១។ ក្រៅពីនេះ លោកក៏បានកោតសរសើរកម្ពុជា ក្នុងការបញ្ជូនកងទ័ពមួកខៀវទៅបំពេញបេសកកម្មនៅក្រៅប្រទេស រួមទាំងសកម្មភាពបោសសំអាតមីនយ៉ាងសកម្មរបស់កម្ពុជា។

ឯកឧត្តម នាយឧត្តមសេនីយ៍ សែម សុវណ្ណនី ក៏បានថ្លែងអំណរ អរគុណយ៉ាងជ្រាលជ្រៅដល់ភាគីជប៉ុន ដែលតែងតែផ្តល់ជំនួយយ៉ាងច្រើនសន្ធឹកសន្ធាប់ដល់កម្ពុជា ទោះបីក្នុងឆ្នាំ ២០២២នេះ ជាខួបលើកទី៣០ ដែលជប៉ុនបានចូលរួមបំពេញបេសកកម្មសន្តិភាព UNTAC និងមានសមាជិក ២នាក់បានពលីជីវិតក្នុងពេលបំពេញការងារនៅកម្ពុជាផងដែរ ។

ឯកឧត្តម នាយឧត្តមសេនីយ៍ ក៏បានស្នើដល់ភាគីជប៉ុន ជួយផ្តល់ការងារហ្វឹកហ្វឺនរយៈពេលវែងឱ្យបានច្រើនទាំងគ្រូបង្គោល និងសិក្ខាកាមឆ្នើម ដើម្បីពង្រឹងសមត្ថភាព ចំណេះ និងជំនាញ ដើម្បីចូលរួមបំពេញបេសកកម្មសន្តិភាព ក្រោមឆត្ររបស់អង្គការសហប្រជាជាតិ អោយកាន់តែល្អប្រសើរថែមទៀត ៕