ប.ស.ស បើកកិច្ចប្រជុំពិភាក្សាស្តីពី “ប្រព័ន្ធសន្តិសុខសង្គម សម្រាប់បុគ្គលស្វ័យនិយោជន៍” ជាមួយតំណាងស្ថាប័នចំនួន២ ដែលជាដៃគូអភិវឌ្ឍន៍លើការងារនេះ

ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក បេឡាជាតិសន្តិសុខសង្គម (ប.ស.ស.) នាព្រឹកថ្ងៃទី១៩ ខែកញ្ញា ឆ្នាំ២០២២ នេះ បានអញ្ជើញផ្ដល់កិត្តិយសចូលរួមកិច្ចប្រជុំពិភាក្សាស្តីពី “ប្រព័ន្ធសន្តិសុខសង្គមសម្រាប់បុគ្គលស្វ័យនិយោជន៍” ដែលមានការចូលរួមពីតំណាង ហូមណេត ខេមបូឌា ហូមណេត អាស៊ីអាគ្នេយ៍ និងអង្គការស្ត្រីនៅក្នុងការងារក្រៅប្រព័ន្ធ ការធ្វើសកលភាវូបនីយកម្ម និងការរៀបចំ (WIEGO) នៅសាលប្រជុំធំ ស្នាក់ការកណ្ដាល ប.ស.ស. រាជធានីភ្នំពេញ។

ក្នុងឱកាសកិច្ចប្រជុំខាងលើ ឯកឧត្តមបណ្ឌិត បានថ្លែងថាៈ ប.ស.ស. បាននឹងកំពុងសិក្សាសមិទ្ធិលទ្ធភាពឥតឈប់ឈរជាមួយដៃគូអភិវឌ្ឍន៍នានា លើវិស័យសេដ្ឋកិច្ចក្រៅប្រព័ន្ធ ហើយកិច្ចប្រជុំពិភាក្សានាពេលនេះ ពិតជាមានសារៈសំខាន់ដើម្បីប្រមូលធាតុចូលសំខាន់ៗ ព្រមទាំងទិន្នន័យពាក់ព័ន្ធនឹងគម្រោងស្តីពី កិច្ចគាំពារសង្គមផ្នែកនវានុវត្តន៍សម្រាប់វិស័យសេដ្ឋកិច្ចក្រៅប្រព័ន្ធ (SPIN Project) ដើម្បីកំណត់អំពីកិច្ចសហការក្នុងការពង្រឹងគម្រោងសាកល្បងទៅដល់ក្រុមគោលដៅផ្សេងៗទៀត និងការប្រមូលព័ត៌មានលម្អិតពីការរៀបចំសិក្ខាសាលាអាស៊ានស្តីពី “ការចែករំលែកឧត្តមមានុវត្តក្នុងការអនុវត្តរបបសន្តិសុខសង្គមផ្នែកថែទាំសុខភាព និងផ្នែកប្រាក់សោធនសម្រាប់បុគ្គលស្វ័យនិយោជន៍” ដែលគ្រោងនឹងរៀបចំប្រព្រឹត្តទៅនៅខេត្តសៀមរាប នាដើមខែវិច្ឆិកាខាងមុខនេះ។

ជាមួយគ្នានេះ ឯកឧត្តមបណ្ឌិត បានថ្លែងអំណរគុណចំពោះតំណាង ហូមណេត ខេមបូឌា ហូមណេត អាស៊ីអាគ្នេយ៍ និងអង្គការស្រី្ដនៅក្នុងការងារក្រៅប្រព័ន្ធ៖ភាវូបនីយកម្ម និងការរៀបចំ (WIEGO) ដែលមានបំណងក្នុងការសហការ និងជួយឧបត្ថម្ភគាំទ្រដល់ ប.ស.ស. ដើម្បីពង្រីកវិសាលភាពប្រព័ន្ធសន្ដិសុខសង្គមឱ្យបានកាន់តែទូលំទូលាយទៅដល់កម្មករនិយោជិតនៃវិស័យក្រៅប្រព័ន្ធនេះផ្ទាល់តែម្ដង។

សូមបញ្ជាក់ថា៖ កិច្ចប្រជុំពិភាក្សាខាងលើប្រព្រឹត្តទៅតាមរយៈប្រព័ន្ធអនឡាញ នៅសាលប្រជុំធំនៃ ប.ស.ស. ដោយមានវត្តមានអញ្ជើញចូលរួមពីថ្នាក់ដឹកនាំ មន្រ្តី និងបុគ្គលិកនៃនាយកដ្ឋានសេវាអតិថិជន និងទំនាក់ទំនងសាធារណៈ នៃ ប.ស.ស. និងតំណាងហូមណេត ខេមបូឌា ហូមណេត អាស៊ីអាគ្នេយ៍ និងអង្គការស្រី្ត WEIGO ជាច្រើនរូប ៕