ឯកឧត្តម លន់ លឹមថៃ និងលោកជំទាវ អញ្ជើញចូលរួមពិធីកាន់បិណ្ឌវេនទី៦ នៅវត្តព្រះនគរអូដារមហាបុរីរាជ នៅឃុំទ្រាន ស្រុកកំពង់សៀម

ភ្នំពេញ៖ ឯកឧត្តម លន់ លឹមថៃ តំណាងរាស្ត្រមណ្ឌលខេត្តកំពង់ចាម និងជាលេខាធិការគណៈកម្មការទី៣ នៃរដ្ឋសភា ព្រមទាំងលោកជំទាវ នៅព្រឹកថ្ងៃទី១៦ ខែកញ្ញា ឆ្នាំ២០២២ បានអញ្ជើញចូលរួមកាន់បិណ្ឌវេនទី៦ នៅវត្តព្រះនគរអូដារមហាបុរីរាជ ស្ថិតនៅឃុំទ្រាន ស្រុកកំពង់សៀម ខេត្តកំពង់ចាម។

ក្នុងពិធីកាន់បិណ្ឌនេះ ឯកឧត្តមបាននាំនូវគ្រឿងឧបភោគ បរិភោគ ចង្ហាន់ និងបច្ច័យមកប្រគេនព្រះសង្ឃ និងបានសំណេះសំណាលជាមួយសីលវន្ត័ សីលវត្តី ពុទ្ធបរិស័ទចំណុះជើងវត្តចំនួន៨០នាក់។

ឯកឧត្តម លន់ លឹមថៃ បានពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

បន្ទាប់មក ឯកឧត្តមបានជម្រាបជូនពីសភាពការណ៍ថ្មីៗដែលកើតមាន ក៏ដូចជាសំណូមពរអោយប្រជាពលរដ្ឋមានការរស់នៅប្រកាន់ខ្ជាប់នូវអនាម័យអោយបានល្អ ដើម្បីជៀសផុតពីជំងឺនានា និងជំងឺកូវីត-១៩។ ដោយនៅឆ្នាំ២០២៣ខាងមុខនេះ គឺជាពេលវេលាត្រូវបោះឆ្នោតជ្រើសតាំងតំណាងរាស្ត្រនីតិកាទី៧ផងនោះ ឯកឧត្តមក៏បានសំណូមពរអោយប្រជាពលរដ្ឋទាំងអស់រួមគ្នាបន្តនូវការគាំទ្រដល់ការដឹកនាំរបស់សម្តេចតេជោធ្វើជានាយករដ្ឋមន្ត្រីនៅអាណត្ត្តិក្រោយៗ និងគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត ដើម្បីដឹកនាំនាវាកម្ពុជាឆ្ពោះទៅរកសុខសន្តិភាព និងការអភិវឌ្ឍរីកចម្រើនអោយបានយូអង្វែងបន្តទៀត។

ជាមួយគ្នានេះ ឯកឧត្តមក៏បានថ្លែងនូវអំណរគុណដល់បងប្អូនប្រជាពលរដ្ឋទាំងអស់ដែលតែងតែស្រលាញ់ជឿជាក់ និងទុកចិត្តអំពីការដឹកនាំដ៏ល្អរបស់គណបក្សប្រជាជនកម្ពុជា និងរួមគ្នាការពារនូវសុខសន្តិភាពមួយនេះអោយបានល្អជាបន្តទៅទៀត។

ជាចុងក្រោយនៅក្នុងឱកាសនោះដែរ ឯកឧត្តម លន់ លឹមថៃ និងលោកជំទាវ ក៏បានឧបត្ថម្ភគ្រឿងឧបភោគ បរិភោគ និងថវិកាដល់លោកតា លោកយាយ ដែលចូលរួមក្នុងម្នាក់ៗថវិកា ២មុឺនរៀល ប្រជាការពារ៤នាក់ ក្នុងម្នាក់ៗ ២មុឺនរៀល ប្រគេនព្រះសង្ឃ និង តាអាចារ្យវត្ត ៨០មុឺនរៀល និងបច្ច័យកសាងផ្លូវបេតុង ៨០មុឺនរៀល៕