ឯកឧត្តម គន់ គីម៖ អាជ្ញាធរឃុំសង្កាត់ទាំងអស់នៅក្នុងមូលដ្ឋានខេត្តឧត្ដរមានជ័យ គួរតែសម្របសម្រួលរឿងវិវាទ និងករណីក្មេងទំនើងឱ្យអស់លទ្ធភាព ចុងក្រោយទើបបញ្ជូនមកតុលាការ

ឧត្ដរមានជ័យ៖ ឯកឧត្តមកិត្តិសង្គហបណ្ឌិត គន់ គីម ប្រធានក្រុមការងាររាជរដ្ឋាភិបាលចុះមូលដ្ឋានខេត្តឧត្តរមានជ័យ បានបញ្ជាក់ថា អាជ្ញាធរឃុំសង្កាត់ទាំងអស់នៅក្នុងមូលដ្ឋានខេត្តឧត្ដរមានជ័យ គួរតែសម្របសម្រួលរឿងវិវាទ និងករណីក្មេងទំនើងឱ្យអស់លទ្ធភាព ចុងក្រោយទើបបញ្ជូនមកតុលាការ។

ការបញ្ជាក់ពីសំណាក់ឯកឧត្តម គន់ គីម បានធ្វើឡើងក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា ឆ្នាំ២០២៦ និងទិសដៅអនុវត្តបន្តរបស់ក្រុមការងាររាជរដ្ឋាភិបាលចុះមូលដ្ឋានខេត្តឧត្តរមានជ័យ នាព្រឹកថ្ងៃទី៣ ខែមិថុនា ឆ្នាំ២០២៦នេះ។

កិច្ចប្រជុំនេះក៏មានការចូលរួមពី ឯកឧត្តម មាន ចាន់យ៉ាដា អភិបាលខេត្តឧត្ដរមានជ័យ និង ឯកឧត្តម ស៊ី ប្រាសិទ្ធ ប្រធានក្រុមប្រឹក្សាខេត្ត រួមទាំងឯកឧត្ដម លោកជំទាវ លោក លោកស្រីជាច្រើនរូបទៀត។

មានប្រសាសន៍ក្នុងកិច្ចប្រជុំនេះ ឯកឧត្តមកិត្តិសង្គហបណ្ឌិត គន់ គីម បាននាំមកនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ដោយក្ដីនឹករលឹកបំផុត។

ក្នុងឱកាសនោះដែរឯកឧត្តម គន់ គីម បានកោតសរសើរចំពោះក្រុមការងាររាជរដ្ឋាភិបាល និងថ្នាក់ដឹកនាំខេត្តគ្រប់ជាន់ថ្នាក់ ដែលបានខិតខំប្រឹងប្រែងអនុវត្តតួនាទី ភារកិច្ចរបស់ខ្លួនយ៉ាងសកម្មស្របតាមគោលនយោបាយរបស់រាជរដ្ឋាភិបាល។

ឯកឧត្ដមបានស្នើដល់ថ្នាក់ដឹកនាំខេត្តគ្រប់ជាន់ថ្នាក់ និងមន្ទីរ-អង្គភាពជុំវិញខេត្ត ត្រូវបន្តពិនិត្យ និងធ្វើការដោះស្រាយរាល់បញ្ហាប្រឈមទាំងឡាយរបស់ប្រជាពលរដ្ឋឱ្យបានល្អប្រសើរជាអតិបរមា។

ក្នុងឱកាសនោះ ឯកឧត្តម មាន ចាន់យ៉ាដា អភិបាលខេត្តឧត្ដរមានជ័យ មានប្រសាសន៍ ពាក់ព័ន្ធនិងរឿងព្រំដែន ឯកឧត្តម បានណែនាំឱ្យបន្តតាមដានខ្ពស់បំផុតអំពីសភាពការណ៍ផ្សេងៗ ហើយត្រូវណែនាំឱ្យប្រជាពលរដ្ឋមានលានដ្ឋានសុវត្តភាពតាមផ្ទះ ហើយត្រូតពិនិត្យរៀបចំជុំរុំភៀសសឹកឱ្យបានល្អ និងពិនិត្យលើការងារជនភៀសសឹកដែលវិលទៅផ្ទះសំបែងនិងការហូបចុក ព្រមទាំងមុខរបប លើសពីនេះត្រូវពិនិត្យលើការងារផ្ទះថ្មីរបស់ជនភៀសសឹងដែលទើបទទួលបានផងដែរ៕