អភិបាលខេត្តកំពត អញ្ជើញចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋមកពីឃុំចំនួន២ នៃស្រុកទឹកឈូ

កំពត៖ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត នៅថ្ងៃទី៣ ខែមិថុនា ឆ្នាំ២០២៦នេះ បានអញ្ជើញជាអធិបតីភាពក្នុងពិធីប្រកាស និងចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) ជូនដល់បងប្អូនប្រជាពលរដ្ឋជាម្ចាស់អចលនទ្រព្យ មកពីឃុំចំនួន២ នៃស្រុកទឹកឈូ ខេត្តកំពត។

ការប្រកាសចែកវិញ្ញាបនបត្រសម្គាល់ម្ចាស់អចលនវត្ថុនាពេលនេះ គឺធ្វើឡើងសម្រាប់ភូមិចំនួន ៧ រួមមាន៖ ភូមិព្រៃថ្នង ភូមិចក្រីទីង និងភូមិដំណាក់ហ្លួង ស្ថិតក្នុងឃុំព្រៃថ្នង ព្រមទាំងភូមិគោចិនលែងភូមិត្រពាំងច្រាប ភូមិត្រសេកកោង និងភូមិថ្មី ស្ថិតក្នុងឃុំថ្មី ដោយមានក្បាលដីសរុបចំនួន ១៣,១៣១ ក្បាលដី ត្រូវបានប្រគល់ជូនទៅដល់ដៃប្រជាពលរដ្ឋផ្ទាល់ ដែលស្មើនឹង ៧,៨៦៦ គ្រួសារ។

សូមជម្រាបជូនថា ការផ្តល់ជូននាពេលនេះ គឺស្តែងចេញពីការយកចិត្តទុកដាក់ខ្ពស់បំផុតរបស់រាជរដ្ឋាភិបាលកម្ពុជា ក្នុងការគិតគូរពីសុខទុក្ខ និងអត្ថប្រយោជន៍ដ៏ឧត្តុង្គឧត្តមរបស់ប្រជាពលរដ្ឋ។ ការជំរុញការចុះបញ្ជីដីធ្លីលក្ខណៈជាប្រព័ន្ធ និងការផ្តល់ប្លង់រឹងកម្មសិទ្ធិនាពេលនេះ មិនត្រឹមតែផ្តល់នូវសិទ្ធិស្របច្បាប់ពេញលេញ និងសុវត្ថិភាពខ្ពស់លើការកាន់កាប់ដីធ្លីប៉ុណ្ណោះទេ ប៉ុន្តែថែមទាំងជាយន្តការដ៏សំខាន់របស់រាជរដ្ឋាភិបាល ក្នុងការកាត់បន្ថយទំនាស់ដីធ្លី បង្កើនភាពកក់ក្តៅក្នុងសង្គម ព្រមទាំងលើកកម្ពស់កម្រិតជីវភាពរស់នៅរបស់បងប្អូនប្រជាពលរដ្ឋនៅតាមមូលដ្ឋានឱ្យកាន់តែរឹងមាំ និងរីកចម្រើនជាលំដាប់ផងដែរ៕