ភ្នំពេញ៖ កម្លាំងកងរាជអាវុធហត្ថឈរជើងគោលដៅការពារទំនប់វារីអគ្គីសនីសេសានក្រោម២ ដឹកនាំដោយលោក វរសេនីយ៍ត្រី ម៉ែន សាម៉ុន បានឃាត់រថយន្តកែច្នៃ១គ្រឿងដែលកំពុងដឹកឈើប្រណិត(ប្រភេទឈើតាត្រាវ) ចំនួន៤២សន្លឹក-ដុំ ស្មើនឹង៤,៧៧៤ ម៉ែត្រគូប និងជនសង្ស័យម្នាក់ឈ្មោះ លី ទី ភេទប្រុស អាយុ៣៥ឆ្នាំ ជនជាតិខ្មែរ មុខរបររត់ឡានតាក់ស៊ី មានទីលំនៅភូមិហាន់ជ័យ ឃុំហាន់ជ័យ ស្រុកឆ្លូង ខេត្តក្រចេះ។
ការឃាត់នេះបានធ្វើឡើង នៅម៉ោង០៧:៣៣នាទី ថ្ងៃទី១២ ខែកញ្ញា ឆ្នាំ២០២២ ចំណុចចុងទំនប់វារីអគ្គីសនី សេសានក្រោម២ ស្ថិតក្នុងភូមិភ្លុក ឃុំភ្លុក ស្រុកសេសាន ខេត្តស្ទឹងត្រែង។
ជនសង្ស័យខាងលើនេះបានសារភាពថា ឈើក្នុងរថយន្តទាំងអស់គឺជារបស់ឪពុក និងម្តាយបង្កើតរបស់ខ្លួន ដែលឪពុកឈ្មោះ លី រ៉ុង និង ម្តាយឈ្មោះ វូ គឹមហ៊ាន មានទីលំនៅភូមិហាន់ជ័យទី១ ឃុំហាន់ជ័យ ស្រុកឆ្លូង ខេត្តក្រចេះ ជនសង្ស័យទាំង២នាក់ប្តី ប្រពន្ធ បានចូលខ្លួនមកបង្ហាញចំពោះមុខសមត្ថកិច្ច។
ករណីរថយន្តខាងលើនេះមានប្រជាពលរដ្ឋបានរាយការណ៍មកសមត្ថកិច្ចជាច្រើនលើកថា ធ្លាប់បានដឹកដំឡូង បង្កប់ឈើ និងដឹកឧបរណ៍ខួងអណ្តូងបង្កប់ឈើ សមត្ថកងរាជអាវុធហត្ថបានធ្វើការ ស្រាវជ្រាវរហូតដល់ បង្ក្រាបជាក់ស្តែងឃើញថា ជនសង្ស័យបានកែច្នៃរថយន្តដាក់ឈើមានលក្ខណ:បច្ចេកទេស ខ្ពស់ធ្វើឱ្យសមត្ថកិច្ច ពិបាកក្នុងការស្រាវជ្រាវបង្ក្រាប។
បច្ចុប្បន្នវត្ថុតាង និងជនសង្ស័យបានប្រគល់ឱ្យរដ្ឋបាលព្រៃឈើចាត់ការបន្តតាមនីតិវិធី៕
