លោកជំទាវ ម៉ុម ថានី ចុះសួរសុខទុក្ខ និងនាំយកអំណោយរបស់ក្រសួងបរិស្ថាន ចែកជូនមន្ត្រីឧទ្យានុរក្ស ប្រចាំការនៅស្នាក់ការចំនួន៩ ក្នុងស្រុកឱរ៉ាល់
ភ្នំពេញ៖ លោកជំទាវ ម៉ុម ថានី រដ្ឋលេខាធិការ និងជាប្រធានសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន នៅរសៀល ថ្ងៃទី១២ ខែកញ្ញា ឆ្នាំ២០២២ បានដឹកនាំក្រុមការងារស្ត្រី ចុះសួរសុខទុក្ខ និងនាំយកអំណោយជាគ្រឿងបរិភោគរបស់ក្រសួងបរិស្ថាន ចែកជូនមន្ត្រីឧទ្យានុរក្ស ដែលប្រចាំការនៅស្នាក់ការចំនួន៩ ក្នុងស្រុកឱរ៉ាល់ ខេត្តកំពង់ស្ពឺ ដោយមានការចូលរួមពីលោកជំទាវ ឡុង បូណារេត អភិបាលរង នៃគណៈអភិបាលខេត្តកំពង់ស្ពឺ និងជាប្រធានសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ស្ពឺ។
លោកជំទាវរដ្ឋលេខាធិការបានមានប្រសាសន៍ថា ដោយមានការយកចិត្តទុកដាក់ពីឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន និងលោកជំទាវ ឌិត នីតា ក្នុងឱកាសបុណ្យភ្ជុំបិណ្ឌនេះ លោកទាំងពីរ បានផ្ដាំផ្ញើសួរសុខទុក្ខ ព្រមទាំងផ្ញើរជូននូវអំណោយជាគ្រឿងបរិភោគ រួមមាន ៖ អង្ករ(៥០គីឡូ)៩បាវ ត្រីខ១៨ឡូ មី១៨កេស ទឹកត្រី១៨យួរ ទឹកស៊ីអ៉ីវ១៨យួរ ជូនមន្ត្រីឧទ្យានុរក្សសរុបចំនួន៣៦នាក់ ដែលប្រចាំការនៅស្នាក់ការទាំង០៩ ក្នុងស្រុកឱរ៉ាល់ រួមមាន៖ ១. ស្នាក់ការដែនជម្រកសត្វព្រៃភ្នំឱរ៉ាល់ (កណ្ដាល) ២. ស្នាក់ការរងទេទឹកពុះ ៣. ស្នាក់ការរងអន្លង់អង្គញ់ ៤. ស្នាក់ការរងខ្សាល់ ៥. ស្នាក់ការរងជាំ ៦. ស្នាក់ការរងអូរត្រាវ ៧. ស្នាក់ការរងពោធិ៍មាស ៨. ស្នាក់ការរងស្រែកិន និង៩. ស្នាក់ការរងជ្រាវ។
បន្ទាប់ពីប្រគល់អំណោយដល់មន្ត្រីឧទ្យានុរក្ស ក្រុមប្រតិភូបានទស្សនាថ្នាលបណ្ដុះកូនឈើក្នុងស្នាក់ការ ដែនជម្រកសត្វព្រៃភ្នំឱរ៉ាល់៕
