ឯកឧត្តម កើត រិទ្ធ អនុញ្ញាតឱ្យ ប្រធានវិទ្យាស្ថានអាស៊ី និងចុងបូព៌ារបស់ UNAFEI ចូលជួបសម្តែងការគួរសម និងពិភាក្សាការងារ

ភ្នំពេញ៖ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ នាព្រឹកថ្ងៃទី៦ ខែកញ្ញា ឆ្នាំ២០២២ នេះ បានអនុញ្ញាតឱ្យ លោក MORINAGA TARO ជាប្រធាន និងគណៈប្រតិភូ នៃ UNAFEI ចូលជួបសម្តែងការគួរសម និងពិភាក្សាការងារ។

កិច្ចពិភាក្សានៅក្នុងជំនួបនេះ បានផ្តោតសំខាន់លើការងារមួយចំនួនដែលពាក់ព័ន្ធនឹងការពង្រីកកិច្ចសហប្រតិបត្តិការផ្នែកច្បាប់ក្នុងវិស័យព្រហ្មទណ្ឌ។

ថ្លែងក្នុងជំនួបនេះ, លោក MORINAGA TARO បានលើកឡើងអំពីគោលបំណងនៃការស្នើសុំជួបឯកឧត្តមរដ្ឋមន្រី្តនៅពេលនេះ ម្យ៉ាង ដើម្បីជួបសម្តែងការគួរសមជាមួយឯកឧត្តមរដ្ឋមន្ត្រី និងម្យ៉ាងទៀត ដើម្បីសិក្សាស្វែងយល់ឱ្យកាន់តែស៊ីជម្រៅបន្ថែមទៀតអំពីប្រព័ន្ធយុត្តិធម៌ព្រហ្មទណ្ឌកម្ពុជា រួមទាំងដើម្បីពិនិត្យលទ្ធភាពអំពីការពង្រីកកិច្ចសហប្រតិបត្តិការរវាង UNAFEI និងក្រសួងយុត្តិធម៌កម្ពុជា។

មានប្រសាសន៍ក្នុងឱកាសជំនួបនេះ, ឯកឧត្តមរដ្ឋមន្រ្តី បានថ្លែងអំណរគុណចំពោះ UNAFEI ដែលបានអញ្ជើញថ្នាក់ដឹកនាំ និងមន្ត្រីជំនាញនៃក្រសួងយុត្តិធម៌ ទៅទស្សនកិច្ចសិក្សានៅប្រទេសជប៉ុនកន្លងទៅថ្មីៗនេះ។

ឯកឧត្តមរដ្ឋមន្រ្តី បានជម្រាបជូនលោក MORINAGA TARO អំពីកិច្ចដំណើរការនៃប្រព័ន្ធយុត្តិធម៌ព្រហ្មទណ្ឌកម្ពុជា និងបានគូសរំលេចអំពីស្ថានភាពជាក់ស្តែងមួយចំនួនរបស់សង្គមកម្ពុជា ពាក់ព័ន្ធនឹងការអនុវត្តទោស ក៏ដូចជាបញ្ហាប្រឈមមួយចំនួនដែលអាចនឹងកើតមានឡើងក្នុងករណីដែលទោសការងារសហគមន៍ត្រូវបានដាក់ឱ្យអនុវត្តក្នុងពេលចំពោះមុខនេះ។