បទអត្ថាធិប្បាយ៖ ការដំឡើងពន្ធថ្នាំជក់នឹងជួយសម្រាលបន្ទុករាជរដ្ឋាភិបាលនិងកាត់បន្ថយការប្រើប្រាស់ថ្នាំជក់
ភ្នំពេញ៖អ្នកជំនាញពាក់ព័ន្ធបានលើកឡើងថា ការដំឡើងពន្ធថ្នាំជក់នឹងជួយសម្រាលបន្ទុករាជរដ្ឋាភិបាល ជាពិសេសអាចកាត់បន្ថយការប្រើប្រាស់ថ្នាំជក់ឱ្យមកនៅកម្រិតទាប ខណៈដែលការប្រើប្រាស់ថ្នាំជក់បង្កឱ្យខាត់បង់សេដ្ឋកិច្ច និងប៉ះពាល់ដល់សុខភាពធ្ងន់ធ្ងរ ដែលជាបន្ទុកសម្រាប់រាជរដ្ឋាភិបាលត្រូវដោះស្រាយ។
ថ្លែងក្នុងសិក្ខាសាលាស្ដីពីវិធានការមានប្រសិទ្ធភាពកាត់បន្ថយហានិភ័យបណ្ដាលមកពីការប្រើប្រាស់ថ្នាំជក់ នាព្រឹកថ្ងៃទី ២៥ ខែសីហា ឆ្នាំ២០២២ នៅមណ្ឌលគរុកោសល្យភូមិភាគហ៊ុនសែន ខេត្ដកណ្ដាលលោកជំទាវ សាន អរុណ អនុប្រធានសមាគមនារីកម្ពុជា ដើម្បីសន្ដិភាព និងអភិវឌ្ឍន៍មានប្រសាសន៍ថា ការដំឡើងពន្ធលើផលិតផលថ្នាំជក់ និងជួយធ្វើឱ្យប្រជាពលរដ្ឋឈប់ចំណាយថវិកា ទិញបារី និងចៀសផុតពីជំងឺផ្សេងៗ។ការប្រើប្រាស់ថ្នាំជក់បង្កឱ្យមានបញ្ហាសុខភាពធ្ងន់ធ្ងរ និងមានទំហំធំធេង ដែលជាបន្ទុកសម្រាប់រាជរដ្ឋាភិបាលដោះស្រាយ។
លោកជំទាវ បណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡាបានចាត់ទុកថា បារីពិតជាបានគ្រោះថ្នាក់ដល់អ្នកប្រើប្រាស់ដូច្នេះលោកជំទាវបានណែនាំឱ្យយុវជនទាំងអស់កុំប្រើប្រាស់បារី ហើយក៏លោកជំទាវ ក៏បានទឹកចិត្តដល់រាជរដ្ឋាភិបាលឱ្យដំឡើងពន្ធលើផលិតផលថ្នាំជក់នេះផងដែរ។
លោក វេជ្ជបណ្ឌិត មុំ គង់ នាយកប្រតិបត្ដិអង្គការចលនាដើម្បីសុខភាពកម្ពុជា បានឱ្យដឹងថា ការដំឡើងពន្ធថ្នាំជក់នេះ គឺជាវិធានការឈ្នះ ឈ្នះ ទាំងអស់គ្នា សម្រាប់សុខភាពសាធារណៈ និងសម្រាប់រាជរដ្ឋាភិបាលគឺ ការដំឡើងពន្ធលើផលិតផលថ្នាំជក់។ ការដំឡើងពន្ធនឹងជួយឱ្យប្រជាពលរដ្ឋឈប់ចំណាយថវិកាទិញបារី និងកាត់បន្ថយយុវជនពីការចង់សាកល្បងប្រើប្រាស់បារីផងដែរ។ មានន័យថាយើងអាចបង្ការពួកគាត់ពីការឈឺ ស្លាប់ ពិការដែលបង្កពីការប្រើប្រាស់ថ្នាំជក់បាន។ ម្យ៉ាងវិញទៀតរដ្ឋាភិបាលនឹងទទួលបានចំណូលពន្ធបន្ថែមផងដែរ។
តាមបទពិសោធន៍របស់ប្រទេសក្នុងតំបន់អាស៊ាន ដូចជា ថៃ ហ្វីលីពីន សិង្ហបុរី បានបង្ហាញថា ការដាក់ចេញនូវវិធានការដំឡើងពន្ធថ្នាំជក់ ធ្វើឱ្យរដ្ឋាភិបាលទទួលបានចំណូលពន្ធកើនឡើង ព្រមទាំងជួយបង្ការប្រជាពលរដ្ឋពីជំងឺដែលបង្កដោយការប្រើប្រាស់ថ្នាំជក់ទៀតផង។
ជាងនេះទៅទៀត កម្ពុជាជាសមាជិកនៃអនុសញ្ញាស្តីពីការត្រួតពិនិត្យផលិតផលថ្នាំជក់ ហេតុនេះការដំឡើងពន្ធថ្នាំជក់ក៏ជាកាតព្វកិច្ចមួយរបស់កម្ពុជាក្នុងនាមជារដ្ឋភាគីផងដែរ។ ទាក់ទងនឹងការដំឡើងពន្ធថ្នាំជក់នេះដែរ ការស្ទង់មតិរបស់សកលវិទ្យាល័យជាតិមានជ័យកាលពីឆ្នាំ ២០២១ បានបង្ហាញថា ប្រជាពលរដ្ឋកម្ពុជារហូតដល់ ៩៤% គាំទ្រឱ្យមានការដំឡើងពន្ធថ្នាំជក់ ហើយពួកគាត់បានសម្តែងមតិថា ពន្ធថ្នាំជក់គួរតែមានអត្រា ជាមធ្យមប្រមាណ ៦០%ធៀបតម្លៃលក់រាយ។
កញ្ញា យ័ន្ដ សូឡា គរុនិស្សិត នៃមណ្ឌលគរុកោសល្យភូមិភាគហ៊ុន សែន ខេត្ដកណ្ដាលបានគាំទ្រការដំឡើងពន្ធផលិតផលថ្នាំជក់ ហើយបានស្នើឱ្យប្រជាពលរដ្ឋទាំងអស់ឈប់ប្រើថ្នាំជក់នេះ ព្រោះបានធ្វើឱ្យខាតថវិកា និងធ្វើឱ្យកើតជំងឺជាច្រើន។
តំណាងក្រសួងសេដ្ឋកិច្ច និងហិរញ្ញវត្ថុ ដែលបានចូលរួមសិក្ខាសាលានេះ បានឱ្យដឹងថា រាជរដ្ឋាភិបាលបានកំពុងគិតគូរបញ្ហានេះដែរហើយ គ្រាន់តែទាមទារពេលវេលា និងសិក្សាផលប៉ះពាល់ឱ្យបានច្បាស់លាស់សិន ខណៈដែលការដំឡើងពន្ធនេះ រាជរដ្ឋាភិបាលមិនអាចមើលតែមួយជ្រុងបានទេ គឺត្រូវធ្វើជាកញ្ចប់ លើវិស័យពាក់ព័ន្ធទាំងអស់។
បើតាមអង្គការសុខភាពពិភពលោក ជារៀងរាល់ឆ្នាំកម្ពុជាខាតបង់ថវិកាប្រមាណ ៦៦៣លានដុល្លារសហរដ្ឋអាមេរិក ស្មើនឹង៣% នៃ GDP ដោយសារតែការប្រើប្រាស់ថ្នាំជក់។ ប្រជាពលរដ្ឋប្រមាណ ១៥ ០០០ ស្លាប់ដោយសារតែជំងឺដែលបង្កពីការប្រើប្រាស់ថ្នាំជក់ រួមមានជំងឺដាច់សរសៃខួរក្បាល សរសៃឈាមបេះដូង ផ្លូវដង្ហើមរ៉ាំរ៉ៃ មហារីក និងទឹកនោមផ្អែម ជាដើម។
គួរបញ្ជាក់ផងដែរថា បច្ចុប្បន្នប្រទេសកម្ពុជាមានអត្រាពន្ធថ្នាំជក់ទាបគឺត្រឹមតែ២៥% ទៅ៣១% ធៀបតម្លៃលក់រាយ ខណៈដែលប្រទេសថៃ ប្រុយណេ សិង្ហបុរី ឥណ្ឌូណេស៊ី ម៉ាឡេស៊ី ហ្វីលីពី ភូមា សុទ្ធតែមាន អត្រាខ្ពស់ជាង ៥០%ធៀបតម្លៃលក់រាយ ៕ អត្ថបទវិទ្យុមិត្តភាពកម្ពុជាចិន
