លោកជំទាវ ឱ វណ្ណឌីន៖ សារៈសំខាន់នៃការចាក់វ៉ាក់សាំងកូវីដ-១៩ គឺកាត់បន្ថយភាពធ្ងន់ធ្ងរនៃជំងឺ និងបន្ថយអត្រាមរណភាពបានខ្ពស់
ភ្នំពេញ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈ កម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) បានមានប្រសាសន៍ថា សារៈសំខាន់នៃការចាក់វ៉ាក់សាំងកូវីដ-១៩ គឺកាត់បន្ថយភាពធ្ងន់ធ្ងរនៃជំងឺ និងបន្ថយអត្រាមរណភាពបានខ្ពស់។
លោកជំទាវបានមានប្រសាសន៍បែបនេះ នៅក្នុងពេលអញ្ជើញជាគណៈអធិបតី ក្នុងអង្គសិក្ខាសាលាស្ដីពី ការរៀបចំផែនការជំរុញការចាក់វ៉ាក់សាំងកូវីដ-១៩ ដូសជំរុញ (ទី៣ ទី៤ និងទី៥) នាថ្ងៃសុក្រ ទី១៩ ខែសីហា ឆ្នាំ២០២២
លោកជំទាវវេជ្ជបណ្ឌិត ឱ វណ្ណឌីន បានបញ្ជាក់ថា សារៈសំខាន់នៃការចាក់វ៉ាក់សាំងកូវីដ-១៩ គឺកាត់បន្ថយភាពធ្ងន់ធ្ងរនៃជំងឺ និងបន្ថយអត្រាមរណភាពបានខ្ពស់ និងបានអំពាវនាវឱ្យបន្តការ អនុវត្តអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្រ្តី គឺ “៣ការពារ និង៣កុំ” ដើម្បីទប់ស្កាត់ ការចម្លងជំងឺកូវីដ-១៩ និងបន្តរៀនរស់នៅជាមួយរស់នៅជាមួយ កូវីដ-១៩ តាមបែបគន្លងថ្មី ដែលនាំឱ្យមានការងើបឡើងវិញនៃវិស័យសេដ្ឋកិច្ច និងការអភិវឌ្ឍនៅក្នុងព្រះរាជាណាចក្រកម្ពុជា ផងដែរ។
ជាមួយគ្នានោះលោកជំទាវ ក៏បានជំរុញលើកទឹកចិត្ត នឹងផ្ដល់នូវវិធានការមួយចំនួនដល់ រដ្ឋបាលរាជធានី-ខេត្ត ព្រមទាំងក្រុមការងារចាក់វ៉ាក់សាំងកូវីដ-១៩ ទាំងអស់ ក្នុងការពង្រីក និងពង្រឹង នូវការងារចាក់វ៉ាក់សាំង ដូសជំរុញជូនដល់ប្រជាពលរដ្ឋឱ្យបានគ្រប់ៗគ្នា ដើម្បីបង្កើនភាពសាំង សហគមន៍ឱ្យបានរឹងមាំ៕
