រដ្ឋមន្ត្រីមហាផ្ទៃ៖ ហេតុការណ៍គ្រោះថ្នាក់ចរាចរណ៍រយៈពេល ៦ខែដើម ឆ្នាំនេះ បានតម្រូវឱ្យមានការត្រួតពិនិត្យនូវ ចំណុចអវិជ្ជមានទាំងឡាយឡើងវិញ
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គណៈកម្មាធិការជាតិសុវត្ថិភាពចរាចរណ៍បានលើកឡើងថា ហេតុការណ៍គ្រោះថ្នាក់ចរាចរណ៍ រយៈពេល៦ខែដើមឆ្នាំ២០២២នេះ បានតម្រូវឱ្យមានការត្រួតពិនិត្យនូវចំណុចអវិជ្ជមានទាំង ឡាយឡើងវិញ ដើម្បីដកពិសោធន៍យកមកដោះស្រាយបញ្ហាប្រឈម ក្នុងនោះដូចជាមូល ហេតុនៃគ្រោះថ្នាក់ដោយសារការបើកបរលើសល្បឿនកំណត់ និងការមិនពាក់មួក សុវត្ថិភាព ជាដើម។
ថ្លែងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២២ នៅក្រសួងសាធារណការ និងដឹកជញ្ជូននៅ ថ្ងៃទី១៨ ខែសីហានេះ សម្តេចក្រឡាហោម បានគូសបញ្ជាក់ថា «យើងប្រមូលផ្ដុំបញ្ហាដើម្បី ឈានទៅដោះស្រាយឱ្យចំបញ្ហានោះ។ យើងផ្សព្វផ្សាយ និងអប់រំប្រជាពលរដ្ឋទូទៅវាជាការ ចាំបាច់ហើយ ប៉ុន្តែយោបល់ខ្ញុំ គឺថាអ្នកដែលពាក់ព័ន្ធផ្ទាល់តែម្ដង ត្រូវត្រួតពិនិត្យ អប់រំ និងអនុវត្តន៍វិន័យ និងច្បាប់ឱ្យតឹងរឹង»។
សម្តេច បានអះអាងថា គិតជាមធ្យមក្នុងមួយថ្ងៃមានគ្រោះថ្នាក់ចរាចរណ៍កើតឡើង ៩លើក ស្លាប់៥នាក់ និងរបួស១០នាក់។ ត្រង់ចំណុចនេះ សម្តេច ថា ស្ថានភាពនេះ ដោយ សារតែកំណើននៃការធ្វើចរាចរណ៍តាមដងផ្លូវ នៅពេលដែលកម្មភាពសេដ្ឋកិច្ច និងសង្គមមាន ដំណើរការឡើងវិញកាន់តែច្រើន។
សម្ដេច បានបន្ថែមថា បើប្រៀបធៀបស្ថានភាពចរាចរណ៍កម្ពុជា ជាមួយស្ថានភាព ចរាចរណ៍ជាសកលឃើញថា រយៈពេល១០ឆ្នាំ ពីឆ្នាំ២០១១ដល់ ឆ្នាំ២០២០ កម្ពុជាបានកាត់ បន្ថយអ្នកស្លាប់ចំនួន៤ពាន់៧២០នាក់ ស្មើ៦៤ភាគរយ នៃចំនួនអ្នកស្លាប់តាមការព្យាការណ៍។ យ៉ាងណាក៏ដោយ សម្ដេចបន្តថា គណៈកម្មាធិការជាតិសុវត្ថិភាពចរាចរណ៍ផ្លូវគោកបានចាត់ ទុកហេតុការណ៍នៃគ្រោះថ្នាក់ និងជនរងគ្រោះដោយគ្រោះថ្នាក់ចរាចណ៍នេះថានៅ តែជាបញ្ហាប្រឈមទាមទារការយកចិត្តទុកដាក់ដោះស្រាយឱ្យមានប្រសិទ្ធភាព និងប្រកប ដោយការទទួលខុសត្រូវ។
ពាក់ព័ន្ធនឹងបញ្ហាគ្រោះថ្នាក់ចរាចរណ៍នេះដែរ លោកជំទាវ មិន មាណាវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាព ចរាចរណ៍ផ្លូវគោក បានឱ្យដឹងថា ក្នុងរយៈពេល៦ខែ ឆ្នាំ២០២២នេះ មានគ្រោះថ្នាក់ចរាចរណ៍ ទូទាំងប្រទេសកើតឡើងសរុប១ពាន់៦០៩លើក ក្នុងនោះកើតឡើងពេលយប់មានដល់ ទៅ៥៧ភាគរយ និងក្នុងចំណោមជនរងគ្រោះសរុប មានស្លាប់៩៤២នាក់ ស្មើនឹង៣០ភាគរយ នៃជនរងគ្រោះ អ្នករងរបួសសរុបមានជាង២ពាន់២០០នាក់ ក្នុងនោះរបួសធ្ងន់ជាង១ពាន់នាក់ ខណៈមូលហេតុនៃគ្រោះថ្នាក់រួមមានល្មើសល្បឿន៣៨ភាគរយ បើកបរមិនគោរពសិទ្ធិ អាទិភាព២៤ភាគរយ មិនប្រកាន់ស្ដាំ១១ភាគរយ ជែង១១ភាគរយ បត់ក្នុងស្ថានភាព គ្រោះថ្នាក់១១ភាគរយ ស្រវឹង៣ភាគរយ យានយន្ត២ភាគរយ និងងងុយគេង១ភាគរយ។
លោកជំទាវរដ្ឋលេខាធិការបន្តថា រថយន្តដែលបានត្រួតពិនិត្យក្នុងរយៈពេល ៦ខែ ចំនួន១ម៉ឺន ៨ពាន់ ៦៤៤គ្រឿងវិញ រួមមានរថយន្តធុនធ្ងន់ជាង២ពាន់គ្រឿង ល្បឿន ៣០ភាគរយ ល្មើសសញ្ញាចរាចរណ៍១១ភាគរយ ល្មើសប្រើទូរស័ព្ទ១០ភាគរយ ល្មើសគ្មាន ប័ណ្ណបើកបរ៤ភាគរយ ល្មើសគ្មានស្លាកលេខ៤ភាគរយ ល្មើសដឹកលើស ចំណុះ២ភាគរយ ស្រវឹង១ភាគរយ គ្មានឆៀក១ភាគរយ គ្មានប័ណ្ណអាជីវកម្ម១ភាគរយ និងល្មើស មិនពាក់ខ្សែ ក្រវាត់សុវត្ថិភាព៣៦ភាគរយ។ បើគិតជាទឹកប្រាក់សរុប នៃការផាកពិន័យវិញមានចំនួន ៧ពាន់ ៥៦០លាន ២៦៥ពាន់រៀល៕ ប្រភព៖ ក្រសួងព័ត៌មាន
