ឧត្តមសេនីយ៍ទោ សោម ស៊ុន៖ កងទ័ពត្រូវតែស្មោះត្រង់ ដាច់ខាតចំពោះជាតិ សាសនា ព្រះមហាក្សត្រ ការពាររាជរដ្ឋាភិបាលស្របច្បាប់ និងបម្រើប្រជាជន ដោយឥតលក្ខខណ្ឌ
ភ្នំពេញ៖ ក្នុងអង្គប្រជុំបូកសរុបលទ្ធផលការងារអប់រំចិត្តសាស្រ្ត ពង្រឹងវិន័យ តួនាទីភារកិច្ចរបស់កងយោធពលខេមរភូមិន្ទ ប្រចាំខែសីហា និងដាក់ចេញទិសដៅប្រចាំខែកញ្ញា ឆ្នាំ២០២២ នាថ្ងៃទី១៥ សីហានេះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងថា យោធិន គ្រប់ រូប ត្រូវស្មោះតែស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ការពាររាជរដ្ឋាភិបាលស្របច្បាប់ ការពារ អធិតេយ្យភាពជាតិ និងត្រូវបម្រើប្រជាជន ដោយស្មោះត្រង់និងដោយឥតលក្ខខណ្ឌ។
លោកវរសេនីយ៍ទោ នួន គឹមអាង នាយលេខាធិការដ្ឋាន និងជាប្រធានក្រុមការងារបូកសរុបលទ្ធផលការងារអប់រំចិត្តសាស្ត្រ និង ពង្រឹង វិន័យ តួនាទី ភារកិច្ច របស់ កងយោធពលខេមរភូមិន្ទ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងរាយការណ៍អំពីលទ្ធផលនៃការអនុវត្តបានប្រចាំខែសីហា លើការងារអប់រំចិត្តសាស្ត្រ ពង្រឹងវិន័យ តួនាទីភារកិច្ចរបស់កងយោធពលខេមរភូមិន្ទ ដែលបានអនុវត្តកន្លងមក ទទួលបានលទ្ធផលល្អប្រសើរ ដោយ យោធិនគ្រប់រូបមានមនសិការស្នេហាជាតិ ឆន្ទៈមោះមុត ក្នុងការគោរពវិន័យ ការចាត់តាំង និង បាន បំពេញ តួនាទីភារកិច្ចរបស់កងយោធពលខេមរភូមិន្ទ និងប្ដេជ្ញាចិត្តដាច់ខាត ក្នុងការការពារជាតិសាសនា ព្រះមហាក្សត្រ ការពាររាជរដ្ឋាភិបាលស្របច្បាប់ ដែលបានប្រសូត្រចេញពីការបោះឆ្នោតនិងបានអាននូវទិសដៅសម្រាប់អនុវត្តបន្តប្រចាំខែកញ្ញា ឆ្នាំ២០២២ ដើម្បីដាក់ជូនអង្គប្រជុំពិភាក្សាបំពេញបន្ថែម ផងដែរ ។
ឧត្តមសេនីយ៍ត្រី ង៉ាង ស មេបញ្ជាការរងទទួលបន្ទុកការងារអប់រំចិត្តសាស្ត្រនិងច្បាប់ បានមានមតិអំពីកិច្ចខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់ និងផ្នែកជំនញការងារអប់រំចិត្តសាស្ត្រគ្រប់បណ្តាអង្គភាព ដែលបានខិតខំប្រឹងប្រែងយកអស់ចិត្ត ផ្សព្វផ្សាយ រាល់ខ្លឹមសារ ឯកសារ សេចក្តីណែនាំផ្សេងៗ របស់រាជរដ្ឋាភិបាល និង កងយោធពលខេមរភូមិន្ទ ជូន ដល់ យោធិន ចំណុះឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំបានល្អ ជាលទ្ធផល យោធិនគ្រប់រូប ចំណុះឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំ មិនមានយោធិនណាម្នាក់ល្មើសវិន័យ ច្បាប់របស់រដ្ឋនិងបទវិន័យទូទៅរបស់កងយោធពលខេមរភូមិន្ទ ឡើយ។ ហើយបានបំពេញតាមតួនាទីភារកិច្ច តាមឋានានុក្រម ដែលថ្នាក់លើបានប្រគល់ជូន ។
ឧត្តមសេនីយ៍ទោ សោម ស៊ុន បាន ថ្លែងនូវការកោតសរសើរចំពោះថ្នាក់ដឹកនាំគ្រប់លំដាប់ថ្នាក់មេបញ្ជាការគ្រប់កងឯកភាព នាយទាហាន ដែលបានបំពេញភារកច្ចក្នុងការងារអប់រំចិត្តសាស្ត្រ ក្នុង តួនាទីភារកិច្ចរបស់ខ្លួនបានយ៉ាងល្អប្រសើរ។ ហើយ យោធិន គ្រប់ រូប ត្រូវស្មោះតែស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ការពាររាជរដ្ឋាភិបាលស្របច្បាប់ ការពារ អធិតេយ្យភាពជាតិ និងត្រូវបម្រើប្រជាជន ដោយស្មោះត្រង់និងដោយឥតលក្ខខណ្ឌ។
ឧត្តមសេនីយ៍ទោ សោម ស៊ុន បានប្រគល់ភារកិច្ចដល់ថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់កងឯកភាព នាយស្ថាប័នទាំងអស់ត្រូវតែខិតខំបន្តផ្សព្វផ្សាយអប់រំអំពីខ្លឹមសារការងារអប់រំចិត្តសាស្ត្រ ឲ្យបាន ស៊ី ជំរៅ និង ជាប្រចាំជូនកងទ័ពជាបន្តបន្ទាប់ ដើម្បីលើកស្ទួយមនសិការស្នេហាជាតិ ឆន្ទៈមោះមុត ក្នុងបុព្វហេតុបម្រើជាតិ ថែរក្សា ឲ្យ បាន សុខ សន្តិភាព ដែល យើង កំពុង មាន សព្វ ថ្ងៃ នេះ ឲ្យ នៅ គង់វង្ស ជារៀងរហូត ។
ឧត្ដមសេនីយ៍ ទោសោម ស៊ុន រួម ទាំង កងទ័ពទាំងអស់ ចំណុះឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំ សូមប្រកាសគាំទ្រយ៉ាងពេញទំហឹង និង ដាច់ ខាត ចំពោះបេក្ខភាពសម្ដេចអគ្គមហាសេនាបតីតេជោ ហ៊ុន សែនជានាយករដ្ឋមន្ត្រី នៃព្រះរាជាណាចក្រកម្ពុជា នៅអាណត្តិទី៧នៃរដ្ឋសភានៅឆ្នាំ២០២៣ខាងមុខ នេះ នឹងគាំទ្រទាំងស្រុងចំពោះឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី នៅពេលអនាគត់ ៕
