ជំនន់ទឹកភ្លៀង ប៉ះពាល់ដល់ហេដ្ឋារចនាសម្ព័ន្ធនានា នៅតាមបណ្តាស្រុកមួយចំនួន ក្នុងខេត្តមណ្ឌលគិរី
ភ្នំពេញ៖ ប៉ុន្មានថ្ងៃនេះខេត្តមណ្ឌលគិរីទាំងមូល បានរងទទួលនូវកម្រិតទឹកភ្លៀងយ៉ាងច្រើន ដោយស្ថានភាពភ្លៀងគឺស្ទើរតែធ្លាក់ពេញ២៤ម៉ោងក្នុង១ថ្ងៃ ដែលក្នុងនោះ ក៏បានធ្វើឲ្យស្រុកកោះញែក បានរងទទួលនូវជំនន់ទឹកភ្លៀងតាមតំបន់ខ្លះមុនគេ បន្ទាប់មកនៅស្រុកកែវសីមា ក៏មានសេចក្តីរាយការណ៍អំពីជំនន់ទឹកភ្លៀងតិចតួចផងដែរ។
យោងតាមប្រភពពីមន្ត្រីជំនាញមូលដ្ឋាន សម្រាប់ស្រុកកោះញែក បានរងនូវជំនន់ទឹកភ្លៀងតាំងពីអំឡុងថ្ងៃទី០៩សីហា ចំណែកស្រុកកែវសីមា ទឺកភ្លៀងទើបបានជន់ឡើងនៅយប់ថ្ងៃទី១០ម្សិលមិញនេះ។
យោងតាមរបាយការណ៍របស់មន្ត្រីជំនាញផ្ដល់ឲ្យ គិតត្រឹមថ្ងៃទី១១ សីហា ស្ថានភាពទូទៅ មេឃងងឹតមានភ្លៀងធ្លាក់ពីតិចទៅបង្គួរ បានបង្កជំនន់ទឹកភ្លៀងបណ្តាលឱ្យលិចផ្លូវលំ ស្រូវ ផ្ទះសម្បែងរបស់ពលរដ្ឋមួយចំនួននៅស្រុកកែវសីមា ក្នុងនោះ៖
១- ឃុំចុងផ្លាស់ លិចផ្លូវលំចំនួន២កន្លែង នឹងលិចផ្ទះប្រជាពលរដ្ឋ ៨ខ្នង មិនបណ្តាលឲ្យគ្រោះថ្នាក់ដល់អាយុជីវិតមនុស្ស សត្វឡើយ។
២- ឃុំមេម៉ង់ លិចផ្លូវលំ១កន្លែង លិចផ្ទះប្រជាជន៥ខ្នង មិនបណ្តាលឲ្យគ្រោះថ្នាក់អ្វីឡើយ។
៣ -ឃុំស្រែឈូក លិចផ្លូវលំភូមិ ចក់ចារ មានភ្លៀងកំពុងធ្លាក់បង្កួរ លាយខ្យល់ ពុំមានបណ្តាលឲ្យគ្រោះថ្នាក់អ្វីឡើយ។
៤- ឃុំស្រែខ្ទុម ស្ថានភាពទឹកកំពុងបន្តឡើង បណ្តាលឲ្យលិចដំឡូងមី ម្រេច ស្វាយចន្ទីមួយចំនួន ។
ដោយឡែកនៅស្រុកកោះញែក ជំនន់ទឹកភ្លៀងបានស្រកទៅសភាពធម្មតាវិញហើយ ស្ថានភាពទឹកនៅទន្លេរស្រែពក ទឹកឡើងជាងថ្ងៃម្សិលមិញបន្តិច ចំណែកនៅស្ថានីយទាំង២កន្លែងក្នុងស្រុកកោះញែក កម្ពស់ទឹកក៏មិនទាន់ដល់កម្រិតប្រកាសអាសន្ននោះដែរ ក្នុងនោះ ស្ថានីយនៅកោះម្យើលលើ ឃុំណងឃីលឹក កំពស់ទឹក ៩.ម.៦០ ( ស្ថានភាពទឹកហ្នឹង កំពស់ទឹកប្រកាសអាសន្ន ១១.ម ) . ស្ថានីយនៅស្ពានសុខសាន្ត ឃុំសុខសាន្ត កំពស់ទឹក ១.ម ៨០ ( ស្ថានភាពទឹកបន្តស្រកចុះ កំពស់ទឹកប្រកាសអាសន្ន ៦.ម ០០ )។
សូមបញ្ជាក់ដែរថា យោងតាមការជូនដំណឹងរបស់មន្ត្រីជំនាញស្ថានភាពទូទៅក្នុងខេត្តមណ្ឌលគិរី គិតត្រឹមថ្ងៃទី១១ខែសីហា២០២២នេះ នៅតាមបណ្ដាស្រុកក្រុងទាំង៥ នៅមិនទាន់មានប៉ះពាល់ដល់ពលរដ្ឋក្នុងមូលដ្ឋានធ្ងន់ធ្ងរនោះទេ៕
