មុខសញ្ញាឆក់យ៉ាងសកម្ម នៅតាមផ្លូវជាតិលេខ២ ត្រូវកម្លាំងនគរបាលស្រុកបាទីធ្វើការឃាត់ខ្លួនបាន ២នាក់

ភ្នំពេញ៖ កាលពីរសៀលថ្ងៃទី៨ ខែ សីហា ឆ្នាំ ២០២២ វេលាម៉ោង ១៤ និង ៣០ នាទី មានករណីអំពើលួច (ឆក់លុយ) កើតឡើងនៅត្រង់ចំណុចភូមិឈើទាលជ្រុំ ឃុំក្រាំងលាវ ស្រុកបាទី ខេត្តតាកែវ ដែលបង្កឡើងដោយ ជនសង្ស័យ ចំនួន ០២ នាក់ ប្រើប្រាស់មធ្យោបាយ ម៉ូតូចំនួន ១គ្រឿង ធុន C១២៥ ពណ៌ខ្មៅ សេរីឆ្នាំ២០១៤ ឡើងតែម ២០១៩ ពាក់ស្លាកលេខ ភ្នំពេញ 1CE-7079 បានធ្វើសកម្មភាពឆក់លុយ របស់ជនរងគ្រោះឈ្មោះ ភួង ម៉ើ ភេទស្រី អាយុ ៤៦ឆ្នាំ មានទីលំនៅភូមិឈើទាលជ្រុំ ឃុំក្រាំងលាវ ស្រុកបាទី ខេត្តតាកែវ មុខរបរ កសិករ ក្នុងខណៈពេលដែលជនរងគ្រោះ ដាក់លុយក្នុងថង់ខ្មៅព្យួរដៃម៉ូតូ របស់ខ្លួន ធុន គុបម៉ូល ក៏ជនសង្ស័យ ជិះម៉ូតូមកទន្ទឹម ធ្វើសកម្មភាពឆក់លុយ ជនរងគ្រោះ យកទៅបាត់ រួចជិះម៉ូតូគេចខ្លួនទៅទិសខាងលិចបាត់។

ក្រោយទទួលបានពត៌មាន កម្លាំងបានចុះដល់កន្លែងកើតហេតុ ធ្វើការស្រាវជ្រាវ រហូតកំណត់មុខសញ្ញាបានចំនួនពីរនាក់ដូចខាងក្រោម៖

១/ ឈ្មោះ ឡាច វិច្ឆិកា (ហៅឆេះ) ភេទ ប្រុស អាយុ ១៧ឆ្នាំ មុខរបរមិនពិតប្រាកដ ជាមុខសញ្ញាប្រើប្រាស់គ្រឿងញៀន មានទីលំនៅភូមិសីហា ឃុំចំបក់ ស្រុកបាទី ខេត្តតាកែវ។

២/ ឈ្មោះ ស្រេង វណ្ណៈ ភេទ ប្រុស អាយុ ២១ឆ្នាំ មុខរបរមិនពិតប្រាកដ ជាមុខសញ្ញាប្រើប្រាស់គ្រឿងញៀន មានទីលំនៅភូមិសីហា ឃុំចំបក់ ស្រុកបាទី ខេត្តតាកែវ។

ដោយមានការចង្អុលបង្ហាញ ពីលោក ឧត្តមសេនីយ៍ទោស្នងការ នៃស្នងការដ្ឋាននគរបាលខេត្តតាកែវ និង សម្របសម្រួលនីតិវិធី ពី ឯកឧត្តម ព្រះរាជអាជ្ញាអមសាលាដំបូងខេត្តតាកែវ រហូតដល់វេលាម៉ោង ១៩ និង ២០ នាទី ទើបកម្លាំងជំនាញ នៃអធិការដ្ឋាននគរបាលស្រុកបាទី បានសហការជាមួយ កម្លាំងប៉ុស្ដិ៍នគរបាលរដ្ឋបាល ក្រាំងលាវ កម្លាំងប៉ុស្ដិ៍នគរបាលរដ្ឋបាលចំបក់ យើងឈានដល់ការឃាត់ខ្លួនជនសង្ស័យបានទាំង ២ នាក់ នៅត្រង់ចំណុចផ្ទះសំណាក់ ហេបភី(Happy) ស្ថិតនៅភូមិត្រពាំងលាន ឃុំចំបក់ ស្រុកបាទី ខេត្តតាកែវ និងវត្ថុតាងម៉ូតូដែលមានភិនភាគខាងលើ ប្រាក់ដុល្លារចំនួន ៧៥០ដុល្លារ (ប្រាំពីរយហាសិបដុល្លារ) និងថ្នាំញៀន ១ កញ្ចប់ យកមកអធិការដ្ឋាននគរបាលស្រុកបាទី ដើម្បីសាកសួរ និងកសាងសំណុំរឿងតាមនីតិវិធី។

ដោយមានបញ្ជាពី ឯកឧត្តម ព្រះរាជអាជ្ញាអមសាលាដំបូងខេត្តតាកែវ កម្លាំងជំនាញយើងបានប្រគល់ប្រាក់ចំនួន ៧៥០ដុល្លារ (ប្រាំពីរយហាសិបដុល្លារ) ទៅជនរងគ្រោះដើម្បីប្រើប្រាស់វិញ ហើយបានកសាងសំណុំរឿង បញ្ជូនបន្តតាមនីតិវិធី៕