ឯកឧត្តម អូន ព័ន្ធមុនីរ័ត្ន ដឹកនាំកិច្ចប្រជុំបូកសរុបលទ្ធផលការងារ ប្រចាំឆមាសទី១ ឆ្នាំ២០២២ និងទិសដៅ ការងារបន្តរបស់ក្រុមការងារ រាជរដ្ឋាភិបាលចុះមូលដ្ឋានខេត្តកណ្តាល

ភ្នំពេញ៖ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួង សេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល នាព្រឹកថ្ងៃទី៨ ខែសីហា ឆ្នាំ២០២២ បានអញ្ជើញ ជាអធិបតីភាពដ៏ខ្ពង់ខ្ពស់ ក្នុងកិច្ចប្រជុំបូកសរុបលទ្ធផលការងារ ប្រចាំឆមាសទី១ ឆ្នាំ២០២២ និងទិសដៅ ការងារបន្តរបស់ក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ស្ថិតនៅសាលប្រជុំសាលាខេត្ត កណ្តាល។

កិច្ចប្រជុំនេះដែរ ដោយបានការអញ្ជើញចូលរួមពី ឯកឧត្តម ឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តី រដ្ឋមន្រ្តីប្រតិភូមអមនាយករដ្ឋមន្រ្តី ឯកឧត្តម នាយឧត្តមសេនីយ៍កិត្តិបណ្ឌិត អនុប្រធានក្រុមការងាររាជរដ្ឋា ភិបាលចុះមូលដ្ឋានខេត្ត និងប្រធានក្រុមការងាររាជរដ្ឋាភិបាល ចុះមូលដ្ឋានក្រុង ស្រុក និងឯកឧត្តម បណ្ឌិតប្រធានក្រុមប្រឹក្សាខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត កងកម្លាំងប្រដាប់អាវុធទាំងបី លោក លោកស្រី ប្រធានមន្ទីរ អង្គភាពជុំវិញខេត្ត ប្រធានក្រុមប្រឹក្សាក្រុង ស្រុក អភិបាលក្រុង ស្រុក ទូទាំងខេត្តកណ្តាល។

ក្រោមការដឹកនាំប្រកបដោយបញ្ញាញាណ របស់ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រួមជាមួយ ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ដ្រី នាយឧត្ដមសេនីយ៍កិត្តិបណ្ឌិត ជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្ត ឯកឧត្តម លោកជំទាវ លោក លោកស្រី ប្រធាន អនុប្រធាន សមាជិកក្រុមការងាររាជរដ្ឋាភិបាលចុះមូលដ្ឋានខេត្ត ក្រុង ស្រុក ឃុំ សង្កាត់ បានធ្វើឱ្យខេត្តកណ្តាល មានកាលានុវត្តភាព និងការអភិវឌ្ឍរីកចម្រើនលើគ្រប់វិស័យ និងបានធ្វើការប្តេជ្ញាចិត្តរួមគ្នាក្នុងការបំពេញ តួនាទី និងភារកិច្ច ប្រកបដោយការទទួលខុសត្រូវ ដើម្បីសម្រេចបាននូវសមិទ្ធផលជាច្រើនលើគ្រប់វិស័យ, បន្តរក្សាបានយ៉ាងគត់មត់នូវសុខសន្តិភាព, ស្ថិរភាពនយោបាយ, រក្សាបាននូវសន្តិសុខ សណ្តាប់ធ្នាប់ សាធារណៈ និងជំរុញការអភិវឌ្ឍសេដ្ឋកិច្ច-សង្គម សំដៅលើកកម្ពស់ជីវភាពរស់នៅ និងកាត់បន្ថយភាពក្រីក្រ របស់ប្រជាពលរដ្ឋនៅមូលដ្ឋានជាបន្តបន្ទាប់។

សម្រាប់ឆមាសទី១ ឆ្នាំ២០២២ ក្រុមការងាររាជរដ្ឋាភិបាលចុះមូលដ្ឋានគ្រប់ថ្នាក់ បានអញ្ជើញចុះសាកសួរសុខទុក្ខ បងប្អូនប្រជាពលរដ្ឋនៅតាមមូលដ្ឋានសរុបចំនួន ៣,៧៥៦ លើក និងទទួល បានសំណើសំណូមពររបស់ប្រជាពលរដ្ឋ សរុបចំនួន ៧៧៥ករណី ក្នុងនោះភាគច្រើនពាក់ព័ន្ធនឹងវិស័យសំខាន់ៗចំនួន៣ រួមមានដូចជា វិស័យសន្តិសុខ សណ្តាប់ធ្នាប់ និងការផ្តល់សេវារដ្ឋបាលគ្រប់ប្រភេទ ចំនួន ១៨២ ករណី ស្មើនឹង ២៣.៤៨%, វិស័យសង្គមកិច្ច ចំនួន ១៧៩ករណី ស្មើនឹង ២៣.០១%, និងវិស័យសុខាភិបាលចំនួន ១០៣ករណីស្មើនឹង១៣.២៩%។

ឆ្លើយតបនឹងសំណើសំណូមពរទាំងនេះ ក្រុមការងាររាជរដ្ឋាភិបាល ចុះមូលដ្ឋានគ្រប់ថ្នាក់បានដោះស្រាយសរុបចំនួន ៧៧៥ករណី ជាលទ្ធផលក្រុមការងារបានធ្វើការដោះស្រាយ ៩៦.៦៥% និងកំពុងបន្តដោះស្រាយសរុបចំនួន ២.៣២%, មិនទាន់បានដោះស្រាយចំនួន ០.៦៥% និងបញ្ចូនទៅថ្នាក់ជាតិ ០.៣៨%។

តាមរយៈកិច្ចខិតខំប្រឹងប្រែងរបស់ក្រុមការងារររាជរដ្ឋាភិបាលចុះមូលដ្ឋានខេត្តកណ្តាល អាជ្ញាធរគ្រប់លំដាប់ថ្នាក់ មន្ទីរអង្គភាពជុំវិញខេត្ត, លេខាធិការដ្ឋានក្រុមការងាររាជរដ្ឋាភិបាលចុះមូលដ្ឋានរាជធានី-
ខេត្ត នៃក្រសួងមហាផ្ទៃ បានវាយតម្លៃ ទទួលស្គាល់ ក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ជាខេត្តទទួលបានចំណាត់ថ្នាក់លេខ១ ក្នុងចំណោម២៥រាជធានី-ខេត្ត លើប្រសិទ្ធភាពការងារ ចុះមូលដ្ឋាន និងដោះស្រាយរាល់បញ្ហា សំណូមពរនានា របស់ប្រជាពលរដ្ឋបានល្អប្រសើរជាងគេ ៕