មន្ទីរទេសចរណ៍ខេត្តបាត់ដំបង ដឹកនាំមន្រ្តីចុះតាមមូលដ្ឋានអាជីវកម្ម សេវាកម្មទេសចរណ៍ក្នុងក្រុង ដើម្បីពង្រឹងការអនុវត្តច្បាប់ស្តីពីទេសចរណ៍
ភ្នំពេញ៖ លោក នួន ថា អនុប្រធានមន្ទីរទេសចរណ៍ខេត្តបាត់ដំបង នៅថ្ងៃទី៥ ខែសីហា ឆ្នាំ២០២២ បានដឹកនាំមន្រ្តីអធិការកិច្ច ចុះតាមមូលដ្ឋានអាជីវកម្ម សេវាកម្មទេសចរណ៍ក្នុងក្រុងបាត់ដំបង ដើម្បីពង្រឹងការអនុវត្តច្បាប់ស្តីពីទេសចរណ៍។
យោងតាម មាត្រា ៣២ ជំពូកទី៥ នៃច្បាប់ស្តីពីទេសចរណ៍ “ គ្មានបុគ្គលណាម្នាក់អាចប្រកបអាជីវកម្ម ទេសចរណ៍បានទេ ប្រសិនបើបុគ្គលនោះមិនបានទទួលការផ្តល់អាជ្ញាបណ្ណទេសចរណ៍ពីក្រសួងទេសចរណ៍ ឬពីរដ្ឋបាលក្រោមជាតិ។ ក្នុងករណីដែលអាជីវកម្មច្រើនប្រភេទ ត្រូវបានប្រតិបត្តិដោយបុគ្គលតែម្នាក់ចេញពី ទីតាំងតែមួយប្រភេទ អាជីវកម្មនីមួយៗ ត្រូវតែមានអាជ្ញាបណ្ណផ្សេងៗគ្នា ប្រៀបដូចជាអាជីវកម្មផ្សេងគ្នាដែល ប្រតិបត្តិចេញពី ទីតាំងផ្សេងគ្នាយ៉ាងដូច្នោះដែរ។ ក្នុងករណីដែលបុគ្គលម្នាក់មានអាជីវកម្ម ទេសចរណ៍ មួយប្រភេទ ហើយមានសាខាច្រើនកន្លែង សាខានីមួយៗនោះត្រូវតែមានអាជ្ញាបណ្ណទេសចរណ៍”។
មាត្រា ៦៥ នៃជំពូកទី១០ បុគ្គលណាដែលប្រកបអាជីវកម្មទេសចរណ៍ដោយគ្មានអាជ្ញាបណ្ណទេសចរណ៍ ត្រូវទទួលពិន័យអន្តរការណ៍ ដែលអប្បបរមាស្មើនឹង ២,០០០,០០០ (ពីរលាន)រៀល និងអតិបរមា មិនលើសពី ២០,០០០,០០០ (ម្ភៃលាន) រៀល។ ទំហំទឹកប្រាក់នែការពិន័យអន្តរការណ៍ សម្រាប់ប្រភេទអាជីវកម្មទេសចរណ៍ នីមួយៗ ត្រូវកំណត់ដោយប្រកាសរបស់រដ្ឋមន្រ្តីក្រសួងទេសចរណ៍។
សូមម្ចាស់អាជីវកម្ម សេវាកម្មដែលមិនទាន់មានអាជ្ញាបណ្ណទេសចរណ៍ សូមរួសរាន់ដាក់ពាក្យស្នើសុំអាជ្ញាបណ្ណ ដើម្បីចៀសវាងការផាកពិន័យអន្តរការណ៍៕
