ឯកឧត្តម ហ៊ុន ម៉ានី កោតសរសើរការរៀបចំ ព្រឹត្តិការណ៍អាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូណេស៊ី

ភ្នំពេញ៖ ឯកឧត្តម ហ៊ុន ម៉ានី ប្រធានប្រតិភូប៉ារ៉ាហ្គេមកម្ពុជា និងជាអនុប្រធានគណៈកម្មាធិការជាតិ ប៉ារ៉ាហ្គេមឡាំពិកកម្ពុជា បានសម្ដែងការកោតសរសើរចំពោះការរៀបចំ ព្រឹត្តិការណ៍អាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូណេស៊ី។
ការកោតសរសើររបស់ឯកឧត្ដមនេះ ក្នុងឱកាសជួបជាមួយឯកឧត្តម Gibran Rakabuming Raka អភិបាលក្រុង Surakarta (Solo) កាលពីថ្ងៃទី៤ ខែសីហា ឆ្នាំ២០២២ ។

ជំនួបរបស់ឯកឧត្តម ហ៊ុន ម៉ានី ជាមួយឯកឧត្តម Gibran Rakabuming Raka អភិបាលក្រុង Surakarta (Solo) ទាំងផ្លូវការ និងមិនផ្លូវការ គឺដើម្បីសិក្សាឈ្វេងយល់ពីបទពិសោធន៍នៃការរៀបចំព្រឹត្តិការណ៏នេះ ដែលកម្ពុជានឹងត្រូវធ្វើជាម្ចាស់ផ្ទះ នៅឆ្នាំ២០២៣ខាងមុខនេះ ក្នុងនាមឯឧត្តមជាប្រធានគណៈកម្មការរៀបចំព្រឹត្តិការណ៍ ។

ឯកឧត្តម ហ៊ុន ម៉ានី ក៏បានថ្លែងអំណរគុណចំពោះ ឯកឧត្តមអភិបាលក្រុង Surakarta (Solo) ដែលបានចំណាយពេលវេលាដ៏មានតម្លៃជួបជាមួយឯកឧត្ដម និងគណៈប្រភូកីឡាកម្ពុជា ហើយឯកឧត្តមបានចាត់ទុកការរៀបចំព្រឹត្តិការណ៍អាស៊ានប៉ារ៉ាហ្គេម នៅទីក្រុងសូឡូគឺរយៈពេលខ្លី ប៉ុន្តែព្រឹត្តការណ៍នេះ គឺអស្ចារ្យណាស់ ។ ជាមួយគ្នានេះ ឯកឧត្តមក៏បានថ្លៃងអំណរអរគុណដល់រដ្ឋាភិបាល និងប្រជាជនឥណ្ឌូណេស៊ី ដែលបានទទួលស្វាគមន៍គណៈប្រតិភូកម្ពុជា យ៉ាងកក់ក្តៅ ។

គួរបញ្ជាក់ថា គិតត្រឹមព្រឹកថ្ងៃទី០៥ ខែសីហា ឆ្នាំ២០២២ អត្តពលិកជនពិការកម្ពុជា ដណ្តើមបានមេដាយសរុប២៣គ្រឿង មាស០៦គ្រឿង ប្រាក់០៨គ្រឿង និងសំរឹទ្ធ០៩គ្រឿង ។ ខណៈកម្ពុជានៅសល់៣ប្រភេទកីឡាទៀត គឺកីឡាហែលទឹក ៣វិញ្ញាសា កីឡាលើកទម្ងន់ និងបាល់បោះជិះរទេះនារី វិញ្ញាសា៥ទល់៥ នឹងត្រូវប្រកួតដណ្តើមមេដាយមាស ជាមួយក្រុមកីឡាការិនីថៃ នៅថ្ងៃទី០៥ ខែសីហានេះ វេលាម៉ោង១១:០០ ថ្ងៃត្រង់ ។

ជាមួយគ្នានេះ អាស៊ានប៉ារ៉ាហ្គេម លើកទី១១ នៅឥណ្ឌូណេស៊ី ចាប់ពីថ្ងៃទី៣០ ខែកក្កដា ដល់ថ្ងៃទី០៦ ខែសីហា ឆ្នាំ២០២២ ក្នុងនោះកម្ពុជា បានបញ្ជូនកីឡា១១ប្រភេទចូលរួមប្រកួត គឺកីឡាអត្តពលកម្ម ហែលទឹក បាល់ទះអង្គុយបុរស និងនារី បាល់បោះរទេះបុរស និងនារី បាល់បោះជនពិការភ្នែក បាល់ទាត់ចលករខួរក្បាល (៥ម្ខាង) វាយកូនឃ្លីលើតុ វាយសី លើកទម្ងន់ អុកអន្តរជាតិ និងប៊ូស្យា ៕