ឯកឧត្តមរដ្ឋមន្ត្រី សាយ សំអាល់ ទទួលជួបជាមួយគណៈប្រតិភូវៀតណាម ដឹកនាំដោយ ឯកឧត្តម ជិន ង៉ុកធួត អតីតសមាជិកសភាជាតិវៀតណាម
ភ្នំពេញ៖ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានទទួលជួបជាមួយគណៈប្រតិភូវៀតណាម ដឹកនាំដោយ ឯកឧត្តម ជិន ង៉ុកធួត ( Tran Ngoc Thuan) អតីតសមាជិកសភាជាតិវៀតណាម និងជាសមាជិកក្រុមប្រឹក្សាភិបាលសម្ព័ន្ធឧស្សាហកម្មកៅស៊ូវៀតណាម
ឯកឧត្តម ង្វៀន ហ្វ៊ីតាំង (NGUYEN HUY TANG) ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋសង្គមនិយមវៀតណាម ប្រចាំកម្ពុជា នៅថ្ងៃទី៣ ខែសីហា ឆ្នាំ២០២២ នាទីស្តីការក្រសួង។
ក្នុងឱកាសជួបពិភាក្សា និងសម្តែងការគួរសម ឯកឧត្តម ជិន ង៉ុកធួត បានសម្តែងនូវសេចក្តីសោមនស្សរីករាយ និងថ្លែងអំណរគុណយ៉ាងជ្រាលជ្រៅដល់ឯកឧត្តមរដ្ឋមន្ត្រី ដែលបានចំណាយពេលវេលាដ៏មានតម្លៃអនុញ្ញាតឱ្យលោក និងសហការីចូលជួបសម្តែងការគួរសម។
ឆ្លៀងក្នុងឱកាសនោះដែរ ឯកឧត្តម សាយ សំអាល់ បានគូសបញ្ជាក់ប្រាប់លោក ឯកឧត្តម ជិន ង៉ុកធួត និងសហការី អំពីជោគជ័យនៃការទប់ស្កាត់ការរីករាលដាលនៃជំងឺកូវីដ-១៩ នៅកម្ពុជា។
ឯកឧត្តមបានលើកឡើងថា សម្តេចតេជោនាយករដ្ឋមន្ត្រីបានធ្វើការសម្រេចចិត្តដ៏ត្រឹមត្រូវបំផុត និងមានវិធានការច្បាស់លាស់ក្នុងការបង្ការនិងទប់ស្កាត់នូវការរីករាយដាលនៃជំងឺកូវីដ-១៩ តាមរយៈការដាក់ចេញនូវគោលនយោបាយចាក់ស្រោចវ៉ាក់សាំងបង្ការជំងឺកូវីដ-១៩ លើប្រជាពលរដ្ឋទូទាំងប្រទេសគ្រប់ស្រទាប់វណ្ណៈ ហើយបានដឹកនាំនាវាកម្ពុជាឆ្លងផុតពីគ្រោះមហន្តរាយមួយនេះយ៉ាងជោគជ័យ ជាមួយនឹងការបើកដំណើរការប្រទេសជាតិ និងសង្គម-សេដ្ឋកិច្ចឡើងវិញតាមគន្លងប្រក្រតីភាពថ្មី៕
