មន្ទីរពេទ្យបង្អែកខេត្តតាកែវ ពន្យល់បកស្រាយលម្អិតជុំវិញការចោទប្រកាន់ក្រុមគ្រូពេទ្យវះកាត់បណ្ដាលអោយអ្នកជំងឺស្លាប់

ភ្នំពេញ៖ យោងតាមសេចក្ដីបំភ្លឺ និងពន្យល់របស់ លោកវេជ្ជបណ្ឌិត ឈូវ ឈួន ប្រធានមន្ទីរពេទ្យបង្អែកខេត្តតាកែវ បានថ្លែងប្រាប់ និងពន្យល់នៅរសៀលថ្ងៃចន្ទ ទី០១ ខែសីហា ឆ្នាំ២០២២នេះ ដោយបានបញ្ជាក់ថា អ្នកជំងឺម្នាក់ឈ្មោះ ប៊ុន ស្រីកែវ ភេទស្រី អាយុ ២៤ឆ្នាំ រស់នៅភូមិវាយឈ្នះ ឃុំរវៀង ស្រុកសំរោង ខេត្តតាកែវ បានជួបគ្រោះថ្នាក់ចរាចរណ៍ បណ្ដាលឱ្យបាក់ដងកាំបិតខាងស្ដាំ និងមានរោគសញ្ញានៃការហើមសួត នឹងតំរងនោមលែងដំណើរការ។

លោកវេជ្ជបណ្ឌិត ឈូវ ឈួន ប្រធានមន្ទីរពេទ្យបង្អែកខេត្តតាកែវ បានថ្លែង ប្រាប់ឱ្យដឹងថា កាលពីថ្ងៃទី២២ ខែកក្ដដា ឆ្នាំ២០២២នេះ មានអ្នកជំងឺម្នាក់ឈ្មោះ ប៊ុន ស្រីកែវ ភេទស្រី អាយុ ២៤ឆ្នាំ រស់នៅភូមិវាយឈ្នះ ឃុំរវៀង ស្រុកសំរោង ខេត្តតាកែវ បានជួបគ្រោះថ្នាក់ចរាចរណ៍ បណ្ដាលឱ្យឈឺស្មា និងលើកដៃស្ដាំឈឺនឹងកម្រើកមិនរួច។ បន្ទាប់ពីបានពិនិត្យ និងធ្វើការថតកាំរស្មីអ៊ិច ក៏រកឃើញមានស្នាមបាក់ដងកាំបិតខាងស្ដាំ ពេលនោះគ្រូពេទ្យនៅផ្នែកពិគ្រោះជំងឺខាងក្រៅ បានព្យាបាលបឋមដោយបិតបង់ស្អិតនៅត្រង់កន្លែងបាក់ នឹងព្យួរដៃអបនឹងដងខ្លួនដើម្បីកាត់បន្ថយការឈឺចាប់ និងទប់លំនឹងឆ្អឹផង ដោយបានដាក់សម្រាកព្យាបាលនៅផ្នែកវះកាត់ ដើម្បីរងចាំធ្វើការវះកាត់ផ្ជាប់ដំនរឆ្អឹងបាក់ដោយបាញ់ដែក (Broche)។

លោកប្រធានមន្ទីរពេទ្យបង្អែកខេត្ត បានបន្ថែមថាកាលពីរសៀលថ្ងៃទី២៦ ខែកក្ដដា ឆ្នាំ២០២២នេះ អ្នកជំងឺត្រូវបានបញ្ជូនទៅធ្វើការវះកាត់ភ្ជាប់ដំណរឆ្អឹងបាក់ដោយបាញ់ដែក (Broche) និងប្រើប្រាស់ថ្នាំសណ្ដំទូទៅមិនស៊កទុយោជំនួសដង្ហើម ប៉ុន្តែនៅពេលកំពុងវះកាត់អ្នកជំងឺក៏ឈប់ដកដង្ហើម ក្រុមគ្រូពេទ្យស្នាំសណ្ដំ ក៏សម្រេចដាក់ទុយោចូលផ្លូវដង្ហើម ដើម្បីជំនួយដង្ហើម តែដោយសារផ្លូវដង្ហើមកន្រ្ទាក់ ស៊កទុយោមិនបាន ធ្វើឱ្យពន្យាពេលនៃការបញ្ជូលអុកស៊ីហ្សែន ទៅចិញ្ជឹមសិរីរាង្គ ក្រោយមកក៏មានគាំងបេះដូង។ ពេលនោះក្រុមគ្រូពេទ្យក៏បន្តធ្វើចលនាបេះដូង និងផ្ដល់ថ្នាំជំនួសបេះដូង បន្ទាប់មកបេះដូង នឹងដកដង្ហើមក៏ចាប់ផ្ដើមដំណើរការឡើងវិញ។

លោកវេជ្ជបណ្ឌិត ឈូវ ឈួន ប្រធានមន្ទីរពេទ្យបង្អែកខេត្ត បានបន្តថា ក្រោយការវះកាត់រយះពេល ៤០នាទី អ្នកជំងឺក៏ដឹងខ្លួនឡើងវិញទាំងស្រុង និងបានសន្ទនាជាមួយឪពុករបស់គាត់ ប៉ុន្តែស្រាប់តែរយះពេល ២ម៉ោង ក្រោយមកអ្នកជំងឺក៏មានលេខចេញរោគសញ្ញានៃការហើមសួត នឹងតំរងនោមលែងដំណើរការ នៅពេលនោះក្រុមគ្រូពេទ្យ ក៏សម្រេចចិត្តដាក់ទុយោជំនួយដង្ហើម និងបញ្ជូនទៅព្យាបាលបន្តនៅមន្ទីរពេទ្យ មិត្តភាពកម្ពុជាចិន ព្រះកុសមៈ (ពេទ្យលោកសង្ឃ) ដោយមានគ្រូពេទ្យថ្នាំសណ្ដំទៅជាមួយ ហើយគ្រូពេទ្យលោកសង្ឃក៏ទទួលអ្នកជំងឺព្យាបាលបន្តផងដែរ៕